1A nêl pyap gwêba ên a nêbê xam loc vac xomxo levac kwa ngɨbi, om a ob nêl kɨyang tiga vô xam vêx wê xam kô vux ge bêga bê xam loc vac lɨyame kɨyang kwa ngɨbi, ên he ya obêc vông i vin Anutu kɨyang lêm ge od he ob yê môp nivɨha wê xam mi vông ge dɨ ob pɨlepac he nɨlô la vô Anutu. Lêc he ob pɨlepac nɨlô ên kɨyang wê xam ob nêl vô he ge lêm.
2Nge, he ob yê xam dɨ xovô bê xam xona ên Anutu dɨ tɨmu vô môp nivɨha, om he ob pɨlepac nɨlô la vô Anutu.
3Lêc xam vêx ge, le i lêc vông nɨlôm i loc vô môp vunacên i tɨyi xocbê xam vunac vô bamzub lihi dɨ nux komkom gol lec kwam dɨ vɨnyum ngakwi paha ge lêm.
4Nge, xam vunac vô xam nɨlôm môci bêga bê kɨyang malehe i yêp vac xam nɨlôm. Ên vunacên tige ob vô nipaên lêm. Nge, obêc dô luta, dɨ Anutu obêc yê vunacên tige nêb nivɨha yang.
5Ilage vêx wê tu vêx ngɨbua wê vông nɨlô la dɨluhu vô Anutu ge, he vunac vô nɨlô ya vunacên tibêge dɨ ngô lɨyae kɨyang dɨ la vac he kwa ngɨbi.
6Sela êno vông môp tibêge dɨ la vac lɨya Eblaham vya kwa ngɨbi dɨ nêl vô i ên nêbê, “A nêg levac ông.” Om xam vêx ge, xam obêc tɨmu vô môp nivɨha dɨ xonaên obêc ma ge od xam ob tɨyi xocbê Sela nue.
7A ob nêl vô xam vux wê xam ii vêx ge bêga bê xam xovô vɨnême dɨ dô nivɨha hɨxôn he, ên xêkɨzêc wê he vông ge o tɨyi wê xam vux vông ge lêm. Om xam viac he nivɨha. Dɨ xam xovô bêga bê Anutu vông vɨzid nivɨha vô xam vux dɨ vông vô vɨnême hɨxôn. Vɨzid tige bêga nêbê xam obêc dô mamvɨha luta hɨxôn Anutu. Om xam vux, xam dô nivɨha hɨxôn vɨnême ên môp nipaên ti i o lêc le vac kɨtaaên wê xam vông ge xôn lêm.
8A ob nêl kɨyang ti hɨxôn bêga bê xam nɨlôm i yêp tibed, dɨ xam xo vɨgwe pɨsiv ênma, dɨ xam xêmyaa i vin lec lime vông vinên vɨhati, dɨ xam viac lime vɨhati i nivɨha, dɨ xam o yong xam vô lime lêm.
9Dɨ xam o vông nipaên vac nipaên lêm, dɨ xomxo obêc nêl kɨyang nipaên vô xam ge od le i lêc luu kɨyang nipaên i loc vô he lêm. Nge, xam kɨtaa vô Anutu ên i vông vɨzid nivɨha vô he. Anutu tyuc xam ên nêb xam vông môp tibêge, om xam obêc vông bêge ge od Anutu ob vông vɨzid nivɨha vô xam vô buc tɨmuên.
10Om xam tɨmu vô môp nivɨha bêgee, ên xolac nêl bêga ên nêbê, “Xomxo ti obêc nêb dô hɨxôn xêyaa nivɨha gê kɨbun ga dɨ tulec nivɨha i tɨyi buc vɨhati ge od i vɨbu mya xêkɨzêc dɨ kɨyang nipaên ti i o lêc tyip vac mya lêm, dɨ i viac mya nivɨha dɨ i o lêc nêl kɨyang kɨtyooên ti lêm.
11Mêd i vô nɨmi vô môp nipaên vɨhati dɨ tɨmu vô môp nivɨha, dɨ myag môp wê ob dô ya kɨyang malehe ge dɨ tɨmu vô.
