1 Petrus 3

1

2

3

4

5

¹Mua o huriki a ngatavine, mua ranga, mu longototo e girihine mua. Bara mu rata mavonga, bara ri pulo a vilone ria e girihine mua i uka ma ri luhoi torea a nita na Vure. I uka ma ni gi vara ria, pali bara ri pulo a vilone ria na tahuna ri matai a naro kamumu ne girihine ria,

²ra naro ni togo, a naro malamala.

³Nahea mu gu roe vona a maki polovavo ga bagetua ne mua, manga a naro ni kolo tata a vune mua, ni rodo a gol, ni rodo a maki kamumu hateka.

⁴A bagetua ne mua ge valai pololilo na hatene mua, manga a naro ni vakakiroko mua, ni made madoru. A Vure i ngaru hateka a bagetua maea. I uka ma ge lobo.

⁵E huriki a ngatavine malamala ri luhoi tora a Vure hosi, ri rata maea. A bagetua ne ria, ri longototo e girihine ria.

⁶E Sara i longototoa e Abraham, i galea a bakovi dagi vona. Bara mua e huriki a ngatavine kamumu manga e Sara na tahuna i uka ma mu mangenge vona a maki tara, mu rata a naro kamumu.

⁷Mua o huriki a bakovi ranga, mu lohoka vona e huriki a ngatavine i uka ma ri tuhaka. Mu made kamumu turana e girihine mua. Mu togo ria, a vuhuna ria ranga, ri gi bole na Vure a nimahuri vakaroro. I uka ma mu gu rata mavonga, a Vure i uka ma ge longo a nivasileki ne mua.

⁸I pali. Mua lobo mu pesi na niluhoi i taku kunana. Mu vadodo. Mu vangaru i manga mua a maki tari. Mu valemu. Mu vakakiroko mua.

⁹A viri ge rata hale mua, naha ni koli. A viri ge harogi mua, naha ni koli. Pali mu gamai ria, a vuhuna a Vure i gale mua mu gu rata mavonga, lakea mua ranga, bara ni gamai.

¹⁰I manga a ngava ni here na Hinere, “E rei a viri i ngaru a nimahuri, i ngaru ni made kamumu, ge matakaria a tabelena, i uka ma ge rata a ngava hale, ge matakari a ngavana, i uka ma ge tatami.

¹¹Ge ngalahere na naro hale, ge rata kamumu kunana. Ge toni a buluna ni made na nivalemu.

¹²A vuhuna e Bakovi Dagi i mata­kari e huriki a bakovi malamala, i longo a nivasileki ne ria. Pali i gege e huriki ri rata a naro hale.”

¹³Mua bara mu leho tora ni ramai a naro kamumu, e rei ge rata hale mua?

¹⁴Pali bara mu laho malamala, lakea ni vakamadihi mua vona, a Vure bara i gamai mua. I mavonga, naha ni mangenge ne ria. Naha ni loho pae.

¹⁵Pali mu togoa na hatene mua e Kristo, ia kikeri a Bakovi Dagi. Mu kisi mua, mu gu tuveve polo ne huriki ri nana mua, na ra maki mu pasimata vona.

¹⁶Na tahuna mu tuveve ne ria, mu togo ria, mu ta madoru. Mu laho malamala, i uka ma mu gu hataki manga mu tahoka a naro hale, lakea na tahuna e huriki ri padi momo tavula mua, bara ri maruhu, a vuhuna ri matai mua, mu rata a naro kamumu, a vuhuna mu rihi e Kristo.

¹⁷A koi mu gu bole a nimadihi. Pali bara mu bole, nahea mu gu bole a vuhuna mu rata a naro hale. Mu gu bole a vuhuna mu rata a naro kamumu.

¹⁸E Kristo tara i bole a nimadihi. Ia a bakovi malamala, i mate balaka taku na naro hale ne hita, ge korimule e huriki a bakovi hale. I rata mavonga, ge tuli valai hita na Vure. A kakaina ni rabalaki, pali a Vure i vakamahuri mulea.

¹⁹I vano, i vara ne huriki ri mate pali, ri made na bavi.

²⁰Ri made vonga, a vuhuna hosi i uka ma ri longo mai a ngavane Noa, na tahuna a Vure i tabana ni hatenono, na tahuna e Noa i kisi a aga rungu vona. E huriki ala popote kunana ri dili na agarungu iea. A bakovi a ngatavine ala polotolu kunana a Vure i korimule ria na marungulolo vona.

²¹A hilova tara i maea. I korimule mua. I uka ma ne vona ni vahilolo a kuline mua. E Kristo i mahuri mule na matenga, lakea i korimule mua na tahuna mu takia a Vure ge puga vuroki a naro hale ne mua. Ngane i uka ma mu gu hataki manga mu tahoka a naro hale.

²²I sike pali na hunu, i made na limana kanena Vure. I matakari e huriki a agelo, e huriki a matakari, a maka nitora ni habi na limana.