Kolosi 1

1

2

3

4

¹Jo Pol, jo aposel ari ta Krais Jises. Na so-ok ta Kindrei, iy le amwenen atehei jo asahan buku ari aposel, ma jo edek ili kon rakon, rakon ta atiye sahou mwasin ta Jises Krais.

²Jo hawe nadu tine taha ari nyaran Timoti, aru badeh, atorou la-ukei dah ewek taha lau mwan ma badih ta Kindrei, are bolo kon tinan Kolosi. Aha atehei budon taha handru in ta Krais, ma aha badeh, a buku nadu tine mwan ma badih. Aru aso-ok tama taha Kindrei, katikisi aha ma kabwidi kandriyen mwasin kewek taha, ma kabwidi ndrine aha kudu mwasin.

³Udu bolo salom taru na len marakon badeh, aru asolom aha ma adeu wurah i ta Kindrei, iy tama Laban tataha Jises Krais.

⁴Ya, aru adeu wurah i ta Kindrei, tasah aru ndranuhun sahou iri asehek nyala aha i buku doh: Bwena mene sahou handru hawe sahou mwasin ta Krais badeh, asahan taha, ma aha ndranuhun. Eme ma, aha atehei budon handru ta Kindrei kameh anyohan aha lakou doh iy ndraleheyaniy ndrawek taha, ma aha atondrok iri lakou nane udu kandrah kodo-oh. Eme ma aha badeh, atehei budon handru in ta Krais Jises, ma aha badeh, aso-ok labai iri lau mwan ma badih ta Kindrei. Sahou mwasin dah aha mene ndranuhun, badeh, ibo gok ta asahan bolo kon munyak solo-an, ma asahan i tinan ma leheyani kandriyen mwasin ili tiri mwan ma badih mari. I buku le iy ma bwena amekes ewek taha udu bada len ari ma bwena badeh, aha anuhun sahou mwasin, ma aha ndratanan, Kindrei badeh, amekes mwasin ewek taha.

⁷Ma Epapras ndraleheyani aha ta sahou mwasin doh. Iy badeh, ndramak ari mwasin ta amekes lahou ta Krais. Ma iy ibo gok hawe ahi, ahi aso-ok iy labai. Iy badeh, aseben aru, ma iy atondrok gok ta Krais udu mwasin labai ta akohok boho aru ewek taha.

⁸Iy tiye taru ta kandriyen dah ta aso-ok handru iri mwan ma badih ta Kindrei, Malawin Ndrabun badeh, ndratehei ndrawek taha.

⁹Ya, ahi ndranuhun sahou dah, ta aha atehei budon taha handru, ma aso-ok labai iri mwan ma badih ta Kindrei. Eme ma, ahi anuhun le badeh, eme na le liliy, ahi asolom ta aseben aha. Ahi baruwani kandriyen ta salom bwe. Ahi badeh asolom, ta Kindrei kaseben aha, ma aha winiyan atanan ta kandriyen iy amwenen aso-ok aha ka-en hamon ta aliy. Ma Malawin Ndrabun tan kameh winiyan edeu taha iri tanan, ma budon mwasin. Ma idoh winiyan idih handru udu bolo aha.

¹⁰Aru amekes salom doh, ta aha winiyan adek buku iri mwan ma badih handru ta Laban, ma iy kameh aso-ok iri kandriyen taha marakon. Ma aha kameh winiyan amekes iri gok mwasin. Eme ma, aha kameh winiyan atanan Kindrei amwenen.

¹¹Ma aru ale badeh, asolom buku doh: Ahi aso-ok Kindrei badeh, kedeu boto-on kewek taha na le boto-on tan mwasin. Eme ma, aha kameh winiyan ales boto-on ta bwese iri maha-an marakon, ma ndrine aha kameh winiyan udu le udu. Ma aha kameh sekesek,

¹²ma adeu wurah i ta tama taha Kindrei. Iy kameh bwidi aha winiyan ta akohok iri lakou iy ndralowosaniy ta ewek taha udu kandrah. Ma aha kameh winiyan akohok lakou doh hawe iri mwan ma badih ta Kindrei are lomada sun tan.

¹³Ma iy ndratolowei taha are mine balik ndrame len, ma iy ndratehei taha ndrala bahandra tondrok ta nadun Jises Krais, iy aso-ok iy labai.

¹⁴Na gok nadun amekes, tama taha Kindrei ndrakonohei taha ndrame hamon, ma iy ndrasikinei kandriyen ndra-in tataha ndra-au.

¹⁵Kone Nadu Kindrei badeh, i buku le taman Kindrei, taha winiyan banyolom taman na mada taha bwe. Krais badeh, kadok tan ma iy udu bwele-e iri lakou marakon Kindrei ndrabwidiy.

¹⁶Tasah, Krais le amwenen ndrabwidi iri lakou marakon. Iy bwidi lakou udu bwele-e munyak badeh, taha ndranyolom, arile udu bolo kandrah badeh, taha winiyan banyolom bwe. Ma iy ale bwidi iri angelo laba tinan marakon, ma iri malawin mara-ei, ma iri lakou rayah nyamu iri boto-on labai. Ma Kindrei bwidi lakou marakon doh na le mine Krais, ma iri lakou marakon doh badeh, tan le amwenen.

