Ŋicwofuŋ I 3:14-22

¹⁴Go nore hatao juhuc dâŋsanaŋ â sâcmutâc dâŋnane mamacge Dawidizi ewec irec sâc ehuc reŋkecmuo ine raŋɋa raŋɋa jambuŋguhuc jupemu.”

¹⁵Eme Salomozi ɋârerâ ʒiŋuc mana tarawec: Â, ʒi guŋ manakopac. Iŋuc muhuc Jerusalem haeo ferâ Wofuŋte ʒâʒâfic katapa irec maŋfuŋko domahuc qowi bâzi â wama bâzi wiac rikerâ fekicnefâc‐ticne tiwa bâzi ejarewec.

¹⁶Eme dameŋ ira sasec ŋokac jajahec jahe ŋicwofuŋ dâŋ âzâcnenicte erao rapic.

¹⁷Erâ ŋokac moczi ʒiŋuc âzâcnewec: “O bomboŋ‐nane, go dâŋ gazape manac: No â ŋokac kecʒi nâhe fic mocjahao ŋec foc eekoperec. Eme nâhe ira ŋehuc no motec moc ropo.

¹⁸Ehame ʒoaŋ gie bapa 3 tarame ŋokac kecʒi e motec moc rowec wâc. Nâhe fic ira bucjâmbâŋ‐nâhec jupec, ŋic me ŋokac moczi nâhehec moc mi jujâmbâŋkembiŋ.

¹⁹Eme ŋokac kecʒi e ŋafeo guŋ fohuc motec‐ticne fohâmowec.

²⁰Erâ ŋafe ʒâŋiŋko faharerâ kiŋaŋ naruge no guŋ fohape nore motec nowac rorâ bumaŋ‐ticnao râewec â e jahacne motec hâmocne ine norao râewec.

²¹Eme hae fureme motec‐nane moŋ gumezore faharehuc honepe motec e hâmocne fowec. Ehame hae fure taniŋkeme hone‐hâmorâ ʒiŋuc mana tarapo: Motec keci e moc e noni mi ropo.”

²²Iŋuc mume ŋokac âgo‐ticnezi muwec: “I burec, motec ɋâricne jukac e nore, gore motec ine hâmojec.” Mume âgonezi muwec: “Burec, nore motec e ɋâricne, â gore ine hâmojec.” Iŋuc muhuc ŋicwofuŋte maio mu qaqatarac epic.