ቆላሲያሳ 1

1

2

3

4

¹ታኒ ጳዉሎሲ፥ ፆሳ ሼኒያን ኪሪስቶሲ ዬሱሲ ኪቴዳዋ ጊዴዳዌኔ ኑ ኢሻይ ፂሞቶሲ፥

²ቆላሲያሳ ጊያ ካታማን ዴዒያ ፆሳ ናናቶ፥ ኪሪስቶሳን ኣማኔቴዳ ኢሻቶ ሃ ዳቢዳቢያ ፃፌቶ። ፆሳ ኑ ኣዉዋፔኔ ጎዳ ዬሱሲ ኪሪስቶሳፔ፥ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ።

³ኑኒ ሂንቴንቶ ዎሲዴ፥ ኑ ጎዳ ዬሱሲ ኪሪስቶሳ ኣዉዋ፥ ፆሳ ኡባ ዎዴ ጋላቴቶ።

⁴ኣዪሲ ጎፔ፥ ኑኒ ኪሪስቶሲ ዬሱሳ ሂንቴንቱ ኣማኒያዋኔ ፆሳ ኣሳቱዋ ኡባ ሲቂያዋ ሲሴዶ።

⁵ቱሙ ኪታይ ዎንጋላይ ኮዪሮ ሂንቴኮ ዬዳ ዎዴ፥ ፆሳይ ሲንꬃፔ ኢማና ጌዳዋ ሲሴዲታ። ሲሚ ሂንቴንቱ ኣማኑኔ ሲቁ ሳሉዋን ጊጊዴ ናጊያ፥ ፆሳይ ሲንꬃፔ ኢማና ጌዳዋን ዶሜቴዳ።

⁶ሄ ዎንጌሊ ሂንቴኮ ጋኬዳ፤ ሂንቴንቱ ኣ ሲሶዴፔኔ ፆሳ ኣꬎ ኬካቴꬃ ቱማቴꬃን ኤሮዴፔ ዶሚዴ፥ ሂንቴንቱ ጊዶን ዴዒያዋዳንካ፥ ቢታ ኡባን ኣንጁዋ ኣሄኔ ኡባሳ ኣኬ።

⁷ሂንቴንቱ ሄዋ ኑናና ኢቲፔ ቆማ ጊዴዳ ሲቆ ኤፓፊራፔ ታማሬዲታ፤ ኢ ኑ ዲራው ኪሪስቶሳው ኣማኔቲዴ ኦꬂያዌ፥

⁸ፆሳ ኣያናን ሃራቱዋ ሂንቴንቱ ሲቂያዋ ኑሲ ኦዴዳ።

⁹ሄዋ ዲራው፥ ኑኒ ቃሲ ሄዋ ሲሴዳ ጋላሳፔ ዶሚዴ፥ ፆሳይ ሂንቴንቶ ባሬ ሼኒያ ኤሪያ ኤራቴꬃ፥ ፆሳ ኣያናይ ኢሚያ ኣꬌዳ ኤራቴꬃናኔ ኣኬካና ኢቲፔ ኩንꬂዴ ኢማናዳን፥ ኡባ ዎዴ ባሌናን ፆሳ ዎሴቶ።

¹⁰ሄዋፔ ጉዪያን፥ ጎዳይ ኮዪያዋዳን ሂንቴንቱ ዴዓናዉኔ፥ ኡባ ዎዴ ኣ ናሼቺያባ ኦꬃናው ዳንዳያና፤ ሂንቴንቱ ኦꬂያ ሎዖ ኦሱዋ ኡባን ሂንቴንቱ ዴዑ ጎዓና ዴዒያዋ ጊዳናዋ፤ ቃሲ ፆሳ ኤሪያዋን ዲጪ ዲጪ ባኒታ።

¹¹ሂንቴንቱ ኡባባኒ ናሼቻን ጌንጫናዳኒኔ ዳንዳያናዳን፥ ፆሳይ ባሬ ቦንቹዋ ጊታቴꬃዳን ኢሚያ ዎልቃ ኡባን ሚኒቴ።

¹²ቃሲ ፆሳ ናናቶ ጊጌዳ ፖዖ ካዉቴꬃ ላታናው፥ ኑና ዳንዳዪሴዳ ፆሳ ኣዉዋ ጋላቲቴ።

¹³ኢ ኑና ꬉማ ዎልቃፔ ኣሺዴ፥ ባሬ ሲቂያ ናዓ ካዉቴꬃኮ ፒንꬄዳ።

¹⁴ቃሲ ኢ ባሬ ናዓን ኑና ዎዚዴ፥ ኑ ናጋራ ኣቶ ጌዳ።

¹⁵ኪሪስቶሲ ቤቴና ፆሳ ቆንጪሲያዋ፤ ኢ ሜꬌቴዳዋ ኡባፔ ኣꬊያ ባይራ ናዓ።

¹⁶ኣዪሲ ጎፔ፥ ኡባባይካ ኣኒ ሜꬌቴዳ፤ ቤቲያዋንቱ፥ ቤቴናዋንቱ፥ ኣያናቱዋፔ ቤቲያ ዎልቃይኔ ጎዳቴꬃይ፥ ꬎቃቴꬃይኔ ማታይ፥ ሳሉዋኒኔ ሳዓን ዴዒያ ኡባባይካ ኣኒኔ ኣው ሜꬌቴዳ።

