1Ŋokac ŋoŋere iŋuc jaha mupe, ŋoŋe ŋowefâc‐ŋeŋic jaŋere wahamicne junʒepieŋ. Eme ŋowefâc‐ŋeŋic gâcne miti qiqikiŋ jueŋgopieŋ jaŋe dâŋ mi jajaza mâc rume‐jarehuc maŋɋaɋac jupie
2ŋonâŋfâc‐jeŋic ŋoŋere juju bapa hone manac erâ maŋjeŋic bârisienʒepieŋ.
3Ŋoŋe sahacte eri, qizec ba ericko bapa, kubu wiac furi sâko qoqonaŋ, ŋaqi qâreŋ biaŋ rojuju, irec manapie jawane ezejec.
4Ehame buuruc fârine, maŋwâmbuŋko soŋkerâ tiŋbenoŋ bâfuaekac, izi eri fofo sanaŋ‐ŋeŋic eme Anutuzi maname furi sâko eocmu.
5Miti ŋokac mârâc jujumbieŋ jaŋe eri i hâcne baju jumbieŋ, ehuc Anuturao roweckehuc ŋowefâc‐jeŋic sâsec‐jopa jumbieŋ.
6Sara eki hâcne Abraham dâŋticne reŋke jujec, ehuc ŋicbomboŋ mucne jujec. Eme ŋoŋe wiac biaŋne bahuc mu hâhâwicte mana mezac mi eniŋmuo otâfâc‐ticne embiŋ juŋgopieŋ muŋarezo.
7Ŋic ŋoŋere iŋuc jaha mupe; ŋokac e tâpirine wahakacte ŋonâŋfâc‐ŋeŋic wiac mana manahuc ejarenʒepieŋ. Erâ juju sanaŋte biŋe mâmâc qajarekicnere sâsec‐jopahuc junʒepieŋ. Eme nunumu‐ŋeŋiczi ququŋke tâmiric qâfâsâerâ fezejec.
8Erâ qâhâckehuc mupe; ŋoŋe mâmâc sasawa maŋ mocjaha erâ miriŋhec junʒepieŋ, ehuc âgofâc‐ŋeŋic maŋjauŋ ejarehuc wama ruaine â maŋhuhuŋ junʒepieŋ.
9Wiac sâqocne eŋarepie okacne sâqocne jaha mi ejarenʒepieŋ, sosopec dâŋ ŋazapie okacne sosopec dâŋ jaha mi jazanʒepieŋ, aricne, ŋoŋe jambuŋ hotâckeniŋte hefârec‐ŋopakicnere jaŋe wâc jambuŋdâŋ jazanʒepieŋ.
10“Moc e jujure aŋackekac â dameŋ biaŋ bâfuazo ecnekac, e nameŋ‐ticne soŋaŋkeha sâqocne mi bazejec, â micbipic‐ticne qataracneme burecdâŋ mi ezejec.
11Eme sâqocne râpeckerâ wiac biaŋne ezejec, erâ wamao juhuc irec giene fotarierâ bazejec.
12Wofuŋ e ŋic tiŋne jaŋerao ʒâŋe fihuc mu wâwâsic‐jeŋicte hazec râeekac, sâqocne bapa jaŋe ine Wofuŋzi hone qikiŋ ejareekac.”
13Ŋoŋe wiac biaŋnere henʒiriŋnehuc juhapie mozi wemo wiac eŋareocmu?
14Me juju bapa tiŋnere erâ fific guguriŋ faio feniŋmu, ine manapie bubiaŋnehec ezejec. Ʒika hâhâwic eŋarepie ɋarac ɋarac mi qanʒepieŋ â hâbi gogoroŋ mi enʒepieŋ.
15Maŋŋeŋic ba emasaŋ epie Kristo e tiri Wofuŋ juŋarezejec. Erâ maŋzi wiac worickehuc jueŋgopieŋ irec mu indiŋ eŋarepie afeckerâ fuŋne mutaniŋkenʒepieŋ.
16Erâ dâŋ i urucko â acmeruŋ ehuc, maŋŋeŋiczi mumu hehec mi eŋareha munʒepieŋ. Iŋuc epie, Kristohec juhuc wiac ebac eeŋgopieŋ irec qoric‐ŋopaeŋgopieŋ, ŋic i jaŋe burec‐jeŋicte fuŋne taniŋkeme mimienʒepieŋ.
17Ŋoŋe wiac biaŋne ehuc juhapie Anutuzi maname sâckeha ʒika kâpâcwâru eŋareniŋmu irec manape fekac, â bahac bâfuapie eŋareniŋmu ine manape wahakac.
18Kristo e iŋuc jaha tiŋnezi sâqocnere erâ arec moc hâmowec, e tiŋnezi hehesicne ŋoŋere erâ iŋuc ewec, Anuturao râec‐ŋopaocte. E sahachec juwecte qapie hâmowec, â Mârohec juwecte ɋârewec.
19Mârohec wâc juhuc qâqâtâc kâpâcwâruo fombiŋ jaŋerao rarâ miti jazawec.
20Jaŋe mârâc jaha Noa e woke bahuc juhame Anutuzi maŋuruc‐ticnere erâ woŋec‐jeŋic juipiehame dâŋticne qâsuambiŋ. Eme ŋic ŋokac jahec mac, 8 sawa, jaŋe wokeo fepie opâzi akic‐jopame jumbiŋ.
21Eme ŋifecne ʒi opâzi wâc Miti Opâo bâpiaŋ‐ŋopaekac. Miti Opâ e sahac wânâŋ mi ʒureekac, e Anutu hefâreme ware maŋŋeŋic ʒureme mumu hehec mocwâc mi eŋareekac; wiac i Jesu Kristozi hâmockonec ɋârehuc bâfuawec.
22E jahacne sambâŋko Anutu fârenao fewec jukac; ira juhame aŋelo fekicne jaŋe ere wahamicnao jueŋgopieŋ.
