1Eme Paulo no irec hâcne qâpuc ŋoŋere erâ Kristo Jesure kâpâcwâru ŋic epo jukopac.
2Ŋoŋe nore manambiŋ, Anutuzi uruc jauŋ‐ticnere erâ ŋoŋerao miti gie bapemurâ munarewec.
3Munarehuc dâŋ soŋne mufua‐narewec, dâŋ i hâcne biac bembeŋne qâreŋkepac,
4ŋoŋe i wosehuc, no Kristore dâŋ soŋne maŋzi hone raruŋkekopac iŋuc sâcne mananiŋmu.
5Dâŋ soŋne i mârâc jaha ŋic juwarembiŋ jaŋerao mi mufuakicne, tiri aposolo â porofete nâŋerao ʒâhec Mârozi mufuawec.
6Dâŋ soŋne kecʒiŋuc: Biŋebiaŋte fârine qâpuc ŋoŋe Judaŋic nâŋehec sâc mocjaha â guru mocjaha erâ Kristo Jesurao biŋedâŋ deŋkewec i mâmâc rauckerâ bajuniŋte mukicne.
7Eme Biŋebiaŋ irec kiŋaŋ qaqa jupemurâ Anutuzi uruc jauŋ‐ticnere erâ tâpiri sâko‐ticnere fuŋne norao bataniŋkewec.
8Kristorao mâriri sâko fofone fokac irec dâŋ soŋne qâpuc mutâniŋke‐jarepemurâ irec gie biaŋ mitiŋic wawahane jâmbâŋ no hâcne munarekicne.
9Dâŋ soŋne muraruŋkepere mukicne, i Anutu bapafâre e maŋbuc‐ticnere dameŋne dameŋne baju warehuc juwec.
10Ʒi ine Anutuzi kikefuŋ gurufâc‐ticne nâŋâcnao maŋɋârâŋ‐ticnere fârine qaratiekume qâreŋne fuŋne fuŋne fuame sambâŋko ira fekicne â tâpirihec jaŋe wâc hone ʒâŋitac eeŋgopieŋ.
11Anutu e mârâc jaha dameŋ tâmiricko maŋnezi dâŋ mupaŋkewec irec fârine hâcne Wofuŋ‐nâŋec Kristo Jesu sorehuc bâfuawec.
12Eme eki hâcne hata bâʒâwe‐nâreme e manasiŋkehuc hâhâwic tâmiric Anutu maickeeŋgopeneŋ.
13Irec ʒiŋuc ŋazape mananiŋ: No ŋoŋere erâ fific guguriŋ faio jupe irec maŋŋeŋic mi wahazejec, aricne, ŋoŋe irec manapie eri qoqonaŋ‐ŋeŋic ezejec.
14Irec hâcne sambâŋko â mâreŋko ŋic guru sâc jueŋgopeneŋ
15nâŋâcne Mamac fârine e dieŋzi hecnehuc ŋoŋere erâ numucnehuc ʒiŋuc muekopac:
16Anutu e hahaŋnehec sâkozi Mâro ecneme tâpiri bâfua‐ŋareme maŋŋeŋiczi soka sanaŋ ezejec.
17Eme Kristo manasiŋkepie maŋŋeŋicko ŋeŋe juju ezejec. Eme ere maŋjauŋko gâtâ barâ qiŋ herâ domanʒepieŋ.
18Ehuc mitiŋic gâcne sasawa jaŋehec mâmâc mitire fuŋne botâŋne, hâŋne otecne, i afeckerâ mana taranʒepieŋ,
19erâ wâc Kristore maŋjauŋ, ŋic mamana jâuru‐fâreekac, i sifu mana‐hâmonʒepieŋ. Ehame Anuturao maŋ mâriri fufusuc fokac izi bâfusec‐ŋopazejec.
20Tâpiri‐ticnere fuŋne nâŋâcnao bataniŋkeekac Anutu hâcne, e wiac bapa‐ticnezi nunumu‐nâŋec â mamanasu‐nâŋec siricke‐fâreekacte
21kikefuŋko â Kristo Jesurao mumuteŋ‐ticne mimiŋzi ɋâric ʒuhuckeme ʒuhuc fofehuc juzejec sanaŋ. Jâmbomac.
