ኤፌሶና 2

1

2

3

4

5

6

¹ሃይሳፌ ካሴ ሂንቴ፥ ሂንቴ ናጋራኔ ሂንቴ ቆሁዋ ጋሶን ሃይቂዳይሳታ።

²ሄ ዎዴ ሂንቴ ሃ ኣላሚያ ኢታ ኦጊያ ካሊዴታ። ጫርኩዋ ቦላ ዴዒያ ኣያና ዎልቃታ ሃላቃሲኔ ሃዒካ ፆሳስ ኪቴቶና ኣሳ ሃሪያ ኣያናስ ኪቴቲዴታ።

³ኑ ኡባይካ ካሴ ሄ ኣሳታ ጊዶን ኑ ኣሾ ኣሙዋኔ ኑ ዎዛና ሼኒያ ካሊዲ ዴዒዳ። ኑካ ሃራታ ሜላ ኑ ሜꬌቴꬃን ፆሳ ሃንቁዋ ኤካናው ዴዔይሳታ።

⁴ሺን ፆሳ ጊታ ማሮቴꬃፌኔ ኑስ ዴዒያ ጊታ ሲቁዋፔ ዴንዲዳይሳን፥

⁵ሃሪ ኣቶሺን ኑኒ ኑ ቆሁዋን ሃይቂዲ ዴዒሺን ኪሪስቶሳ ባጋራ ኑስ ዴዖ ኢሚስ። ሂንቴካ ኣቲዳይ ፆሳ ኣꬎ ኬሃቴꬃና።

⁶ፆሳይ ኑና ኪሪስቶሳራ ኢሲፌ ሃይቆፔ ዴንꬂዲ ሳሎ ሶሁዋን ኢያራ ኢሲፌ ዎꬂስ።

⁷ኢ ሄሳ ኦꬂዳይ፥ ኪሪስቶስ ዬሱሳ ባጋራ ኑስ ቆንጪሲዳ ባ ኬሃቴꬃኔ ዛዊ ባይና ባ ኣꬎ ኬሃቴꬃ ዱሬቴꬃ ያና ላይꬃን ኑና ቤሳናሳ።

⁸ሂንቴ ኣꬎ ኬሃቴꬃን ኣማኖን ኣቲዴታ። ሄሲካ፥ ፆሳ ኢሞታፔ ኣቲን ሂንቴ ኦሶን ቤንቲዳባ ጊዴና።

⁹ኦኒካ ጬቄቶና ሜላ ኣቶቴꬃይ ቤንቲዳይ ኦሶን ጊዴና።

¹⁰ኑኒ ፆሳ ሜꬌቴꬂ፤ ኢ ኑስ ካሴቲዲ ጊጊሲ ዎꬂዳ ሎዖ ኦሶታ ኦꬃና ሜላ ኪሪስቶስ ዬሱሳ ባጋራ ኦራꬂ ሜꬌቲዳ።

¹¹ሄሳ ጊሾ፥ ሂንቴኖ ዬሌታን ኣይሁዴ ጊዶናይሳቶ፥ ኣይሁዴቲ ባንታው ኣሳ ኩሼን ቃፃሬቲዲ፥ ሂንቴና ቃሲ ቃፃሬቲቦናይሳታ ጊዲ ፄጌይሳ ኣኬኪቴ።

¹²ሄ ዎዴ ሂንቴ ኪሪስቶሳፔ ሻኬቲ ዴዒዳይሳ፥ ኢስራዔሌ ኣሳስ ኣላጋ ጊዲዲ ዴዒዳይሳ፥ ፆሳ ኡፋይሳ ቃላፔ ሃኪዲ ዴዒዳይሳኔ ሃ ኣላሚያን ኡፋይሲኔ ፆሲ ባይና ዴዒዳይሳ ኣኬኪቴ።

¹³ሺን ሂንቴ ካሴ ሃኪዲ ዴዒዳይሳቲ፥ ሃዒ ኪሪስቶስ ዬሱሳን ዴዒዲ ኪሪስቶሳ ሱꬃን ማታ ሺቂዴታ።

¹⁴ኪሪስቶሲ ኑ ሳሮቴꬃ፤ ኢ ኣይሁዴኔ ኣይሁዴ ጊዶና ኣሳ ቲሚዲ፥ ናምዓ ሻኪ ዎꬂዳ ሞርኬቴꬃ ጎዳ ላሊስ።

¹⁵ኢ ባናን ሃ ናምዑ ዛሬታፔ ኢሲ ኦራꬃ ኣሴ ሜꬊዲ፥ ሂጊያ ኢያ ኪታራኔ ዎጋታራ ኢሲፌ ባ ኣሳቴꬃን ꬋይሲዲ ሳሮቴꬂ ኢሚስ።

¹⁶ኪሪስቶሲ ማስቃሊያ ቦላ ሃይቂዲ ሞርኬቴꬃ ꬋይሲስ፤ ቃሲ ናምዑ ዛሬታ ኢሲ ኣሳቴꬂ ኦꬂዲ ፆሳራ ሲጌꬂስ።

¹⁷ኪሪስቶሲ ዪዲ፥ ፆሳፌ ሃኪዲ ዴዒያ ሂንቴው፥ ቃሲ ማቲዲ ዴዒያ ኤንታው ሳሮቴꬃ ዎንጌላ ኦዲስ።

¹⁸ኑ ኡባይ ኢያ ባጋራ ኢሲ ኣያናን ኣዋ ሲንꬄ ሺቃናው ዳንዳዖስ።

¹⁹ሂዛፔ ሂንቴ ኣላጋ ዎይኮ ኢማꬄ ጊዴኬታ፥ ሺን ሂንቴ ሃዒ ጌሻታ ቢታ ኣሲኔ ፆሳ ሶ ኣሲ።

²⁰ሂንቴ ሃዋሬቲኔ ናቤቲ ባሲዳ ባሱዋ ቦላ ኬፄቲዴታ። ጎዳ ፃጱዋ ሚንꬂያ ሹቻይ ኪሪስቶስ ዬሱሳ።

²¹ኢያን ኬꬃ ኡባይ ኢሲፌ ኦይኬቲዲ ጎዳን ጌሻ ፆሳ ኬꬂ ጊዳናው ዲጬስ።

²²ሂንቴ ቃሲ ፆሳይ ባ ኣያናን ዴዒያ ኬꬂ ጊዳናው ኪሪስቶሳን ኢሲፌ ኬፄቴታ።