42मिनु नोले मेकोपुकीमी ताइश्शो फुल्लु आ पा ङा अर्को फुल्लु चाक्शा, मेको फुल्लु बाक्तीकेम प्रोव़चा माल्नीम। मिनु नक खप चाक्शा, खिं सिल्चा माल्नीम।
43मिनु फुल्लु ग्रुंइशा, अर्को फुल्लु प्रोव़शा, खप खोतेर पा ग्रुंइशा, अर्को खप सिल्शा यो, मेको बुंखी लेंशा ग्रूत हना,
44चढ़ेबमी लेंशा जाक्शा, रिम्शो पा कोव़चा माल्ब। मिनु मेको बुंखी खिंम बारना बारन लशो बाक्त हना, मेको बारतीक बुंखी ङाइश्शो बाक्ब। मेको खिं ग्रांग्रा बाक्ब।
45मिनु मेको खिं कली प्रेत्चा माल्ब। मेको आ फुल्लु, शी नु सिल्शो खप सहर क्येङा ङोन ग्रांग्रा दिशो ताइक्तीकेमी ताइक्चा माल्ब।
46मिनु सुइ मेको खिं चोक्शो नोले ओव़त हना, मेको नां मरिक्म सम्म ग्रांग्रा दिशो दुम्ब। लेवी ११:२४
47मिनु सुइ मेको खिंमी इप्त हना यो, जाप्तु हना यो, मेकोमी आ वा मुरचा माल्ब।
48तन्न चढ़ेबमी मेको खिं रिम्शो पा कोव़ङानु, सिल्शा फिक्शा नोले मेको बुंखी ङाइश्शो मबारत हना, चढ़ेबमी मेको खिं कली ‘ग्रांग्रा मदिशो चोव़खो बाक्ब’ देंचा माल्ब। मारदे हना मेको बुंखी जाम्शा लत।
49मिनु मेको खिं ङा मुरुमी खिं कली चोव़खो सेल्चा कली चिक्ब निक्शी, लेबानोन ङा लाइश्शो रवा आ शी, हिस्सोप नु लल श्येले चाक्चा माल्ब।
50मिनु चढ़ेबमी ‘मेको चिक्ब निक्शीमी का खप के सिक्स ब्वाक्कुम ब्रीशो बोस तारी सतो’ दे अरेचा माल्ब। लेवी १४:४-७
51मिनु चढ़ेबमी मेको लेबानोन ङा लाइश्शो रवा आ शी, हिस्सोप नु लल रङम नुप्शो श्येले नु मेको सेस चिक्ब लाइश्शा, मेको नेल्ल कली मेको सिक्स ब्वाक्कु तारी साइश्शो चिक्ब आ हुशेमी ख्रुम्शा ग्रुंइचा माल्ब। मिनु मेकोमी मेको खिं कली ७ खेयप ब्रुइक्चा माल्ब।
52मोपा मेकोम चिक्ब आ हुश, सिक्स ब्वाक्कु, सेस चिक्ब, लेबानोन ङा लाइश्शो रवा आ शी, हिस्सोप नु लल रङम नुप्शो श्येलेमी मेको खिं ग्रांग्रा मदिशो चोव़खो सेल्चा माल्ब।
53मिनु मेकोमी मेको सेस चिक्ब कली सहर रे लाङगा प्रोंइशा बेरपाइक्चा माल्ब। मोपा मेकोमी मेको खिं ङा बुंखी क्याम्तीक गेय पचा माल्ब। मिनु मेको खिं ग्रांग्रा मदिशो चोव़खो दुम्ब।
54मिनु कुशुल ङा याक्सीब रोइ नेल्ल, रक सुइब रोइ,
55वासी नु खिं ङा बुंखी ङाइक्तीके,
56होम्शो नु आइक्च गार नु बुश लुम्सीशो गारपुकी चोव़खो सेल्तीक गेय एकोन बाक्नीम।
57ग्रांग्रा दिशो नु मदिशो तुइक्तीक एको बाक्ब। मेको कोव़र नु कोव़र खोदेंशो रोइ नु बुंखी ङाइश्शो आन पर्बम पतीक गेय एकोन बाक्नीम” दे परमप्रभु यावेमी मोसा नु हारून आस कली माइक्तीम्सी।