ኤፌሶና 3

1

2

3

4

5

6

¹ሄሳ ጊሾ፥ ታኒ፥ ጳዉሎሲ፥ ኣይሁዴ ጊዶና ሂንቴ ጊሾ ኪሪስቶስ ዬሱሳን ቃሾ ኣሲ ጊዳስ።

²ታ ሂንቴና ማዳና ሜላ ፆሳይ ባ ኣꬎ ኬሃቴꬃን ታው ኢሚዳ ሃ ኦሱዋባ ሂንቴ ሎይꬂ ሲዒዴታ።

³ታ ሂንቴው ካሴ ቃንꬃን ፃፊዳይሳዳ ፆሳይ ባ ፁራ ቆንጬꬃን ታው ቆንጪሲስ።

⁴ታ ፃፊዳይሳ ሂንቴ ናባቢያ ዎዴ ኪሪስቶሳ ፁራ ታ ኣይ ሜላ ኤሪዳኮ ሂንቴ ኣኬካናው ዳንዳዔታ።

⁵ሃ ፁራይ ጌሻ ሃዋሬታሲኔ ናቤታስ ሃዒ ኣያና ባጋራ ቆንጪዳይሳዳ ቤኒ ዎዴ ኣሳስ ሄሳዳ ቆንጪሲቤና።

⁶ፁራይ ሃይሳ፡ ኣይሁዴ ጊዶና ኣሳይ ዎንጌላ ባጋራ ኢስራዔሌታራ ኢሲፌ ፆሳ ኣንጁዋ ላቶሶና። ኢስራዔሌታራ ኢሲ ኬꬃ ኣሲ ጊዶሶና፤ ኪሪስቶስ ዬሱሳ ባጋራ ፆሳ ኡፋይሳ ቃላ ኤኮሶና።

⁷ፆሳይ ባ ኦꬂያ ዎልቃ ባጋራ ታው ኢሚዳ ኣꬎ ኬሃቴꬃን ሃ ዎንጌላስ ኦሳንቾ ጊዳስ።

⁸ታኒ ጌሻታ ኡባፌ ላፋ ጊዲኮካ ኣይሁዴ ጊዶና ኣሳስ ዛዊ ባይና ኪሪስቶሳ ዱሬቴꬃ ዎንጌላ ኦዳና ሜላ ሃ ኣꬎ ኬሃቴꬃይ ታው ኢሜቲስ።

⁹ቃሲ ካሴ ዎዲያን ኡባ ሜꬊዳ ፆሳን ቆሴቲዲ ዴዒያ ፁራስ፥ ፆሳ ቆፋይ ኣይቤኮ ቆንጪሳናው ኣꬎ ኬሃቴꬃይ ታው ኢሜቲስ።

¹⁰ፆሳይ ሄሳ ኦꬂዳይ ሃዒ ዎዲያን ዎሳ ኬꬃ ባጋራ ሳሎ ሶሁዋን ዴዒያ ሃላቃታሲኔ ሃሬይሳታስ ባ ዱማ ዱማ ቆንጬꬃ ኤሪሳናሳ።

¹¹ፆሳይ ባ ሜሪና ቆፋ ኑ ጎዳ ኪሪስቶስ ዬሱሳ ባጋራ ፖላናው ሄሳ ኦꬂስ።

¹²ኑ ኣማኖን ያሺ ባይና ፆሳኮ ሺቃና ሜላ ኪሪስቶሲ ኑስ ሚኖቴꬂኔ ላዓቴꬂ ኢሚስ።

¹³ታኒ ሂንቴ ጊሾ ዋዬ ኤኪያ ጊሾ ሂንቴ ታ ዋያን ዬላቶናዳ ሂንቴና ዎሳይስ፤ ታኒ ሂንቴ ቦንቹዋስ ዋዬታይስ።

¹⁴ታኒ ኣዋ ሲንꬃን ጉልባታዳ ዎሴይ ሄሳ ጊሾሳ።

¹⁵ሳሎኒኔ ሳዓን ዴዒያ ኢሲ ኢሲ ሶ ኣሳይ ኢያን ሱንꬄቴስ።

¹⁶ፆሳይ ባ ቦንቾ ዱሬቴꬃፌ ሂንቴ ጋርሳ ኣሳቴꬃ ሚንꬂያ ዎልቃ ባ ኣያና ባጋራ ኢማና ሜላ ሂንቴው ዎሳይስ።

¹⁷ቃሲ ኣማኖን ኪሪስቶሲ ሂንቴ ዎዛናን ዳና ሜላኔ ሂንቴ ሲቆን ፃጶ ዬዲዲ ሚኒዲ ዳና ሜላ ዎሳይስ።

¹⁸ሄሳዳካ፥ ኪሪስቶሳ ሲቆይ ኣይ ሜላ ዳልጌኮ፥ ኣዱሴኮ፥ ꬎቄኮኔ ጪሞኮ ጌሻታ ኡባራ ኤሪያ ዎልቃ ሂንቴ ኣኬካና ሜላ ዎሳይስ።

¹⁹ኤራቴꬃፌ ኣꬊያ ኪሪስቶሳ ሲቁዋ ሂንቴ ኤራና ሜላ ቃሲ ዴዖ ኢሚያ ፆሳ ዎልቃን ሂንቴ ኩማና ሜላ ታ ዎሳይስ።

²⁰ሂዛ፥ ኑ ጊዶን ኦꬂያ ባ ዎልቃ ባጋራ ኑኒ ዎሴይሳፌ ዎይኮ ቆፔይሳፌ ኣꬂዲ ኦꬃናው ዳንዳዒያ ፆሳስ፥

²¹ዎሳ ኬꬃኒኔ ኪሪስቶስ ዬሱሳን ዎዴ ኡባን ሜሪናፔ ሜሪና ጋካናው ቦንቾይ ጊዶ። ኣሚንዒ።