¹⁷Bwena mene, lakou marakon basahan bwe le badeh, Krais ndrasahan ai, ma, na le boto-on tan, iy bwidi iri lakou marakon asahan, ma iy le ari atondrok iri.

¹⁸Krais badeh, batun ta bada iri lau tan, iri doh badeh, lau ta Kindrei amwenen. Tasah, iy amwenen badeh, kati kohan handru tiri lau ta Kindrei mari doh. Iy le ari badeh, amak eme hamon eme awas ja udu bolo ndrokowa iri mwan ma badih mene ndramak ndra-au ndrasu-u. Eme ma, iy kadok amwenen, ma iy winiyan udu bwele-en ta atondrok lakou marakon.

¹⁹Ya, Krais badeh, leheya taman Kindrei amwenen, konen i buku sah handru. Tasah, Kindrei aso-ok iri kohan le amwenen, ma iri boto-on tan marakon kudu ndra ta nadun. Eme ma Kindrei amwenen atehei kohan, ma kandriyen tan marakon i ta Krais.

²⁰Kindrei badeh, atehei nadun asahan bwele-en ta atondrok taha. Tasah, ta ndraye Krais amou udu bada kei tondreh, Kindrei anya kamekes lakou marakon kasahan ari le hawen; iri lakou badu munyak, ma hawe iri lakou badu kandrah ale. Ya, Krais badeh, ndrabwidi boto-on ta kandriyen marakon ta amekes bahun marakon doh, udu ndrokowa Kindrei hawe iri balik mari badeh, ndrano ndra-au.

²¹Aha ale ado mwasin hawe Kindrei. Arile, bwena mene aha are len labai ta Kindrei, ma aha ta bahun hawen. Tasah, budon taha mene amekes bahun i tan, ma aha amekes kandriyen ta lomondra ndra-in.

²²Arile, Krais ndramak ndrala bada kei tondreh, na lakou doh badeh, Kindrei bwidi ndrine aha asahan mwasin labai hawen. Iy amekes buku doh ta atiye aha ame hawen, aha kameh winiyan asahan ndrabun ma ha-un, ma ari ndra-in winiya bado ta madan ja bwe.

²³Kindrei kameh bwidi lakou doh, buku aha tawi budon taha handru ihis, ma aha ales boto-on handru. Kora-on ari lakou kariu aha, ma aha kamani kandriyen ta budon boto-on ta sahou mwasin dah, aha mene ndranuhun ta Krais ndrandrei aha ndrame hamon ja. Jo Pol, jo ndrasahan ndramak ta atiye sahou mwasin dah, ma ahi atiye ili tiri lau mwan ma badih marakon are bolo kon munyak dah.

²⁴Na bolo len dah badeh, jo udu bolo asiu lulik, arile jo sekesek ta akohok sisi-in, tasah lakou dah aseben aha. I buku doh: Krais anya, jo kameh bwese sisi-in udu bolo len, ta jo anya katiye sahou mwasin ta aseben iri mwan ma badih ta Kindrei. Lau ta Kindrei doh a buku bada Krais. Eme ma, jo aso-ok sisi-in doh Krais ndraleheyaniy ndrame tek badeh, kaseben iri mwan ma badih ta Kindrei.

²⁵Kindrei amwenen mene ndralebelei jo, ta jo katiye iri sahou tan marakon kewek ta aseben aha. Eme ma, jo badeh, asahan buku ndramak ta lohowa aha mwan ma badih marakon ta Kindrei.

²⁶Na bolo len marakon bwena ndra-au badeh, Kindrei tone sahou dah, bala tiri mwan ma badih marakon bwe. Arile, na dah ja badeh, Kindrei ndrasihi sahou mara-ei dah ndraleu, ma taha mwan ma badih marakon ta Kindrei badeh, ndranuhun.

²⁷Ma Kindrei anya kaleheya taha mwan ma badih tan, ta taha katanan: Sahou aton doh badeh, mwasin labai, ma winiyan aseben iri lau badu Isra-el, ma hawe taha mwan ma badih badu rakon ja ale. Ma sahou aton doh buku: Krais badeh, kohan udu bolo aha, ma aha atondrok iy keme kakohok aha kala kare kandrah hawen.

²⁸Eme ma, ahi aposel badeh, atiye sahou mwasin ta Krais ili tiri mwan ma badih marakon. Ahi leheya iri mwan ma badih ta tanan marakon ahi tawi, ma ahi batanau iri ta iri katondrok iri kamwenen ta a-en hamon tiri sahou marakon ta Kindrei. Tasah, ahi aposel anya katiye iri mwan ma badih ari, ari kala hawe Kindrei. Ma, na len iri asahan hawe Kindrei, ahi aso-ok iri kasahan kamwenen buku Krais ma ahis hawen.

²⁹Ya, ahi aso-ok lakou doh kasahan handru, eme ma, na le boto-on ta Krais edeu eme tek, jo amekes gok dah boto-on labai.