1 Pita 3:3-13

³Nofeka enaig onigwagi ka kikeafna eligim wagwagi afa lapogim kikeawagi afa engig aitiagibi ka sa suialag angwafig apuke.

⁴Afa neana suialag wag sa ma olug yi gofi. Sa ne aflafeg nihe i afa nengnag augufeg nihe i aitiagi. Eba neana suialag wag mas amtakwale. Afa enaig nihem eba naho God fwina membeg.

⁵Afa afsug angwafig autunai heafgelni onigig God nai yi fwahini enaig esenibi asa suialag angwafig apukenam ehe heafgelni alagag bugugum ahnai skaufegoni.

⁶Afa Sara enaig angwafig feg. Ehe Abrahamna mo higinam patalkunam afa ehem og ne kana saglagluwal. Afa ne atiaba suialag nihe esigbi eba ne mas embebefi eba ati ne Sarana luwal fig.

⁷Afa nengel saglag nembeafna angwafig i sa ne suialag hawag ahfe. Sa ne enaig onigifi angwafig mas wasneig mo asa ne bwata fegon. Afa God ehengelim gafa esmunagim kwaganig afa nufunam nofkenagag faife. Afa ne enaig esigbi eba mas mangwal nengelni betenim kagfoni.

⁸Afa kana mo muhla fwahagim ka ofe. Sa ne mungu onigigna augu i afa elim aflafegon afa nilitem membegoni afa elim suialafehiagi afa haig haig tonbusugim fwati.

⁹Afa el nem amtakwal fiahflaiba nofeka mungwag gwenaig esena. Afa el nem agi mo faiba nofeka mungwag gwenaig esona. Amo, sa ne Godim sahnibi God sa ma ehem suialafehiage. Afa God nem awamonagim asa ehe nem enaig mo faife.

¹⁰Afa Godna mo enaig esog; Afa amban el membeg ogna suialag augufe afa heafgelni nofkenagim sifakali. Eba ehe sa ma amtakwalig mo mi afa mwakwal mo mi fwahi.

¹¹Afa sa ehe amtakwalig nihem fwahinim afa suialag nihe la saiye afohiefi. Afa sa ma ehe enaig onigifi ka sa mingnag el i mungwal onigig ahfe afa sa ehe ena minam fwina patalfui.

¹²Afa Ainiyag suialag elim nangwaghiawagego afa ehe ehengelni sahigim higinig. Afa ehe amtakwalig elim masig fatinig.

¹³Afa sa ne sifakalna suialag nihe fefe eba amban sa nem amtakwale fetife?