1Vuꞌun Pabloun, ilocꞌ iꞌayan ta yoꞌnton ti Dios ti jech jcholcꞌopune, ti tacbilun yuꞌun ti Jesucristoe. Ti vuꞌune schiꞌuc ti quermanotic Timoteoe
2ta jtsꞌibaboxuc talel ti jcartacutique, Quermanotac, ti voꞌoxuc ti jun avoꞌntonic ta stojol ti Cristoe, ti yuꞌunoxuc xa ti Dios ti liꞌ nacaloxuc ta jteclum Colosase. Ti Jtotic Diose, acꞌo yacꞌboxuc bendición. Acꞌo yacꞌboxuc jun avoꞌntonic.
3Colaval, xcutcutic onoꞌox ti Diose, ti jaꞌ Stot ti Cajvaltic Jesucristoe, ti cꞌalal ta jtacutic ta cꞌoponel ta atojolique.
4Yuꞌun laj caꞌi acꞌoplalic ti jun avoꞌntonic achꞌunojic ti Cristo Jesuse. Jaꞌ jech xtoc ti cꞌux ta xavaꞌiic scotol ti buchꞌutic yuꞌuntac ti Diose.
5Ti jech atalelic taje, yuꞌun apatoj avoꞌntonic yuꞌun ti cꞌusi tey qꞌuejbil ta vinajel ti jaꞌ avuꞌunique. Ti jech lic apat avoꞌntonic taje, jaꞌ o cꞌalal lic avaꞌiic ti colebal lequil achꞌ cꞌope.
6Ti lequil achꞌ cꞌop ti laj avichꞌic albele, yacal ta xꞌepaj batel ta sjoylej banomil jech chac cꞌu chaꞌal icꞌot ta pasel ta atojolic ti cꞌalal laj avaꞌiic ti scꞌuxul yoꞌnton ti Diose, ti jaꞌ laj avaꞌiic ti jaꞌ melel ti scꞌuxul yoꞌntone.
7Ti lequil achꞌ cꞌop taje, jaꞌ laj xchanubtasoxuc ti quermanotic Epafrase, ti jaꞌ jchiꞌilcutic ta abtele, ti jun yoꞌnton ta xtun yuꞌun ti Cajvaltic ta atojolique.
8Jaꞌ laj yalbun caꞌicutic acꞌoplalic ti cꞌux ta xavaꞌi abaic ta sventa ti Chꞌul Espíritue.
9Jech o xal un, ti cꞌalal jech laj caꞌicutic ti acꞌoplalique, mu xquicta jbacutic ta scꞌoponel, ta scꞌanbel ti Diose ti acꞌo yacꞌboxuc avilic ti cꞌusi ta scꞌan ti stuque, ti acꞌo yacꞌboxuc ep ta tos ti abijilique, ti acꞌo yacꞌboxuc sbijil ajol avoꞌntonique.
10Jech ta xavaqꞌuic ta qꞌuelel ti lec ta xapasic jech chac cꞌu chaꞌal ti buchꞌu yuꞌuntac ti Cajvaltique. Tey onoꞌox ta xapasic ti cꞌusi lec ta xile. Tey ta xꞌayan ep ta tos slequilal avoꞌntonic ta spasel ti cꞌusi leque. Tey xlic avojtiquinic lec ti Diose.
11Ta jcꞌanbecutic ti Diose ti acꞌo yacꞌboxuc avipic ta sventa jun yutsil ti smucꞌul stsatsale, yoꞌ jech oy smucꞌul avoꞌntonic xamuyubajic ta xcuch avuꞌunic ti cꞌusiuc noꞌox ta xcꞌot ta atojolique.
12Jaꞌ jech xtoc yoꞌ jech xamuyubajic ta xavalbeic vocol ti Jtotic Diose. Yuꞌun chapal xa jcꞌoplaltic yuꞌun ta yichꞌel ti cꞌusi ta xiyacꞌbotique schiꞌuc ti buchꞌutic yuꞌuntac ti oyic ta saquilal osile.
13Ti Diose laj spojotic loqꞌuel ta yoc ta scꞌob ti icꞌal osile. Laj xa yicꞌotic ochel ti bu ta xventainvan ti scꞌuxubinbil Nichꞌone.
14Jech lijcolotic ta sventa ti jech ichame. Tey laj yacꞌbotic perdón yuꞌun ti jmultique.
15Ti Dios ti mu xvinaj ta qꞌuelele tal yacꞌ sba ta qꞌuelel ta sventa ti Snichꞌone. Yuꞌun ti Snichꞌone tey xa onoꞌox oy ti cꞌalal lic meltsajuc talel scotol ti cꞌusitic oye.
