1Kũ ódi fↄ̃ ò mɛna doro, o zɛo ò gↄ̃ Atɛni ó tɛ̃nɛ,
2o ó gbɛ̃ndo Timↄti, Luda zĩkɛri dake Kirisi baarunnakpanaa gũn zĩ̀áwa, de à á gba gbãna à á nɛ̀sɛ kpátɛárɛ á ludanaanikɛnaa gũn,
3de á gbɛ̃ke laakari sún futɛ wɛ́tãmmanaa pì yãiro. Á dↄ̃ kũ á zĩdao kũ Luda abire taka dìtɛwɛrɛ.
4Gↄrↄ kũ ó kú á kĩnaa, o gĩnakɛ o òárɛ kũ oni wɛ́ tãwá, akũ à kɛ̀ lɛ lákũ á dↄ̃ nà.
5Abire yãi kũ mani fↄ̃ mà mɛna doro, ma a zĩ̀ à á ludanaanikɛna gwa. Ke Ibilisi á yↄ̃ à á gwá, ó zĩ kɛ̀ pãn yá, ó dↄ̃ro.
6Kũ Timↄti sù sà, à á ludanaanikɛna kũ á yenyĩo baaruu kpàwɛrɛ. À pì ó yã dìgↄ̃ dↄágu kũ laasun manao, akũsↄ̃ átɛni ó bɛgɛ kɛ lákũ ótɛni á bɛgɛ kɛ nà.
7Ma gbɛ̃nↄ, á ludanaanikɛna yã mɛ́ à tò ó laakari kpatɛna á yã musu ó wɛ́tãmmana kũ ó wario gũn pínki.
8Zaakũ á zɛna gíngin Dikiri gũn, tera o ĩam pà sà.
9Óni fↄ̃ ò Luda sáabu kpá á yã musu. O ó Luda sáabu kpà manamana kũ pↄnna zↄ̃kↄ̃ kũ odì kɛ a arɛ á yãiio.
10Gwãani kũ fãnantɛ̃o odìgↄ̃ wɛ́ kɛ manamana, de ò le ò wɛ́ sikↄ̃lɛ, ò pↄ́ kũ à kĩ̀a á ludanaanikɛnaa gũn papaárɛ.
11Luda ó De kũ ó Dikiri Yesuo zɛ́ porowɛrɛ ò su ò á gwa.
12Dikiri yenyĩ kũ á vĩ kũ kↄ̃o kũ gbɛ̃ sĩnda pínkio karaárɛ, à dadaála lán yenyĩ kũ ó vĩ kãáo bà,
13à á swɛ̃̀ gba gbãna de àgↄ̃ kun gbãsĩ sari taarisaridenↄ ũ Luda ó De arɛ ó Dikiri Yesu kũ a gbɛ̃nↄ pínki sugↄrↄa.
