1 Pita 3:3-13

³Am rau mene nnangaili tani amolumolu vilikiimim va emasinaaili taataraane, nongina am gheelei tale uu nguruimim, me nongina asease vurra atoa am aamolumolu vilikiimim, me tale masi ghinna atoa am aasaela,

⁴ta am anna tani amolumoluem, ghele masina arova am ghele amolumolu elome etaimim tale uunguaa niaimasiaa me nisioaa nannaa, poli isaa o ase niuungu masinaaili ta matane God me karika aue ekapa.

⁵Tale isaa o salana, emua arau vause atoa manga ila laghe gheelei emasinaaili taataraira. Laghe aatoka tuutuliira ta God, me laghe aaimuli usi tee saa voto taitaniira atoa laghe aauliaa.

⁶Nim nongina Sera ghe nongo usilaala taitanna ateva ta Abraham, me ghe kolokoloa va vauna ia. Am tee aue natuna vause iem arova am gheelei voto masina, me karika aue am matauta saa voto pei nimatauta.

⁷Tale ia o salana atikirighi, am taita atoa lailai iem, am tani oneoneaa vauseniim atoa. Am ghelei emasina ta ngetaira nau am tokatoka aitauaa, poli sarasarakaniaaimim elaulau sarasarakaniaaira, me poli amalua aitauaa, amalu ghaaghaa maulue ta God, arova ughelei emasina etana, karika teva voto aue eghelei runga kalum nilooloo sae.

⁸Tani ruu, am akapaaili gheegheleiaaimim me ateateaaimim ekateva nonga ia. Am aielousi nongina va tue me nenga atoa, me am annaa mene katoa me am sioaa nannaaimim tee kateva kateva etaimim.

⁹Am rau mene liu sesa tale sesa voto o inangari nilakolako tale inangari nilakolako; ta am liu tale niarangise, poli God ghe koloamla tani ghelei isaa o voto, me aue am ghaa niarangise.

¹⁰Poli Uru ngai Manga ateva eue va, “Marova lo ateva taumattu ealoanna va maamauluaane emasina me etoka liu, etani aitaraa ramuramuti paana ateva tale sesa voto me tee musiki paane tale inangari kamena.

¹¹Me etani oghi vulu sesa voto me eghelei masina; euungu aanasa tani atoka luei me esarasarakana tani toka tale luei.

¹²Poli matane Vau eteva eaatoka ta ghulughuluena atoa taumattu me talingane enongonongola nau la looloo sae, me eliuliu vilina ta lo atoa la gheelei sesa voto.”

¹³See aue ealoanna tani avakovakoam marova am annaaili tani ghelei masi voto?