BUṮERUS ’DE/ 3:3-13

³Hili dhalku/ ki dhal miim bum mmota ji ma p̱or ma pije/ mo gom tom bum kun hidha um i is mo ka mur jin ṯo’du mo, dhali mmonyoŋ ’dolkon gana/ mo dhali hi’th burrinyem p̱o/ mo,

⁴Dhali hili dhalki a’di ta’da ciŋ kamu/ jin bagu mo jin ta’da du mo ki wosh dhel jin moli p̱u/ mo jin ta shi/in jin ’thup̱a e mo dhali jin di’d ki shwam mo, a’di jin ta yintho/ ki yintho/ mo e bwambori jis/e ma Arumgimis mo.

⁵Wakan ’thissa/ up̱ kun dhelelin mo, uni kun tan ga ’teŋ kap̱e/ eya Arumgimis mo tani nyoŋki is buni mo dhali ’dap̱ ’twa/ mo e gwo gi ikaṯẖim buni mo,

⁶me’da Saarah mmohakina a’di gwo ma Ibrahiim e mo dhali yuḵ a’di ki tap̱a mo. Dhali um shwane/ mo ta uc̱i ma yim mo waḵki/ um mini mii mii ki ’bore/ mo dhali mmodiki dhal toŋ kamu/ bway mo mmodee um is mo be.

⁷Wakan si’da/ um gwaṯẖa, ’koyi ki isi ’kom pa mo nyaḵki up̱ bum mo, mmoc̱i montaḵ goma ’bom mo me’d jin ’ka’da isa yim mo ki buŋgwar ma yim mo, haali/ um nyaḵki mal buthi mon’de/ mo ka ’the ki mondiki/e mo, ki mii gi wakan mo tani ka ’thom bum kun ’thona um mo tani minu ’koki ’taki non ’kup̱ mo be.

⁸Ḵwalany ’te/ be. Aris umi ’baar mo, tayi gi mo jin gamu gwo me’d e shi/in mo, dhali ḵoci e mo, dhali eni iwaḵ bum mo, dhali tayi ka duŋ ’ka’dga/ mo dhali bwa kun dhunu ki gwa’d mo.

⁹Dhalku/ ki raḵ tonthusi bway mo gom tonthus mo walla dhalka sor ki raḵi bway mo goma sor jin soru mo. Hili ap̱o/ mii yan ki c̱a’ckon mo tani ’boriya ’bor mii mo haali/ gom mii yan mo tani um yuḵkunu mo ki um mini ’taki bu’th mo jin ’boruwa ’bor mii mo be.

¹⁰Haali/ me’d gwo jin ’kwarkunu mo ki: A’di jin midi ’taki en mondiki/e mo dhali p̱ar ateem ’borga/ e mo tani dhalki a’di noni’da le’d piti ’peni tonthus mo dhali ’twam piti ’peni mo jin onu gwo ma maḵ mo.

¹¹Dhalki a’di ṯu’kki’d mo ’peni tonthus mo dhali mii miim ’boro’d mo dhali dhalki a’di simm moŋḵu’th is e mo dhali ur a’di isho’k mo.

¹²Haali/ e gi Tap̱a a’di di’d ap̱o/ uni gun mii miiŋḵar/e mo dhali ’cem piti ḵa’dkina a’di mo gom mon’thom buni mo be. Hili bwam/e gi Tap̱a diki’da p̱o/ uni gun miiki tonthus mo.

¹³Dhali kaja di’di mmoshi/ um mo waḵki/ um shwana miiŋ gana/ anyor ki thiṯẖ mo?