1 ጴፂሮሳ ኪታ 3:3-13

³ሂንቴ ሂንቴ ሁጲያ ኣልዖ ባን ጊጊሲያዋኒኔ ዎርቃ ዎꬂያዋን ዎይ ኣልዖ ማዩዋ ማዪያዋን ሂንቴንቱ ቦላ ባጋ ሎይꬆፒቴ።

⁴ሺን ሂንቴ ጋርሳን ቆሴቴዳ ኣሳቴꬃ ሎዖቴꬃይ ፆሳ ሲንꬃን ሂንቴንቶ ዳሮ ኣልዖ ጊዲዴ፥ ꬋዬና ኣሺኬኔ ዎፑ ጌዳ ኣያና ጊዶ።

⁵ኣዪሲ ጎፔ፥ ሄዋዳን ፆሳን ሂዶቴዳ ጌሻ ማጫ ኣሳቱ ቤኒ ዎዴ ባሬንቱ ኣሲናው ሞዴቲዴ፥ ባሬንታ ዳሮ ሎይꬄዲኖ።

⁶ሄዋዳን ሳራ ኣብራሃማ፥ «ታ ጎዳው» ያጋ ፄሳዴ፥ ኣው ኣዛዜታዱ፤ ሂንቴካ ኢቲባዉኔ ያዬናን ሎዖባ ኦꬆፔ፥ ኢ ናናቱዋ።

⁷ሄዋዳን ኣሲናቶ፥ ሂንቴ ማጫ ኣሳቱዋና ኣኬካን ኢቲፔ ዴዒቴ። ኡንቱንቶ ዳቡራንቻ ኣሳቴꬃይ ዴዒያ ዲራው፥ ኡንቱንታ ቦንቺቴ፤ ሂንቴ ዎሳይ ꬉቤቴና ማላ፥ ፆሳይ ኢሜዳ ዴዑዋ ኣꬎ ኬካቴꬃ ኡንቱንቱ ሂንቴናና ኢቲፔ ላቲኖ።

⁸ዉርሴꬃን፥ ኡባይ ኢቲ ቆፋን ዴዒቴ። ኢቱ ኢቶ ቃሬቲቴ፤ ኢሻቱዋዳን ሲቄቲቴ፤ ቃሲ ኢቱ ኢቶ ኬኪያዋንታኔ ሂንቴ ሁጲያ ካዉሺያዋንታ ጊዲቴ።

⁹ኢታ ዲራው ኢታ ዎይ ሼቃ ዲራው ሼቃ ዛሮፒቴ፤ ሄዋ ኣጊዴ፥ ፆሳይ ሂንቴንቱ ኣንጁዋ ላታናዳን ሂንቴና ፄሴዳ ዲራው፥ ኣንጂቴ።

¹⁰ኣዪሲ ጎፔ፥ ፆሳ ማፃፋይ ሃዋዳን ያጌ፤ «ዴዑዋ ዶሲያዌኔ ሎዖ ጋላሳ ቤዓናው ኮዪያዌ ኦና ጊዶፔኔ ባሬ ኢንፃርሳን ኢታባ ሃሳዪያዋኔ ዎርዱዋ ኦዲያዋ ኣጎ።

¹¹«ኢታባ ኦꬂያዋ ኣጊዴ፥ ሎዖባ ኦꬆ፤ ሳሮቴꬃካ ሎይꬂ ኮዮኔ ካላናው ባፄቶ።

¹²«ኣዪሲ ጎፔ፥ ጎዳ ኣይፊ ፂሎቱዋኮ ፄሌ፤ ቃሲ ኣ ሃይꬃይ ኡባ ዎዴ ኡንቱንቱ ዎሳው ዶያ ዴዔ። ሺን ጎዳይ ኢታባ ኦꬂያዋንታ ባሬ ሃንቁዋ ሶምዒያን ፄሌ» ያጌ።

¹³ሂንቴ ሎዖባ ኦꬃናው ኣሞቶፔ፥ ሂንቴና ቆሃናዌ ኦኔ?