16Ta sventa Cristo imeltsaj yuꞌun ti Dios scotol ti cꞌusitic oy ta vinajele, ti oy ta banomile, ti cꞌusitic mu xvinaj ta qꞌuelele, ti cꞌusitic xvinaj ta qꞌuelele. Scotol ti jpasmantaletique, ti jꞌabteletique, ti buchꞌu tsots xuꞌ yuꞌunic ti mu xvinaj ta qꞌuelele, scotol imeltsaj yuꞌun ti Dios ta sventa ti Cristoe, yoꞌ jech ta xtun yuꞌun ti stuque.
17Yuꞌun ti Cristoe tey onoꞌox oy cꞌalal muꞌyuc to ox scotol ti cꞌusitic oye. Jaꞌ ta sventa stuc ti lec ta xanav scotol ti cꞌusitic oye.
18Pero maꞌuc noꞌox taje. Yuꞌun oy to yan. Yuꞌun ti Cristoe jaꞌ jolil cꞌotem cuꞌuntic ti sbecꞌtalotic ti voꞌotic jchꞌunolajelotique. Ti Cristo ti ta xacꞌbotic jcuxlejaltique, baꞌyel ichaꞌcuxi yoꞌ jech icꞌot ta totil yuꞌun scotol.
19Yuꞌun ti Diose jech laj scꞌan ti tey cꞌotuc scotol ti stalel stuc ta stojol ti Cristoe.
20Jech laj scꞌan xtoc ti ta sventa Cristo ti acꞌo lecubuc scotol ti cꞌusitic oye, ti liꞌ ta banomile, ti tey ta vinajele. Jaꞌ o tey ilecub scotol ti cꞌalal icham ta cruz ti Cristoe.
21Ti ta voꞌnee, jyanlumoxuc to ox, chopol avoꞌntonic. Laj acrontainic ti Dios ta avoꞌntonique. Yuꞌun chopol ti cꞌusitic laj apasique. Avi tana un, lec xa xayiloxuc ti Diose
22ta sventa ti laj yichꞌ svocol schiꞌuc sbecꞌtal cꞌalal icham ta cruz ti Cristoe. Jaꞌ jech laj spas ti Diose, yoꞌ jech muꞌyuc amulic, ti lecubtasbiloxuc ta xcꞌot avaꞌan abaic ta stojole.
23Yoꞌ jech ta xataic taje, jaꞌ ta scꞌan ti junuc avoꞌntonic achꞌunojic ti Cajvaltique. Jaꞌ ta scꞌan ti atsꞌunoj lec ta avoꞌntonic ti ta xacolic ta sventa ti colebal lequil achꞌ cꞌop ti laj avaꞌiique. Ti lequil achꞌ cꞌop taje ta xichꞌ alel ta sjoylej banomil. Yuꞌun vuꞌun Pabloun ta jcolta jba ta yalel.
24Ximuyubaj xa ti jech ta xquichꞌ jvocol ta aventaique. Yuꞌun ti jech ta xquichꞌ ti jvocole, tey ta jtsacubtas batel ti jvocol ti mu to caꞌioje jech chac cꞌu chaꞌal laj yichꞌ svocol ti Cristo yuꞌun ti jchꞌunolajeletique, ti jaꞌ sbecꞌtale.
25Yuꞌun jaꞌ cabtel laj yacꞌbun ti Diose yoꞌ jech ta xitun yuꞌun ti jchꞌunolajeletique, yoꞌ jech lec oyoxuc. Jech o xal un, jamal ta xcal ti scꞌop Diose.
26Ti scꞌop Dios taje, jaꞌ ti cꞌusi muꞌyuc to ox vinajem talele, ati mucul to ox yuꞌun ti Dios ta voꞌne ti sjaylajunchopal laj echꞌuc talel ti cristianoetique. Avi tana un, laj xa yacꞌbe yojtiquin ti buchꞌu yuꞌuntaque.
27Jech laj scꞌan ti Diose ti ta xacꞌbotic jnaꞌtic ti cꞌusi yan yutsil ta xavichꞌ ti voꞌoxuc jyanlumoxuc ti jaꞌ mucul to oxe. Ti cꞌusi mucul to oxe, jaꞌ ti Cristo oy ta atojolique. Jaꞌ ta sventa ti Cristoe xuꞌ xanopic ti tey ta xataic ti yutsilal ti Diose.
28Jaꞌ yuꞌun un, ti vuꞌuncutique ta xcalbecutic scꞌoplal ti Cristoe. Ta jbijubtascutic scotolic. Ta jchanubtascutic scotolic, yoꞌ jech ta xaꞌibeic lec ti smelole, yoꞌ jech chꞌiemic lec ti jech junic schiꞌuc ti Cristoe.
29Jech o xal un, ta xiꞌabtej. Cacꞌoj persa ta sjunul quip, ta sjunul jtsatsal ti yacꞌojbun ti Cristoe.
