ኤፌሶና 3

1

2

3

4

5

6

¹ሄዋ ዲራው፥ ሂንቴኖ ኣዪሁዳ ጊዴና ኣሳቶ፥ ታኒ ጳዉሎሲ ሂንቴ ዲራው ኪሪስቶሲ ዬሱሳ ቃሾ ኣሳ ጊዴዳዌ፥ ፆሳ ዎሳይ።

²ፆሳይ ባሬ ኣꬎ ኬካቴꬃን፥ ታኒ ሂንቴና ማዳናዳን፥ ሃ ኦሱዋ ታው ኢሜዳዋ ሂንቴ ሎይꬂ ሲሴዲታ።

³ፆሳይ ባሬ ፁራ ቆፋ ታው ቆንጪሲዴ፥ ታና ኤሪሴዳ፤ ታኒ ሄዋ ቃንꬃን ፃፋዲ።

⁴ቃሲ ታኒ ፃፌዳዋ ሂንቴ ናባቢያ ዎዴ፥ ኪሪስቶሳ ፁራ ታኒ ዎታ ኣኬካዲታንቶኔ ኤራናው ዳንዳዪታ።

⁵ቤኒ ዎዴ ኣሳይ ሄ ፁራ ዬዉዋ ሲሲቤና፤ ሺን ፆሳይ ሄዋ ዬሱሲ ኪቴዳ ፆሳ ናናቶኔ ቲምቢቲያ ኦዲያዋንቶ፥ ጌሻ ኣያናን ሃዒ ቆንጪሴዳ።

⁶ፁራ ዬዉ ሃዋ፤ ኣዪሁዳ ጊዴና ኣሳይ ዎንጋላ ባጋና፥ ፆሳ ኣንጁዋ ኣዪሁዳቱዋና ኢቲፔ ላቲኖ፤ ኡንቱንቱ ኢቲ ኣሳቴꬃን ሻኬቴናን ዴዒኖ፤ ቃሲ ኪሪስቶሲ ዬሱሳ ባጋና ፆሳይ ኢማና ጌዳዋ ኣዪሁዳቱዋና ሻኪኖ።

⁷ፆሳይ ባሬ ኦሱዋ ዎልቃ ባጋና ታው ኢሜዳ ኣꬎ ኬካቴꬃን ታኒ ሃ ዎንጋላው ቆማ ጊዳዲ።

⁸ታኒ ጌሻቱዋ ኡባ ጊዶን ላፊያዋ ጊዶፔካ፥ ኣዪሁዳ ጊዴና ኣሳው ዛዋይ ባዪና ኪሪስቶሳ ዱሬቴꬃ ሚሺራቹዋ ቃላ ኦዲያ ሃ ቃዳ ፆሳይ ታው ኢሜዳ።

⁹ቃሲ ታኒ ሄዋን ፆሳ ፁራ ቆፋ ኣሳ ኡባው ቆንጪሳ ኦዳና፤ ኡባባ ሜꬌዳ ፆሳይ ባሬ ፁራ ዬዉዋ ቤኒ ዎዴ ጌንꬂ ዎꬄዳ። ፆሳይ ሃዒ ሄዋ ዎሳ ጎሊያ ባጋና ሳሉዋ ሳዓን ዴዒያ ካፓቶኔ ጎዳቴꬃይ ዴዒያዋንቶ ዛዋይ ባዪና ባሬ ኣꬌዳ ኤራቴꬃ ቆንጪሳናው ኦꬄዳ።

¹¹ፆሳይ ሄዋ ኑ ጎዳ ኪሪስቶሲ ዬሱሳ ባጋና ኢ ፖሌዳ ባሬ ሜꬊና ቆፋዳን ኦꬄዳ።

¹²ኑኒ ኪሪስቶሲ ዬሱሳና ኢቲፔ ጊዲዴ፥ ኣ ኣማኒያ ኣማኑዋን ኣማኔቲዴ፥ ኣዪኔ ያዬናን ፆሳ ሲንꬃ ሺቃናው ዳንዳዬቶ።

¹³ሄዋ ዲራው፥ ታኒ ሂንቴዋን ሜቶቲያዋን ሂንቴ ሂርጌና ማላ፥ ሂንቴና ዎሳይ፤ ኣዪሲ ጎፔ፥ ታኒ ሂንቴ ቦንቾ ሜቶታይ።

¹⁴ሄዋ ዲራው፥ ታኒ ሳሉዋኒኔ ሳዓን ዴዒያ ኣማኒያ ጎሊያ ኣሳይ ኡባይ ኣፔ ዬዳ ፆሳ ሲንꬃን ጉልባታይ።

¹⁶ፆሳይ ባሬ ቦንቹዋ ዳሩዋዳን፥ ባሬ ጌሻ ኣያናን፥ ሂንቴንቶ ሂንቴ ጋርሳ ኣሳቴꬃን ሂንቴ ሚኒያ ዎልቃ ኢማናዳኒኔ፥ ቃሲ ኣማኑዋ ባጋና ኪሪስቶሲ ሂንቴ ዎዛና ባሬ ጎሊያ ሜꬋናዳን፥ ታኒ ፆሳ ዎሳይ፤ ቃሲካ ሂንቴ ፃጱዋ ዬዲዴ፥ ቶኬቲዴ ሲቁዋን ሚናናዳን፥ ፆሳ ዎሳይ።

¹⁸ቃሲ ጌሻቱዋ ኡባና ኪሪስቶሳ ሲቁ ኣይ ኬና ኣኬንቶ፥ ኣዱሴንቶ፥ ꬎቄንቶኔ ጪሜንቶ ኤሪያ ዎልቃ ሂንቴንቱ ዴማናዳን፥ ታኒ ፆሳ ዎሳይ።

¹⁹ኤራቴꬃፔ ኣꬊያ ኪሪስቶሳ ሲቁዋ ሂንቴ ኤራናዳኒኔ ቃሲ ፆሳዋ ጊዲያ ኡባባኒ ሂንቴ ፖሊ ኩማናዳን፥ ታኒ ፆሳ ዎሳይ።

²⁰ሲሚ ኑ ጊዶን ኦꬂያ ባሬ ዎልቃ ባጋና ኑኒ ዎሲያዋ ዎይ ቆፒያዋ ኡባፔ ሎይꬂ ዳሪሲ ኦꬃናው ዳንዳዪያ ፆሳው፥ ዎሳ ጎሊያኒኔ ኪሪስቶሲ ዬሱሳን ኡባ ዎዴ ሜꬊናፔ ሜꬊና ጋካናው ቦንቹ ጊዶ። ኣሜንዒ።