1Tenge dokonya minao naimame kuki mende kapa pao malisala naenya Atenesa yuu ongonya akali lapoma iki katapenge jianya, Silipenasa nalimba iki katambana lao masetala nalimbame naimanya kaiminingi Timoti baame Kataisanya Wai Pii Epe doko endakali dupa lamaiyoo, Gotenya kalai awapa pyoo katenge doko nyakama kateamino ongonya epena leamba. Baame nyakama minao kyoto injisetala nyakamanya masoo miningi doko nisetamopa lao nalimbame baa epena leamba.
3Nyakama tanda nao kalyamino dokonya nyakamanya endakali mendaipi mendeme aopyoo latala paka kayatamini lao dopa piamba. Doko, naima tanda nao katapenge doko nyakama tangeme masilyamino.
4Ongonya naima nyakama-pipa awapa kateamano dokopa naima tanda natamana lao nyakama wambao langiama. Langiamanoli pyoo angi jiamo doko nyakamame masilyamino.
5Tenge ongonya minao nambame kuki mende kapa pao malisala nayao nyakamame aipa pyoo masoo minao kalyamipi lao kanjanya Timoti epena leo. Makande pingi dokome aopyoo latala nyakama makande pitamopa naimanya kalai lekeleke tao piamano doko mee jetame lao epena leo.
6Dopana, Timoti doko nyakama kalyamino ongonya katao naima kalyamano dakenya epapu ipupala nyakamame Gote lao masoo minao endakali dupa auu kaelyaminona lao atome doko baame naima langitilyamo. Nyakamame koteaka lao naima lao masoo mona epe palyetala naimame nyakama kandapuma laka lao masilyamanoli pyoo, nyakamame naima kandapuma laka lao masilyaminona lao baame naima langilyamoaka.
7Ongonya kaimia paluma, nyakama Gote lao masoo minao katapimino dokome naima tanda nao kenda pipae nyoo katapumano dupa pitakanya mona epe palisilyamo.
8Nyakamame Kamongo doko pupu lao minao payapimino kandatala naima indupa kalyakao kalyamano.
9Nyakama mambele naima Gotenya enombasa etete mona yaepao kalyamano. Dopana, naimame nyakama kandao kapa pao Gote lao eteteaka yaka pilino lelyamano.
10Masoo miningi mende daa jilyape lao nyakama enomba kandao kapa pisemana latala kuka kotakapi naimame lomaka singi.
11Naimanya Gote-kisa Takange doko tangepa naimanya Kamongo Jisasa dokopame naima laminao nyakama kalyamino dokonya epena.
12Naimame nyakama auu kaengeli pyoo nyakamame nyakama tangelapopi dee endakali dupa pitakapi auu kaenge doko Kamongo dokome andao andake injisekena.
13Dopa pyoo pituu, baame nyakamanya mona doko pupu lasekena. Tenda naimanya Kamongo Jisasa baanya endakali etete epe dupa pitaka-pipa dee ipatamo dokopa, naimanya Gote-kisa Takange dokonya enombasa nyakama-kisa koo nasingi etete epe katatami.
