1 Pita 3:3-13

³Gong mulo nuknuk kol sur a mermer ting na palaomulo larne, a iris pukulumulo, pa wakak na kabaruruan di toli ana gol, pa na wakak a kaen.

⁴Anumulo a mermer momol ning bel ir rop, ir hanot ting na balamulo, larne a wowon a toltol pa keskes na molmol. A utna ne, i itna kol namatana e God.

⁵A toltol ne, na totoh na gurara tagun nating, ning la tortorot o e God, la sira amermer la ono. La sira anatarna pas la tetek anunla na barsan,

⁶arlar o e Sara ning i longor ta e Abaram, pa i atongi anuna leklek. Pa mulo na natnat e Sara, ning mulo tol asaning i tostos, pa bel mulo matmataut.

⁷Mang otleng larning mulo na tinaulai a barsan, ana numulo a keskes a taulai, mulor mur a wakak a nuknuk tetek anumulo na gurarala pa mulor hanrawai tetek la, anasa mulo tasmani mang, a rakrakainla bel i arlar ana rakrakaimulo, pa la otleng lar kibas a lalaun ning e God ir sarani tamulo. Mulor toli larning, sur gong ta utna i sairas anumulo na nunung.

⁸Anuk na ararop a warwara tetek mulo rop larne, i wakak sur ir takai ka a nuknukimulo, pa ning ta halimulo ir kilang a mamahat, mulo otleng mulor kilangi taum onoi. Mulor mang artalai sur mulo larning mulo tas, mulor lasan ana marmaris, pa mulor anatarna pas mulo.

⁹Gong mulo keles a laulauna uting na laulau, pa gong mulo keles a laulau a warwara uting na laulau a warwara. Ika mulor atong angis la ning la tol a laulauna tetek mulo, anasa e God i kabah pas mulo sur mulor toli larne, sur ir angis mulo.

¹⁰Larning a Buk Tabu i atongi larne, “Ning tik i mang sur a wakak a lalaun, pa i mang sur ir oroi na wakak a pukakiar na gasgas, ir tai alar a pahana kusun na laulau a warwara, pa gong i asasongo.

¹¹Ir talingir kusun a laulauna pa ir tol a wakak a toltol. Ir tai sur a molmol pa ir rakrakai sur ir muri.

¹²Anasa a matana Leklek i sira tong ana tena tostosla, pa i sira longor anunla na nunung. Ika i sira saran tar a intaurna tetek la ning la tol a laulauna.”

¹³Ning mulo rakrakai sur mulor tol a wakakna, esining ir alaulau mulo? Bel tik ir alaulau mulo.