12Ên Apumtau yê xomxo wê nivɨha ge dɨ ngɨdu he xôn, dɨ ngô kɨtaaên wê he kɨtaa vô i ge. Lêc he wê vông môp nipaên ge, Apumtau vô nɨmi vô he dɨ vông myavɨwen nipaên vô he.”
13Xam obêc vông yuac xêkɨzêc dɨ la vac môp nivɨha ge od letya ob vông xam vô nipaênê?
14Lêc xam obêc vông môp nivɨha lêc xomxo obêc vông vɨyin vô xam ge od xam xêmyaa i vô nivɨha, dɨ le i lêc xona ên he lêm, dɨ xam nɨlôm i o xo kɨyang tɨbeac lêm.
15Nge, xam vông nɨlôm i loc dɨluhu vô Kɨlisi dɨ vông i tu xam nêm xomxo levac. Dɨ xam viac xovôên wê xam vông ge, ên xomxo ti obêc kɨnêg xam lec vông vinên wê xam vông ge kehe ge od xam obêc tɨyi wê xam ob nêl kɨtong vô he mɨ he xovô. Om xam wê he tɨyi xocbê he xomxo levac ge dɨ lum nêl kɨyang malehe vô he.
16Dɨ xam viac nɨlôm i vô paha, dɨ nipaên ti i o yêp vô xam lêm, ên xomxo obêc nêl nipaên vô xam ên wê xam vông i vin Kɨlisi dɨ tɨmu vô môp nivɨha ge od he ni ob yoc ên kɨyang nipaên wê he nêl lec xam ge.
17Xam obêc vông môp nivɨha, lêc Anutu obêc tyuc lec ên nêbê xam tulec vɨyin ge od Anutu ob yê nivɨha. Ên môp tibêge luu môp wê xam tulec vɨyin ên môp nipaên ge vêl.
18Ên Kɨlisi êno tulec vɨyin dɨ yib ên il nêd nipaên lu tibed dɨ obêc yib lu ngwe hɨxôn tii vac lêm. Kɨlisi ge xomxo nivɨha yang, lêc yib ên il wê nipaên ge ên nêb ob dɨdii il lôm vô Anutu. Xomxo hi Yesu ninɨvi yib lêc i kɨnu dô mavɨha.
19Ilage vô buc wê Nôa dô mavɨha ge xomxo ya dô hɨxôn, lêc he o vông i vin Anutu kɨyang lêm, om he yib mɨ la dô vac vɨgwe nipaên. Om buc tɨmuên wê Kɨlisi yib ge od Kɨlisi kɨnu la nêl xolac vô xomxo yibên tigee kɨnu. Buc wê he gên dô mavɨha ge od he o vông i vin Anutu kɨyang lêm. Lêc Anutu o kɨtya he vêl lutibed lêm. Nge, Anutu dɨbin he ên nêb he i pɨlepac nɨlô loc vô i. Nôa dɨlox sip levac ti, lêc he o pɨlepac he lêm. Om xomxo yuutyabed tɨyi xocbê he vɨgê vɨlu dɨ sec yon ge wê he la dô vac sip nɨlô, dɨ mia dung dɨ lig, mêd he wê dô vac sip nɨlô ge vɨhati dô mavɨha dɨ ti o yib vac mia lêm.
21Om môp wê Nôa dô mavɨha vac sip ge tɨxuu il lec môp wê il lipac mia ngɨbua ge bêga nêbê môp mia lipacên ge vô il vêl ên il nêd nipaên om il obêc dô madvɨha. Lêc il o lipac nidnɨvi ên il nêb ningeac i loc vêl lêm. Nge, mia lipacên wê il vông ge tɨyi xocbê il kɨtaa vô Anutu ên il nêb i kɨtya il nêd nipaên vêl dɨ vông il nɨlôd i vô paha lec. Om wê Anutu kɨtya il nêd nipaên vêl ge, kehe lec wê Yesu Kɨlisi kɨdi lec mavɨha vac yibên ge.
22Yesu lax mɨ la lag puunê dɨ la dô vô Anutu vɨgê hɨyôv, om angela dɨ he wê kô lê levac gê lag puunê hɨxôn xêkɨzêc toto wê dô lag puunê ge vɨhati dô vac Kɨlisi kwa ngɨbi.
