1Te dago dage ma suainogo hauwa sogo tonaluama, tama dago te homu yai, da nosali ma tonalugobeo. Pol me Sailas da si naga te Atens hanude bidaibao homu yai.
2Tama te homu elama, da sigo dago ama Timoti dage bidibo digiba tagala palai. Timoti aga te Godigo sę ebo bidi dao. Aga te Jisas Kraisde po pusubo bidi dao. Da sigo Timoti dage pageba tagala palai, tama agai dage bomo mayu, tama dagego Kraisde konealubo po dąų walomainogo, tama augwaligo dage dene mobaso da, dage meba bidi te Jisasgo po tagalidali weyu yai. God aga digi da te dene dali sęgę dali te somainogo, agai da te bodolu mawai.
4Awe, polobadu da dage dali bidibadi, te dene dage pageba asisąbadi, tama dago te po dage dali odu geai, “Nosali da dene saibao,” wai. Tama te po wali gilama tama tiwai, tama dagego sulama koneai dao.
5Tama te dene dage pageba asali baso, tama eno ma tonaluyu gesege ma egobeo homu eyu, eno bidi me deli dageba tagala palai. Te eno dagego Kraisde konealubo po me dąų wabowe, te eno koneainogo te bidi tagala palai. Te dwai sę ebo tomoba kegebo dwai mobo tuni bidi agai dage dali te sę yaliwe eno te homu yali. Agai te sę dage dali egi sogo da, tama dago dage dali yali sę olo dali eyu, te nai walosiąwai sę egi da.
6Te da dagede moni homu te tiwai eyu bidali. Tiali goli, Timoti aga dage pageba sabolama, tama dage dali osogo bidiyu, tama agai dage tagasu, megi tama aga da bidibo digi ma asai. Tama aselama, agai dwagi yai po da dali pusai. Dwagi yai po pusuyu, agai te po wai, “Te Tesalonaika dabe augwaligo Godide konealubo po bugagia dąų waliyu bidibo dao. Augwaligo augwa hasi godolo mu eyu bidibo dao,” te po wai. Me agai te po wai, sesemane sogo dagego da dage dali bidali sogo homugo ma koneyu, tama dagego da dali dwagi yai homu ebo dao. Tama dagego da suabo homu bomo mu dali elama bidai, te dago dage suainogo ebo homu tiwai dagego me te homu ebo po Timoti agai da sibolo tamadi pusai, megi tama.
7Dago abagi dede, gasa bidi augwaligo dabolo sęgę dali dene si mayu, tama da isabo tiwai yai dao. Tiali goli, Timoti agai po dabolo pusubaso, tama dago konebao, dagego Godide konealubo po me dąų wabo dao. Tama tibaso, da bomo ma selama, bugagia bidibao.
8Magi baso menio. Dage Genuai Bidi agai bomode bomo elama, tama aga dali bugagia wadoloyu ebaso, teda te tebogo dago sęgę dali dene dali si aiyaba elaluali. Tama elama, da moni dwagi yai homu elama, da bugagia bidibao.
9Tama tibaso, dagego te dwagi yai sę ebo po odolama, tama God agai da dali te dwagi yai homu kolesaga mabo te sęde tama magi ilama dago agabolo te nage usu da po weyu, tiwai si yaibawe? Woo, da usu egobeo. Agai dabolo yali dwagi yai sę, te sęgo dago usu da po wabo sę aiyaba mu elalubo dao.
10Tama hauwa sogo mu dago giligade me, hulide me God dali hanalu wabo po wabo dao, te da dage pageba aselama, dage pagia sainogo. Tama dagego God dali duga homu tigidali mubo sę dwasianu habuge eyu da, te dago ma pągąnainogo dage tau siyu, te po wabo dao.
11Tama dago homugo dago Aya God, aga digi, te dago Genuai Bidi Jisas augwali sigo da dage pageba pabo tų damainogo, dago te po olama, gedu haluasa augwali sibolo hanalobo dao.
12Tama dagede, dago homugo Genuai Bidi agai te dagego duga hasi godolo mu ebo sę genuai mu ilimainogo dago hanalobo po wabo dao. Tama me agai dagego te gasa we bidi tigidali augwali dali godolo mu ebo sę genuai mu eyu pągąna palomainogo dago hanalobo dao. Tama te dago dage dali godolo ebo sę gilama dagego te tiwai emainogo dago Genuai Bidi hanalobo po wabo dao.
13Tama te Genuai Bidi agai dage te we bidi dali godolo mu ebo sęde dąų omainogo, dago aga dali te hanalobo po wabo dao. Tama agai tama tilama, tama nosali dago Genuai Bidi Jisas aga doloba mu pai we bidi tigidali aga dali e tǫba ma asobo sogo, te dage me te sogo Godigo doloba mu pai we bidi dago Aya God agai gesabidide bidimainogo, tama dago te Genuai Bidi dali te po hanalobo dao.
