Text copied!
CopyCompare
परमप्रभु यावे आ लोव़ - लेवी

लेवी 26

Help us?
Click on verse(s) to share them!
1मिनु लेंशा परमप्रभु यावेमी मोसा कली “गेपुकीमी इन कली मूर्तिपुकी मसेलीन। मिनु आंम कली मुशा मूर्ति नु पूजा पचा कली थाम मवोतीन। मिनु इन रागीमी मुशो फुल्‍लु मवोतीन। मेको कली पूजा पा आन ङोंइती मबपीन। मारदे हना गो परमप्रभु यावे, इन परमप्रभु नङ। प्रस्‍थान २०:४-५
2गेपुकीमी आं नाइक्‍तीक नाक्‍ती मानेन। मिनु आं बाक्‍तीक कली मान पने। गो परमप्रभु यावे नङ। लेवी १९:३०
3गेपुकीमी आं फुल्‍लुम मुशा ब्रेक्‍शो लोव़ टिशा पाइतीनी हना,
4गो रेउ यिची ना रेउ यिपाइक्‍नुङ। मिनु इन रूम शुश अन्‍न ग्रेल्‍नीम। मिनु रवाम शुश फल फुल सित्‍नीम।
5मिनु अङगुर सेक्‍ची ना सम्‍म इन अन्‍न तुप्‍नीनी। मिनु अङगुर सेक्‍ने मथुम्‍थु शोक्‍ची ना दुम्‍ब। मोपा गेपुकी नु शुश जचा तूचा बाक्‍ब। मिनु इन रागीम थुं नाइश्‍शा बाक्‍चा ताइनीनी। आमोस ९:१३
6मिनु गो रागी ङा मुर आन कली थुं नाइश्‍शा बाक्‍चा गेनुङ। मिनु गेपुकी गोल्‍शा निन्‍द्रा पाइनीनी। सुइमी इन कली हिंच मकोंइब। गो इन रागी रे हिंचा ङा जन्‍तु आन कली खेरनुङमी। इन रागीमी लडाइ मदुम्‍ब। इजीकीएल ३४:२५
7मिनु गेपुकीमी इन जोरी सत्रु आन कली खेदा पा तरवारम साइक्‍नीनी।
8इन मुर ५ जनामी सहे का मुर आन कली नु सहे का मुरुमी १० हजार मुर आन कली खेदा पाइनीम। इन जोरी सत्रु इन तरवारम शोल्‍मो पा बेक्‍नीम। ब्‍यवस्‍था ३२:३०; यहोसु २३:१०
9मिनु गो इन कली शिशी पा कोव़नन्‍नी। मिनु गो इन कली सोशा बोशा शुश दुम्‍पाइक्‍नुङ। मिनु आं पशो कबल गेपुकी नु गेना हना यो लीपाइक्‍नुङ। इजीकीएल ३६:११
10गेपुकीम इन खेक्‍शा वोइश्‍शो माइत अन्‍न जना जन, नक अन्‍न वोइक्‍चा कली माइत अन्‍न तिल्‍चा माल्‍नीनी।
11गो इन कली ग्रांग्रा मदित्‍थु, इन दातेमीन आ बाक्‍तीकेम बाक्‍नुङ। येरमीया ७:२३; २कोरिन्‍थी ६:१६
12मिनु गो इन दातेमी बाक्‍शा, गो परमप्रभु दुम्‍नुङ। मिनु गेपुकी आं मुर बाक्‍नीनी। गो परमप्रभु यावे, इन परमप्रभु बाक्‍नुङ।
13गो परमप्रभु यावे, इन परमप्रभु नङ। गेपुकी इन कली इजीप्‍ती आन वाइलीम वाइल मदुम्‍पाइक्‍थु, एक चाक्‍तन्‍नी। गो इन शुर ङा जवा जिक्‍शा, इन पिया पोक्‍शा गाक्‍ब सेल्‍तन्‍नी। इजीकीएल ३४:२७-२८
14तन्‍न गेपुकीमी आं लोव़ मटीतीनी नु आं अरेशो मपाइतीनी,
15नु आं फुल्‍लुम मुशा ब्रेक्‍शो लोव़ मकोव़तीनी, आं अरेशो मपाइतीनी नु आं कबल प्रोंइतीनी हना,
16गो इन कली मार पाइनुङ देंशा हना, गो इन दातेमी शुश हिंतीके सेल्‍नुङ। मिनु इन रां सोव़ना सोव़न बाक्‍नीम। मिनु जरो पा इन मिक्‍च ततीके जाम्‍ना जाम्‍न लाइब। मिनु गे ओंखां पा बेक्‍नीनी। इन शोक्‍शो अन्‍न मोशा दुम्‍नीम। मारदे हना इन जोरी सत्रुम नेक्‍नीम।
17गो इन कली मरिम्‍शो पाइक्‍नुङ। गे इन जोरी सत्रु रे ब्रुइनीनी। इन जोरी सत्रु इन कली हुकुम पाइब दुम्‍नीम। मिनु सुइमी इन कली खेदा मपाम्‍तेक्‍म हना यो, गेपुकी प्रोक्‍नीनी।
18मेको नेल्‍ल तुइश्‍शा यो, आं कली मटीतीनी हना, गो इन पाप ७ खेयप तेम्‍शा सजाइ गेनन्‍नी।

