Epeso 3

1

2

3

4

5

6

¹Tavaꞌu xo eni Paulo itema sou xaixai noxou Kalisito Iesu esuꞌulingengi ta mitema aneꞌi ane ta Iutaia uasi, la sou exolu no nano no taasou navunavu.

²Eni elavu sou lexe ngingi ngelomu sou lexe no anu alauna noxou Latauamenge, la Anu musosovosilo sou aꞌoxonu xaixaisinge noxou.

³Mo mii maꞌia ane mutalume tei ne mupalaꞌa noxilo la sou eni ekaukavu sevile no anu tei ne.

⁴No mine ngingi ngaitisou la sou ngingi ngamomomosou, ngalavusou lexe eni elavu manina no anu mii maꞌia mutalume noxou Kalisito.

⁵Mii maꞌia ane mutalume noxiꞌa ta mitema ane tatei, vaimomo ꞌo Uleenu mupalaꞌalixu noxixe ta mitema sou ane Iesu mupalusiꞌa mo ta mitema sou palomatana noxou.

⁶Mii maꞌia ane mutalume ne aloxo ꞌo, no anu aꞌalo laixe sou Iesu Kalisito la muꞌoxongengi ta mitema aneꞌi ane ta Iutaia uasi nengeꞌa taxali vilesisi. Mo ngingi ta mitema aneꞌi ane ta Iutaia uasi nganoꞌu mii maꞌia ane Lataua musakiinu vaikala sou tei noxou Iesu lexe ta Isilaeli inoꞌu ne. No anu xaixai noxou Kalisito Iesusi la ngingi nganoꞌu kalumo.

⁷Lataua muꞌoxoleli exali amitema sou xaixai noxou. Mo no anu alauna noxou la Anu mulosilo xavi noxou la sou eni exali itema sou xaixai noxou. Sou aꞌaloxu aꞌalo laixe sou Iesu.

⁸Mo ta mitema noxou Lataua ne miuaꞌulixo, ia eni ne uasisi manina mo amii vitanisi. Ia Anu mualaunasilo laixe la mulosilo xaixai sou aaꞌaloxu aꞌalo sou mimii laixe sou Kalisito e tatilovo sou uasi ulai noxiꞌa ta mitema aneꞌi ane ta Iutaia uasi.

⁹La sou vaimomo ꞌo eni aꞌoxonu ulamana noxinge aloxo ꞌo. Lataua mukoinu mimii latala mukalusi la mimii latala anu mutalume iou noxiꞌa aneꞌi tatei. Ia vaimomo ꞌo Anu mulosilo xaixai sou a aꞌaloxu mimii maꞌia ane mutalume ne. Anu uꞌoxonu uxali maninasou.

¹⁰Tei la Anu mutalume iou ia vaimomo ꞌo la Anu muꞌoxonu lalotu noxou muxali. Mo anu mumasaxa lexe no anu lalotu noxou la aneꞌi ane mixolu teitexi no loxotolo mo ta tatila noxiꞌa ta uleenu e misaxilaꞌu loxotolo ilavusou mo imaisou xavutala lailaixe iouiou noxou ne uxali lamana noxiꞌa.

¹¹Tatei manina la Lataua muxavutala lexe uꞌoxonu mii ane kaluxu uasi ne uxali, ia vaimomo ꞌo no anu xaixai noxou Kalisito Iesu Tila noxinge, la sou Anu muꞌoxonu mimii ne muxali manina.

¹²Xo nenge noxou Kalisito, mo nenge temuxaxu tanenge noxou Kalisito la sou nenge tamamaꞌu sou talai noxou Lataua uasi.

¹³La sou eni avikalangengi aloxo, ngaxavutala malaxo no anu tuꞌumaxu ane noxilo singe ꞌo uasi xo eni aꞌitingengi.

¹⁴Tavaꞌu aloxo ꞌo, la sou eni axolau tavaꞌilo voꞌuxu uluꞌelai no talaxu la akilaka ulai noxou Maminge.

¹⁵Aneꞌi ane mixolu teitexi no opo loxotolo xe aneꞌi ane ixoxolu no lia ꞌa. Mo Anu molu mumoxoꞌu ualaualasiꞌa, mo aneꞌi loxo ta mata noxou.

¹⁶Eni akilaka ulai noxou Maminge lexe, no anu mimii tavuꞌalo lailaixe iouiou noxou, la Anu uꞌanaꞌanalingenge no anu xavi Uleenu noxou mo uxolu no nano noxinge, la uꞌoxonu pekiaꞌinge.

¹⁷La sou Kalisito umomomo sou uxolu noxinge xo ngingi ngemuxaxu tangengi. Mo eni akilaka lexe ꞌilixo sou tangengi noxou Lataua tanengingenge ngatongatoꞌo uxali utila no anu maulingenge. Mo usiatoto loxo ovu uliꞌu uluꞌelai no lia.

¹⁸Mo ngingi ngongiꞌa ta mitema noxou Lataua nganoꞌu xavi, mo ngalavu sou manina ꞌilixo noxou Kalisito sou tanuxaꞌa ta mitema. Masaxa noxou ne mutila manina mo veveeni manina mo mulai teitexi manina xe muluꞌelai no lia manina.

¹⁹La sou ngingi ngelavusou ꞌilixo noxou Kalisito sou tanungenge ne anu mutila manina mo muaulixu lavulavu. Ia ngingi ngelavusou, la sou mimii ane noxou Lataua ne anu uꞌanaꞌanalingenge no anu.

²⁰Ia noxou la Anu umomomo sou uꞌoxonu mimii tavuꞌalo. Mimii ane ne muaꞌulixu mimii ane nenge texavutalanu mo tekilaka. Ia no anu xavi noxou ane uxolu uxaxai noxinge ne, muaꞌulixu mimii ane ne.

²¹La sou no voxovoxo utotomu ta mitema ukalusi e ilotu noxou Iesu taꞌitinu ualasou Lataua no ualasou Kalisito Iesu utotomu mo kaluxu uasi. Manina.