1 Piyeer 3:3-13

³Kanuura ki nan kawutan kawo ki bdig – ki pşiiran, ki ptanara uwuuru, ki imişa inuura –

⁴kaţëpan ţëp kawo kammeniiŋ ki uhaaşan, kanuura kanwooŋ kaankba ki uhaaş unţooriiŋ, kuŋ mënţan kaliluŋ maakan Naşibaţi.

⁵Hënk di baaţ bayimanaan biki ţfa banţuuŋ mnhaţ mi baka ţi Naşibaţi bajaaŋ bañëga. Babi ji baŧiink bayin baka,

⁶jibi *Ŧaara abiiŋ aŧiink *Abraham ayinul kadoo kadu'a ajugul. An, nawo hënkuŋ babukul, woli nado bnuura bë naanklënk nin uko uloŋ.

⁷An biinţ kak nawoon na baharan bnuura, name kë bañeeñëţi. Namëbaan baka bnuura, wi bawooŋ i kayeenk na an uţen wi ubida unwoonuŋ du Naşibaţi. Hënk, nin uko uloŋ uunkneenanan pñehan Naşibaţi.

⁸Hënkuŋ dŋal kabaañşaan kajakan an bŧi nawo ţi uşal uloolan, naboofar, naŋalad ji banţaaruŋ, najoob bkow nabot nawalan ikowan.

⁹Woli badolan buţaan, nawutan kalukan ; woli bakaran, nawutan kalukan. Naţëpan ţëp nañehan Naşibaţi awul baka bnuura ; ul aţu'anaŋ pdo haŋ nahilna nayeenk bnuura bi ahoŋuŋ.

¹⁰Hënk di di upiiŧaniiŋ ţi *Ulibra wi nul, aji : Ñaaŋ anŋaluŋ kaka ubida ulil kawo na mnlilan, awo kalowan buţaan ţi mntum kalowan kaguuru ţi pndemënt ;

¹¹alowan buţaan ado kado bnuura, adoon kala mnjeeh ataman ţi pţaş ma.

¹²Ajugun aji ţu këş ţi banwooŋ baŧool, kawat kabaţ ţi pñehan pi baka aşë ji pok banjaaŋ bado buţaan.

¹³Woli naţu uhaaşan bŧi ţi pdo bnuura, in akdolanaŋ keeri buţaan?