1 Pita 3:3-13

³Ye kuiye gumewa yakot ene, gooru gumbe ben warene, sira wape oraiwa gaibu warene. Dividivi mame mu taibewa benawa.

⁴Megara ye daneyaba benawa gaibu ben wariya. Ye guwewa me mokonairenwa ge yaimoyai wakeiviwa auya. Me den putaipe. Me mina, inaiinai yeuma guwavewa gumbe ben wariya. Dividivi mame me garawa kokavit God namive.

⁵Watavit vesin iyakaisi mu God gumbe anoemewa wakeya, sira vesin mame me mina mumbovit ben wariya, sira memotuwa nouwa auya.

⁶Guwaguwawa me mamaib. Seira me Ebraam auwanewa me apan koka meumawa, sira noiwa aune. Ye gaibu dividivi undag a den aya, sira oraiwa ayawa, ye Seira gwaitawaiwa aya.

⁷Ebu desiroma, memetuiwa, ye yaug anoya bivituiwa mu vesin sira ye yutuipama megara mu yutuwa onan. Meve mu gaibu yaiyai wakeigimiya. Sira mu gumbo ayamat aigimiya, kuiyawa mu ano oraiwa gumbe ye gaibu inaiinai aupe. Meve nun yeuma divi da den wataipe.

⁸Ne oieba watna. Ye imuiwa desirom ape, gara wad memeyam aya, tateaiwa gumbo baigan aigimiya, mu gumbo danadawai aug, mokona aya.

⁹Bira da kukaeba guniyap apewa garawa gumbo kukaeba den aya, sira bira da yan yau yempewa ye mu yan den yawamiya. Megara waribiya muniya. God yenan auwane waribiya yentan oya.

¹⁰Kuiyawa “Bira da membovit inaiinai meuma baigan niyape sira kum meuma oraiwa autan anoiviwa, me pednawa di amarape, gae kukaeba den di wape. Sira noiwa tobotpe, ugauga den di wape.

¹¹Me kukaeba gumbe di aipe, oraiwa di ape. Yum oya yobag, amave aipe.

¹²Ayapan yangawa me iyayapan siwavitwa gumbo, sira Ayapan naunawa mu nun mumawa gumbo. Megara Ayapan ginanamiwa me kukaeba igiyawa gumbo namiwa pipau tope.”

¹³Ye kum evedni oraivit aigimiyawa, bira ye watkukamyempe. Bira da onan.