1Khazing a rei tei, Khri Zisu apostol a cangpaw kama Paul le kaa unypaw Timote tah,
2Kolosa khua letei a ungpaw, Khri letah a pathaipaw le zingchuipaw uny sahlo khatah ca kaa ca kua he. Kaa Paw Khazing ningdonah le thlawlungnah cawh naaning khatah ung ky seh.
3Naa cawtah thlaw kaa changning maikaw tah kaa Buipaw Zisu Khri a Paw a cangpaw Khazing cawh a lawngbia kaa hlai tei,
4zecawtamaw tatah Khri Zisu letei naa hnuipaw zingnah le mehpathai vytei naa dopaw he kaa thuinah cawtah a cang.
5Ma zingnah le donah cawh hnabeisuinah thongtah naa hnui. Ma hnabeisuinah cawh vaicung letah naa cawtah a bing teitah chiapahpaw na cang he ceh. Ma hnabeisuinah kong cawh biahmuisui thawngchawbia aa ca chingpaw he naa thuipaw taikhei a cang.
6Ma thawngchawbia thui he ceh katei, Khazing ningdonah biahmuisui khah naa hnithai ning taitei, naa hrong letah rai a hrepaw hrakhei khazaw hmingting letah cy lai ka, a thui a thuilai leimei.
7Ma bia heh kaaning caipaw tah zingchuipaw Khri a rai a hretu, kaa dopaw kaa raihrehui Epafra taitah naa thuipaw cang ka,
8Thlawpaw thongtah donah naa hnuipaw kong a ma chingtupaw zong a cang.
9Ma rawng tahei naa kong kaa thuining taikhei Khazing tah thlawpaw lang singnah vytei le thlawpaw lang hnithainah vytei thongtah Ama a dunah hninah khakhei a ca chisah nápaw he cawtah naa cawtah thlawchang le Khazing kha hae cawh tai khawh bei peh.
10Taico Abuipaw khatei a tlahpaw hringná tah naa hring khy nápawtah le zezongpui letah a lung naa lawngsah khy nápaw he ceh tah raichaw maikaw letah thuipa hnui tah Khazing hninah letah naa changchy nápawtah thlaw kaa ca chang pahpaw he a cang.
11Khazing tah a thawtlungnah rungnawpaw tah thaw ca patlung he seh la, ma pawsui co hanah a va tlung tihtah ingkhynah le lungsynah hmuisui naa hnui a.
12Taico Paw Khazing letah thawchah hmotah alawngnah bia a hlai la, a khaipaw painah raang letei mehpathai sahlo aa ry a hronghrui pawtei a ca tuatupaw he letaco alawngnah bia hlai my lo.
13Ma Khazing taco Setan painah a muinah chung taitah ma thochua ka, a dopaw a Sawtei painah raang chung lang a ma naesah.
14Ama letah tlangnah le sua ngethainah kaa hmuh.
15Khri cawh hmuh khy lypaw Khazing hmuisang, tuapaw vytei cung letah sa-uthui a cang.
16Zemaw tah pawco, Ama a thongtah hming vytei heh tua a cang. Alui letei le avai letei a ungpaw hming sahlo, hmuh khypaw le hmuh khy lypaw, abui cangnah sahlo maw, hmingtuakhynah sahlo maw, uhtu sahlo maw, nawhnuinah sahlo maw, ma hming vytei sahlo heh Ama a thongtah le Ama a cawtah tuapaw a cang he.
17Ama cawh hming vytei hlai tahei ung thah ka, Ama letah hming vytei heh hmingkheh tah aa tlekhi thlu he.
18Taico, Ama cawh a pung a cangpaw khrisawbu lu a cang. Ama cawh ahrangthonah le thihnah taitah patho tawpaw a cang. Ma pawsui co, zezongpui cung letah a hmetaw caipaw cangnah a hnui a.
19Zemaw tah pawco, Khazing cawh Zisu chung letah a Khazing cangnah vytei a ungpaw khah a lung a lawng ngetei ka,
20Ama thongtah Khazing tah zezongpui khah Ama ceingei khatah a raisah kaw he. Khraws letei lai sahpaw Khri thisai thongtah aluicung letei hming vytei le vaicung letei a ungpaw hming vytei khatah arainah a tua.
21Khuahlai taco naa hringzia a chah ly rawng tah Khazing kha a hlah he ceh ka, naa thinglung chung letah carae tah na tua he ceh.
22Canghrasala, atoheh cawh a mehmuh letah mehpathai le reipachianah a ung ly ruapaw, suise a kawh lypaw cang ruapaw tah Khri a pung ceingei tei a thihnah thong khei Ama tah a ca rai he.
23Ma hrahei naa cang khy ná pawtah zingnah naa hnuipaw lekhei a peitle teitah a ngepai la, cyky tah a daw my lo. Thawngchawbia taitei hmuhpaw hnabeisuinah khah thlaw khe lo. Naa thuipaw thawngchawbia cawh ma heh cang ka, avai rai letei a ungpaw ming maikaw khatah y khui a cang. Kama Paul zong, ma thawngchawbia a sae cawh ka cang hi.
24Atoheh cawh naa caw tei, ka taithuinah lekhei ka thaw a chah. Zisu tah a pung a cangpaw khrisawbu cawtah a ingpaw taithuinah khah ka ngaisaw tah ka pazopaw taithuinah cawtah ka lung a ui.
25Khazing tah a pa siapaw rai cawh Ama a bia khah naaning khatah tling teitah phychuapaw a cangnah cawtah khrisawbu sae tah ka cangpaw a cang hi.
26Ma Khazing biaparuh cawh chai hlupui le kung hlupui letah nopaw cang ka, canghrasala atoheh cawh mehpathai sahlo khatah palang a cang myca.
27Khazing tah a cawngsaw sahlo cawh Khri rungnawnah le laisuinah khah Gental cawngsaw sahlo cawtah a cang hrah tahpaw thuisah lai khah a lungtlingnah cawh a cang. Ma biaparuh cawh ma heh a cang. Khri cawh naa chung letah hring ka, ma cawh a rungnawnah na hrong hrah he ceh tahpaw hnabeisuinah cawh a cang.
28Khri kong khah ming vytei khatah ching he peh ka, singnah kaa hnuipaw vytei tah cawngpah he peh ka, chingreinah kaa peh he. Ma pawsui co, Khri khatah ming vytei khah meh puitling tah kaa chuakhui khy he a.
29Ma cawtah hei, ka chung letei rai a hrepaw Khri hmingtuakhynah rungnawpaw a paichai tah thaw tah rai ka hre hi.
