Epístola 1 a los Tesalonicenses 3

1

2

3

4

5

¹Nuaduí atumin kajimatmainchau dekapeau asan Atenas wiki juwakun,

²iina yachi Timoteon awemabiajai, Apajuí takagku Kristu pachisa etsegbaunum yaimna nuna, atum Kristui kajintsá anentaimjum nunash, ni chichagtamak nuní nagkaemas ichichtamjatnume,

³makichkitigmekesh waitiakjum Kristu nemajut idaisaijum tau asan. Atumshakam dekagme jutiik aaja waitmainaitag duka.

⁴Nuigtushkam wi atumjai pujusan emtiksan ujayajime, jutiik waitiamu igkugtin ainaji tusan, duka nunisag nagkaetamjume yamai wainjum nunú.

⁵Nuaduí atumin kajimatmainchau dekapeau asan, ii takasbau wainak megkaekai tusan, Timoteon awetibiajime. Nunak atumin kuashat puyatjakun, Jisukristui kajintsá anentaimtan, iwanch pegkegchau takamtikainam idaisainum tusan dutikabiajai.

⁶Tujash Timoteo atumiin pujau jutiiní taa ujapakji chicham shiig pegkejan, atum Kristui kajintsá anentaimkujum aneniamugmin. Nuigtushkam ujapakmae, atumesh jutii shiig anenkagtusjum waijatkatasajum wakegainamunash, jutii atum wainkatasa wakegag nunisjumek, atumesh jutiijai ijunjatasajum anentaimjum nunashkam.

⁷Yatsug aidauh, ubag aidauh, nuna antukan kuashat utugchatnum waitiaku pujamun ichichmamjamjai, atum Kristui kajintsá anentaibauk nunisjumek batsatjum nuaduí.

⁸Atum Kristu nemagkujum shiig emetmamjajum batsatbaun antukan ichichmamjamjai.

⁹Nunikan shiig senchi shiig aneamug ajutui Apajuí emtinish, nuniakun Apajuinashkam imatiksanuk see tajai, atumin pachisan.

¹⁰Tsawai kashijai Apajuin tuke augjai, atumiin taan wainkata tabaujun pachisan, nunikan atum imanisa kajintsá anentaimainchau dekapeamu ajutjamkujaish shiig jintintuatasan.

¹¹Ii Apají Apajuiya nu, Apu Jisukristujai jutiinash yaimpakagti atumiin minimaina nunash.

¹²Ii Apujiya nunú sujamsatnume, ashí tikich aidaujaish pempeentuniki aneenita nuna, jutii atum aneajim aikasag.

¹³Apajuiya duke atumi anentaimnash ichichtugmagtinme, aan nagkaemasa kajintsá anentaimkujum, Apu Jisus niina aentsji pegkejam aidaujai minakuish, iina Apají Apajuiya nuna emtinish bakumamainchau wantinkamnujum tusan.