KOLOSE 1

1

2

3

4

¹Lau Paulo, Iesu Keriso ena aposetolo taugu, Dirava ena ura dainai, bona varavarada Timoteo,

²ai raruosi ese umui helaḡa taumui Kolose ai, Keriso iabidadama-henina taumui, a tore henimuimu: harihari-bada bona maino Tamada Dirava ena amo bavabi.

³Dirava, iseda Lohiabada Iesu Keriso Tamana, a hanamoamu, umui daimui ai a noiamu negadia iboudiai;

⁴badina be ai na vada a kamonai Keriso Iesu o abidadama heniamu, bona helaḡa taudia iboudiai o ura henidiamu.

⁵Badina be emui helaro na guba ai, sivarai namo ena hereva momokani ai o kamonai guna helarona.

⁶Ina na umui emui ai vada e kau, tanobada idoinai vada eha kau heḡereḡerena: bona tanobada idoinai huahuana e dobimu, umui bogaragimui ai e dobimu heḡereḡerena; dia ina harihari mo, to Dirava ena harihari-bada sivaraina o kamonai bona o diba momokani dinana amo.

⁷Ai bamomai, emai lalokau Epafra, ese e hadibamui; ia na Keriso ena hesiai tauna korikori emui ai.

⁸Ia ese danu emui uraheni, Lauma lalonai, vada e hamaorolaimai.

⁹Una dainai, ai a kamonai dinana amo ema bona harihari, ḡuriḡuri asia hadokoa umui daimui ai; a noinoimu, iena ura ba diba vaitani mai aonegamui idoinai, laumamui danu bae diari;

¹⁰bena Lohiabada imatauraina ai ba raka, kara iboudiai ia ba hamoalea, kara namodia iboudiai anidia ba havara, bona emui diba Dirava enai baine tubu.

¹¹Ai a noinoimu danu, siahu idoinai ese baine hagoadamui, ia siahuna herea-daena heḡereḡerena; bena ba haheauka bona ba boga auka mai moalemui ida.

¹²Ita Tamada baita imodaia. ia ese vada e haḡoevada, diari ai helaḡa taudia ida ahuda baita abia;

¹³ia danu dibura siahuna amo vada e hamaurida, ia Natuna, ena lalokau, ena basileia lalonai vada e abida vareai;

¹⁴ia lalonai ita na mai eda hahemauri bona mai eda dika igwau-taodia.

¹⁵Ia na asita itaiamu Diravana heida-idana, e vara ḡaudia iboudiai roboadia.

¹⁶Badina be ḡau iboudiai guba ai bona tanobada ai ia ese e kara, ta itamu ḡaudia bona asita itamu ḡaudia, guba pavapavadia, lohia badadia, ḡaubada hereadia, siahu taudia: iboudiai ia ese e karadia, iena ḡau.

¹⁷Ia e noho guna, a ḡau iboudiai be gabeamo, bona ḡau iboudiai ia lalonai e hekamo boumu.

¹⁸Ia na ekalesia kwarana; ekalesia na ia tau-anina. Ia na mase amo toreisi-lou roboana, taunabunai ḡau iboudiai lalodiai ia na herea.

¹⁹Badina be Diravana ena ura dainai, ena honuhonu-dae na ienai e miava;

²⁰bona iena amo ḡau iboudiai, tanobada ḡaudia bona guba ḡaudia, ienai baine hadarodia dae, ia idia ida bae herohemaino, iena satauro rarana dainai.

²¹Umui danu, gunaguna ia bona umui na mai padamui; lalomui ai o inai heniava emui kara dika daidiai.

²²A harihari ia ese ienai vada eme hadaromui dae, ia tau-anina ena mase dainai; bena ia vairanai baine haginimui mai helaḡamui ida, asi bebeka-bebekamui, asi emui kara havara.

²³Ḡau tamona, kamonai ai ba noho, ba badinaia tarika-tarika, ba gini tutukatutuka; sivarai namo ena helaro amo basie daromui daudau. Sivarai namo bunai vada o kamonai; sivarai namo bunai taunimanima iboudiai guba henunai vada e harorolai henidia; sivarai namo bunai lau Paulo na hesiai tauna ai vada eme halaogu.

²⁴Harihari egu hisihisi umui daimui ai na moalelaimu; bona Keriso ena hisihisi orena lau taugu ai na haḡuḡuruamu, ekalesia, ia tau-anina, dainai.

²⁵Ena hesiai taugu ai nala, bena Dirava ese dagi e henigu umui emui ai, Dirava ena hereva baina harorolaia ḡuḡuru helaoreana.

²⁶Ena hereva hehunina na sene eregunadia bona uru iboudiai edia amo e hunia, ema harihari; a harihari ena helaḡa taudia ediai vada e hahedinaraia,

²⁷bena idia ediai, Dirava ena ura dainai, ina hereva hehunina hairaina herea-daena na bese idau-idau taudia bogaragidiai baine hedinarai. Herevana binai: Keriso na umui lalomui ai, emui hairai helarona.

²⁸Ai ese ia a harorolaiamu; taunimanima iboudiai a sisiba henidiamu, launimanima iboudiai a hadibadiamu, aonega iboudiai lalodiai; taunimanima iboudiai danu baia haginidia, bae namo ḡuḡuru Keriso lalonai.

²⁹Una totona na hekwarahimu bona na goada tohomu; iena ḡaukara heḡereḡerena lau lalogu ai e ḡaukaramu, mai siahuna ida.