1 סלוניס 3

1

2

3

4

5

¹ועל כן לא יכלנו עוד להתאפק ונועץ להותר לבדנו באתינס׃

²ונשלח את טימותיוס אחינו ומשרת האלהים ועזרנו בבשורת המשיח לחזק ולהזהיר אתכם על דבר אמונתכם׃

³שלא ימוט איש במצוקות האלה כי ידעתם אף אתם כי לזאת יעדנו׃

⁴הלא כבד אמרנו אליכם בהיותנו אצלכם כי עתידים אנחנו להלחץ כאשר גם היה ואתם ידעתם׃

⁵ובעבור כן לא יכלתי עוד להתאפק ואשלח לדעת אמונתכם כי אמרתי פן נסה אתכם המנסה והיתה לריק יגיעתנו׃

⁶ועתה כשוב אלינו טימותיוס מאתכם ויבשר אתנו את בשורת אמונתכם ואהבתכם ואת אשר אתם זכרים אתנו לטובה בכל עת ונכספים לראות אתנו כאשר גם אנחנו נכספים לכם׃

⁷אז נחמנו עליכם אחי בכל צרתנו ולחצנו על ידי אמונתכם׃

⁸כי עתה נחיה אם תעמדו אתם באדנינו׃

⁹כי מה נשיב לאלהים להודות לו בעבורכם על כל השמחה אשר שמחנו עליכם לפני אלהינו׃

¹⁰לילה ויומם מפילים אנחנו תחנתנו לראות את פניכם ולהשלים את מחסרי אמונתכם׃

¹¹והוא האלהים אבינו ואדנינו ישוע המשיח יישר את דרכנו אליכם׃

¹²ואתכם ירבה ויותיר האדון לאהבה איש את רעהו ולאהבה כל אדם כאשר גם אנחנו אהבים אתכם׃

¹³ויכונן את לבבכם להיות תמים בקדשה לפני אלהינו אבינו בבוא ישוע המשיח אדנינו עם כל קדשיו׃