1 ጴፂሮሳ 3

1

2

3

4

5

¹ሄሳዳካ፥ ማቼቶ፥ ሂንቴ ኣዚናታፔ ፆሳ ቃላስ ኪቴቶናይሳቲ ዴዒኮካ ኣይኮካ ኦዴቶናሺን፥ ሂንቴ ያሻቴꬃኔ ሂንቴ ጌሻ ዴዑዋ ቤዒዲ ኣማናና ሜላ ኤንታው ሃሬቲቴ።

³ሂንቴ፥ ሂንቴ ሁዔ ፒፆኒኔ ዎርቃ ኣሶን ዎይኮ ሎዖ ማዖን ሂንቴ ቦላ ኣሳቴꬃ ሎይሶን ጊዶፖ።

⁴ሺን ሂንቴ ዎዛና ጊዶን ዴዒያ ዬጌልሳቴꬃይ ፆሳ ሲንꬃን ሂንቴው ዳሮ ኣልዖ ጊዲዲ ꬋዮና፥ ኣሽኬኔ ዎፑ ጊዳ ኣያና ጊዶ።

⁵ፆሳይ ኢማና ጊዳይሳ ኣማኒዳ ጌሻ ማጫሳቲ ቢኒ ዎዴ ባንታ ኣዚናታስ ሃሬቲዲ፥ ባንታና ሄሳዳ ዳሮ ሎይꬂዶሶና።

⁶ሄሳዳ ሳራ ኣብራሃሜ፥ «ታ ጎዳው» ያጋዳ ፄጋሼ፥ ኢያው ኪቴታሱ፤ ሂንቴካ ኣይኮካ ያዮና ሎዖባ ኦꬂኮ ኢ ናይታ።

⁷ኣዚናቶ፥ ሂንቴ ማቼቲ ሂንቴፌ ዳቡራንቾ ሜꬌታ ጊዴይሳ ኤሪዲ፥ ኤንታና ቦንቺቴ፤ ሂንቴ ዎሳ ꬉቦና ሜላ ፆሳይ ኢሚዳ ዴዑዋ ኤንቲ ሂንቴራ ኢሲፌ ላቲያ ጊሾ ኤንታ ቦንቺቴ።

⁸ዉርሴꬃን፥ ኡባይ ኢሲ ቆፋን ዴዒቴ። ኢሶይ ኢሱዋስ ቃꬌቲሼ፥ ኢሻዳ ሲቄቲቴ፤ ቃሲ ኢሶይ ኢሱዋስ ኬሃታኔ ኣሽኬታ ጊዲቴ።

⁹ኢታ ጊሾስ ኢታ ዎይኮ ጫሻ ጊሾ ጫዪዲ ዛሮፒቴ፤ ሄሳ ኣጊዲ፥ ፆሳይ ሂንቴው ኣንጁዋ ኢማናው ሂንቴና ፄጊዳ ጊሾ ኣንጂቴ።

¹⁰ኣይስ ጊኮ፥ ጌሻ ማፃፋይ፥ «ዴዖ ዶሴይኔ ሎዖ ዎዴ ቤዓናው ኮዬይ ኦና ጊዲኮካ ባ ኢንፃርሳን ኢታባኔ ዎርዶ ኦዴቴይሳ ኣጎ።

¹¹ኢታባ ኦꬄይሳ ኣጊዲ ሎዖባ ኦꬆ፤ ሳሮቴꬃካ ኬሂ ኮዮኔ ካሎ።

¹²ጎዳ ኣይፌይ ፂሎታኮ ፄሌስ፤ ቃሲ ኢ ኡባ ዎዴ ኤንታ ዎሳ ሃይዜስ። ሺን ጎዳይ ኢታባ ኦꬄይሳታ ባ ሃንቆ ሶምዑዋን ፄሌስ» ያጌስ።

¹³ሂንቴ ሎዖባ ኦꬃናው ኣሞቲኮ ሂንቴና ቆሃናይ ኦኔ?

¹⁴ሃሪ ኣቶሺን፥ ፂሎቴꬃ ጊሾ ሂንቴ ዋዬቲኮ ኣንጄቲዳይሳታ። ኣሳስ ያዮፊቴኔ ሂርጎፊቴ።

¹⁵ኪሪስቶሳ ሂንቴ ዎዛናን ቦንቺቴኔ ጎዳዪቴ። ፆሳይ ሂንቴው ኢሚዳ ኡፋይሳስ ጋሶ ኦይቺያ ኦዴስካ ዛሮ ኢማናው ኡባ ዎዴ ጊጊ ኡቲቴ፥ ሺን ሄሳ ኣሽኬቴꬃኒኔ ያሻን ኦꬂቴ።

¹⁶ቃሲ ኪሪስቶሳን ሂንቴ ዴዒያ ሎዖ ዴዑዋ ኢታባ ኦꬂዳባዳ፥ ሂንቴና ጫያ ኣሳይ ዚጊርያባን ዬላታና ሜላ ሂንቴ ካሃይ ጌሺ ጊዶ።

¹⁷ፆሳይ ጊዳባ ጊዲኮ ኢታባ ኦꬂዳ ጊሾ ዋዬ ኤኬይሳፌ ሎዖባ ኦꬂዳ ጊሾ ዋዬ ኤኬይሲ ሎዖ።

¹⁸ኪሪስቶሲ ኑና ፆሳኮ ሺሻናው ባው ፂሎ ጊዲዲ ዴዒሼ፥ ናጋራንቾታ ጊሾ ኢሲ ቶሆ ናጋራ ኡባስ ሃይቂስ፤ ኢ ባ ኣሳቴꬃን ሃይቂስ፥ ሺን ኣያናን ፓፂስ።

¹⁹ቃሲ ሄ ኣያናን ኢ ቢዲ ቃሾን ዴዒያ ሼምፖታስ ቃላ ኦዲስ።

²⁰ኖሄይ ማርካቢያ ኬፂያ ዎዴ ሄ ሼምፖቲ ፆሳስ ኪቴቶና ኢፂዶሶና፥ ሺን ፆሳይ ኤንታና ዳንዳዒስ። ሆስፑን ኣሳ ፃላሊ ማርካቢያን ጌሊዲ፥ ꬋዮ ሃꬃፌ ኣቲዶሶና።

²¹ሄ ꬋዮ ሃꬃይ ሃዒ ሂንቴና ኣሺያ ፂንቃቴ ሌሚሶ ጊዲስ። ሃ ፂንቃቴይ ቦላ ቂታ ሜጮ ጊዶናሺን ሎዖ ካሃ ፆሳፌ ኤካናው ኢያ ዎሲያ ኦጌ ጊዲዲ፥ ኪሪስቶሳ ዴንዱዋ ባጋራ ሂንቴና ኣሼስ።

²²ኢ ሳሎ ቢዲ ፆሳ ኡሻቻን ኡቲዲ፥ ኪታንቾታ፥ ማታ ኣዋታኔ ዎልቃማታ ሃሬስ።