¹⁷ኢ ኡባባፔ ካሴ ዴዔዳ፤ ኡባባይካ ኣኒ ባሬ ሳዓ ሳዓ ኦይቂዴ ዴዔ።

¹⁸ኢ ባሬ ሁጴው፥ ዎሳ ጎሌው ሁጴኔ ዴዖ፤ ኢ ኡባፔ ቦላ ጊዳና ማላ፥ ካሴቲዴ ሃዪቁዋፔ ዴንዴዳ ባዪራ ናዓ ጊዴዳ።

¹⁹ኣዪሲ ጎፔ፥ ፆሳይ ኮዬዳዋዳን፥ ኣኒ ፆሳቴꬃ ኩሜንꬃይ ዴዔ።

²⁰ያቲና ፆሳይ ኪሪስቶሳ ባጋና ኡባባ ባሬናና ሲጌꬃናው ዬዉዋ ቃቼዳ፤ ባሬ ናዓይ ማስቃሊያ ቦላን ጉሴዳ ሱꬃን ሳሉዋኒኔ ሳዓን ዴዒያ ኡባባ ባሬናና ሲጌꬄዳ።

²¹ሃዋፔ ካሴ፥ ሂንቴንቱ ኢታባ ቆፔዳ ዲራዉኔ ኦꬄዳ ዲራው፥ ፆሳፔ ሻኬቲዴ፥ ኣናና ሞርኬቴዲታ።

²²ሺን ፆሳይ ሃዒ ሂንቴንታ ፖኮባይ ባዪናዋንታኔ ቃሲ ጌሻቱዋ ኦꬂዴ፥ ባሬ ሲንꬃ ሺሻናው፥ ባሬ ናዓ ሃዪቄዳዋ ኣሳቴꬃን ባሬናና ሂንቴንታ ሲጌꬄዳ።

²³ሄዌ ሂንቴንቱ ቱሙ ኣማኑዋን ሚኒ ኤቂዴ፥ ሚሺራቹዋ ቃላ ሲሲዴ፥ ሲንꬃፔ ኣካና ጌዳዋፔ ቃፄናን ሚኒዴ ዴዖፔ ሃናና፤ ሄ ዎንጋላ ሚሺራቹ ሳዓን ዴዒያ ሜꬌታ ኡባ ማታን ኦዴቴዳ። ታኒ ጳዉሎሲካ ሚሺራቹዋ ቃላ ኦዲያዋ ጊዳዲ።

²⁴ታኒ ሂንቴንቶ ዋዬቴዳ ዲራው፥ ሃዒ ናሼታይ፤ ኪሪስቶሲ ባሬ ሁጴው፥ ሄዋ ጊያዌ ዎሳ ጎሌው፥ ዋዬቲሺን ፓጬዳዋ ታኒ ታ ቦላ ሳኩዋን ኩንꬃይ።

²⁵ፆሳይ ታና ሂንቴንታ ማዲያዋኔ ኣ ቃላ ፖላዴ ኦዲያ ኣሺካሬቴꬃ ኪታ ታው ኢሜዳ።

²⁶ሃ ቃላይ ሃዋፔ ካሴ ባጋ ኡባን፥ ኣሳ ኡባው ኤሬቴናን ጌሚዴ ዴዔ፤ ሺን ባሬና ኣማኒያዋንቶ ፆሳይ ሃዒ ቆንጪሴዳ።

²⁷ፆሳይ ኣዪሁዳ ጊዴና ኣሳው ዎꬄዳ ሃ ኣሳው ቆንጪቤና ቦንቹዋኔ ዱሬ ዬዉ ኣዬንቶ ጌሻቱዋ ኤሪሳናው ኮዬዳ፤ ሃ ኣሳው ሃዒ ቆንጬዳዌ ኣዬ ጎፔ፥ ኪሪስቶሲ ሂንቴንቱን ዴዒያዋ፤ ሄዋ ጊያዌ ፆሳ ቦንቹዋ ኣናና ሂንቴንቱ ኣካናዋ።

²⁸ሄዋ ዲራው፥ ኑኒ ኣሳ ኡባው ኪሪስቶሳዋ ኦዴቶ፤ ኣሳ ኡባ ኪሪስቶሳን ኩሜንꬃ ኣሳ ኦꬂዴ፥ ፆሳኮ ሺሻና ማላ፥ ኑሲ ኣꬌዳ ኤራቴꬃ ኡባን ሂንቴንታ ሴሬቶኔ ታማሪሴቶ።

²⁹ታኒ ሃዋ ፖላናው፥ ታናን ኦꬂያ ኪሪስቶሲ ታው ኢሚያ ዎልቃን ባፄታይኔ ዳቡራይ።