Taha Bapare Sâcmutâc 14:42-57

⁴²Erâ qânâ ɋâricne rorâ ŋeŋetacnao hepie ŋeha simeŋzi ʒimickenʒepieŋ.

⁴³“Eme qânâ wiac ropie wahaocmu â sâpe fâze emasaŋ erâ simeŋ ɋâricnezi ʒimickepie fainao mocwâc gukuckeocmuo

⁴⁴ine taha bapazi ra honezejec. Eme gukuczi fic maŋnao soka ŋedâmârec eme ʒiŋuc manazo: Gukuc repicnezi fic maŋne fusucmakacte wâwânâŋhec ekac.

⁴⁵Iŋuc manarâ fic i heropierâ qânâ â paraŋ wiac‐ticne erâ simeŋ ʒimickekicne i hae râpeo jawao behepie razejec.

⁴⁶Me ŋic moc e ficzi motâc hehe foha raʒiwecko ine wâwânâŋhec erâ juha hae ŋafezejec.

⁴⁷Me moc e fic ira foocmuzi ŋaqi‐ticne ʒurezejec, â moc e fic ira nânâ nâocmu e wâc iŋuc jaha ŋaqi‐ticne ʒurezejec.

⁴⁸“Me fic i simeŋ ɋâricnezi bâpiaŋkepie faicnao gukuczi mocwâc mi fuame taha bapazi honerâ ʒiŋuc muzejec: Gukuczi omaeme ficzi ɋaɋacne jaha ŋekac.

⁴⁹Eme fic i wâwânâŋ tâmiric ʒuhuckerâ ŋeocte taha bapazi wipe piticne jajahec â jâmâzâc jâc dâkâne erâ muc bâbâroŋ â wiac âsu biaŋhec rozejec.

⁵⁰Rorâ wipe moc kuʒimaŋko opâ ɋâricne ŋekac irec faicnao qâhâmozejec.

⁵¹Iŋuc erâ jâmâzâc jâc dâkâne erâ wiac âsu biaŋhec â muc bâbâroŋ i wipe qâhâmokicnere socko mecne â opâ ɋâricnao mecne âke uruckerâ ficmaŋko tieme arec 7 ezejec.

⁵²E iŋuc ehuc wipesoc â opâ ɋâricne â wipe ɋâricne â jâmâzâc jâc dâkâne erâ wiac âsu biaŋhec â muc bâbâroŋ izi ficmaŋne ʒure ɋaɋackezejec.

⁵³Tarame wipe ɋâricne i hae râpeo sawao beheme ferâ razejec. E iŋuc ehuc ficte due bame fic izi hâcne ɋaɋackezejec.”

⁵⁴Wicsanaŋ fuŋne fuŋne irec sâcmutâc iŋuc hâcne fokac.

⁵⁵Wic sâfiru me ŋaqio me ficko gukuc fuakac,

⁵⁶me sisiwiŋ me ɋâɋâfoŋ me pârâc fuame

⁵⁷wâwânâŋhec me wâwânâŋ tâmiric ekac irec fuŋne taniŋkeocte sâcmutâc iŋuc hâcne fokac.