1Misak ni, melele xa nenexoen ve xamim mei texeih pupu e xametel, mattenemi mattehit bos tengan inou xamel Saelas malitit e taon te hal Atens,
2e matesil Timoti tehat visal xamim tengan vatutou ni xamim e vasak ni neketen namim mei vaxeih mu. Xi be tua namel xa di pol vituei del xamel e polien na Hi xa di matbithiten longeongen hos usil Iesu Kristo mi moletin xil.
3Xamel matesila tehat visal xamim tengan vasak ni xamim munamot ti e neketen namim ve sakpurunien xil xa di bemei mi xamim. Reitin, xamim mukila xa Hi teling xati tengan ti rihur sakpurunien xil ak e meulien nar.
4Vengan melele xa matteti tamu visal xamim, mattehit kila mi xamim xa ti rihur sakpurunien xil. E nggoni ngan xa mukila ngamu, holesok xil vus xa testal tehusil naha xa mattehiteni.
5Ma melele xa natnahur ti mu longeongen tova, natenexo pupu ve xamim. Ma natesil Timoti tehat tengan vakil ti xa neketen namim da midep. !Uluk tekan xa Temat xa di misak pis moletin xil nasak pis xamim tengan munahe reling suse xa momal e napol ni polien nametel mei nahe neta sav tang!
6Ma Timoti xa tehat visal xamim, xosali, dilomun bemei visal xamel. E xi nggur longeongen hos bemei visal xamel usil neketen e eheien namim. Xi biteni mi xamel bit, vehakut, di munem kuh xametel, e iemim bei tengan mupus ti xametel nggoni ngan taxa iemetel bei pupu tengan matopus ti xamim mun.
7Ma, tuxoli e hinoxoli nametel xil, tave ti neta xa di matnggur longpangasien e sakpurunien xil holu, longeongen ak usil neketen namim di pet rat nenemien nametel holu.
8Reitin, melele xa matlongeong ni xa di tamu musoh nggeih e neketen namim e Suv Iesu, matlonge bos rilomun e meulien nametel.
9Xametel matsakras matomes Hi vapin ve rin namim, e matopolu ni sien xa eilep pupu pe meten ve xamim.
10Melengien xil e vongien xil, di matsis nggeih mi Hi tengan vamaen xametel matohat matopus rilomun ni valnaomim e matosa ti pispisien xil mi xamim xa mutnahuri ti mu tengan vatutou ni neketen namim.
11Matsis tengan Hi Tamer e Iesu, Suv nar, lalisak mesen suse nametel tengan matilomun matihat visal xamim.
12Matsis tengan Suv Iesu isak ni eheien xa di mupisen ni mi xamim mun mei imatu e ihe eilep mak mu ixoni hisit sexien xa eheien nametel di pupu e xamim.
13E matsis mun tengan isak ni nenemien namim mei ixeih tengan muhe eo e mumese pe met Hi Tamer melele xa Iesu, Suv nar, imei rilomun en itel moletin nan xil.