19गो इन ठेयब लेश्‍शो खतम सेल्‍नुङ। मिनु गो इन सरीङ फलाम खोदेंशो नु इन रू तांबा खोदेंशो सेल्‍नुङ। ब्‍यवस्‍था ११:११:१७
20मिनु इन सक्ति मोशा दुम्‍शा मारेइ पने मचाप्‍नीनी। इन रूम मारेइ मवाब। मिनु इन रागी ङा रवापुकीम फल मसित्‍नीम।
21गेपुकी दूली लांम गाक्‍स ङा गाक्‍स पा, आं कली मटीतीनी हना, गो इन पाप ७ खेयप तेम्‍शा इन कली श्‍येत गेनन्‍नी
22गो इन दातेमी ब्‍वाकी ङा जन्‍तुपुकी सोइक्‍नुङमी। मेकोमी इन आल आन कली ब्‍वाइनीम। मिनु इन बस्‍तु भाव साइक्‍नीम। मिनु गे का निक्‍शी ला दुम्‍तीके इन लां नेल्‍ल श्‍येत्‍थ दुम्‍नीम। इजीकीएल ५:१७
23मोपा सजाइ तशा यो, गेपुकी आं गे मलेत्‍तीनी हना, नु दूली लां गाक्‍स ङा गाक्‍स पाइतीनी हना, २सामुएल २२:२७
24गो इन कली यो मरिम्‍शो पस ङा पस पाइनुङ। मिनु गो इन पाप ७ खेयप तेम्‍शा, इन कली श्‍येत गेनुङ।
25गो इन कली लडाइ तोपाइक्‍नुङ। मिनु आं कबल प्रोंइशो आ पर्बम क्‍येक्‍क लेत्‍नुङ। गेपुकी आंम आंमा सहरम बुक्‍तीनी हना, गो मेकेर यो इन दातेम बेक्‍पाइक्‍ब रोइ सोइक्‍नुङ। मिनु इन जोरी सत्रु आन गुइम दुम्‍नीनी। यसैया १:२०,२४
26मिनु गो इन अन्‍न थमा पा साम्‍पाइक्‍नुङ। १० ओटा खिं ङा मीश मुरुमी चुप्‍लु कामी क्‍येनीम। क्‍येशा पुक्‍शा तेम्‍मेनु, सुइ मरू‍नीम। यसैया ३:१; इजीकीएल ४:१६
27मिनु मेको मो दुम्‍शा यो, गे आं कली मटिथु, दूली लां गाक्‍स ङा गाक्‍स पाइतीनी हना,
28गो इन कली मरिम्‍शो पस ङा पस ग्रुम्‍नुङ। मिनु इन पाप ७ खेयप तेम्‍शा, सजाइ गेनन्‍नी। ब्‍यवस्‍था २८:५३; येरमीया १९:९
29गेपुकीमी इन तमी तौ आन श्‍ये ब्‍वचा माल्‍नीनी।
30गो इन डांडा ङा पूजा पतीक थामपुकी प्रेत्‍नुङ। इन धूप चोतीक नेल्‍ल प्रेत्‍नुङ। मिनु इन बेक्‍शो रां मेको ब्रोल्‍शो मूर्ति आन तार ताइक्‍नुङ। मिनु गो इन कली तशा ग्रांग्रा दिशा तिल्‍नुङ। इजीकीएल ६:४,६
31गो इन सहर गोरशो रागी खोदेंशो सेल्‍नुङ। मिनु इन पूजा पतीके थान श्‍येत्‍थ सेल्‍नुङ। गो इन ब्रोव़शो धूप आन रिना मनाम्‍नुङ।
32मिनु गो रागी कली खतम पोक्‍नुङ। मिनु मेकेर जाक्‍शा बाक्‍ब इन जोरी सत्रुमी मेको तशा छक लाक्‍नीम।
33गो इन कली रागी रागी ङा मुर आन दातेमी ब्रपाइक्‍नुङ। मिनु लडाइ तोपाइश्‍शा, इन कली खेदा पपाइक्‍नुङ। मिनु इन रागी श्‍येत्‍थ नु इन सहरपुकी गोरशो सेल्‍नुङ।
34मिनु रागी श्‍येत्‍थ दुम्‍मेनु, मेको आ नाइक्‍तीक बर्स ग्‍येरशा मानेब। मिनु गेपुकी इन जोरी सत्रु आन रागीम बाक्‍नीनु, इन रागी चहिं ग्‍येरशा नांइसीब। लेवी २५:२; २इतिहास २६:२१
35मेको रागी गिश नाक्‍त सम्‍म श्‍येत्‍थ लीबा, मिश नाक्‍त नाइक्‍चा ताइब। गेपुकी मेक बाक्‍नीनु, नाइक्‍तीक बर्स नाइक्‍चा मतशो, नाइक्‍तीक बर्स मानेशो बाक्‍ब।
36मिनु गो इन जोरी सत्रु आन रागीम बाक्‍शो लीशो मुर आन थुं लुक्‍च लपाइक्‍नुङ। मिनु सफा दोक्‍शो रेयके नेंशा यो, आन जोरी सत्रुम खेदा पशो खोदेंशो पा प्रोक्‍नीम। मिनु मोशा दाइल पा थित्‍नीम।

37सुइमी खेदा मपथु यो, मेकोपुकी तरवार तशा प्रोक्‍शो खोदेंशो पा, प्रोक्‍नीम। मिनु थोक्‍मुशा गोल्‍नीम। मोपतीके आन जोरी सत्रु आन ङोंइती राप्‍ने मचाप्‍नीम।
38गेपुकी अर्को रागी ङा मुर आन दातेमी जाम्‍शा लाइनीनी। मिनु इन जोरी सत्रु आन रागीमी इन कली दाक्‍ब।
39मिनु लीशोपुकी चहिं जोरी सत्रु आन रागीमी आन पाप नु आन किकी पिपी आन पाप पतीके बेक्‍ना बेक्‍न लाइनीम। इजीकीएल २४:२३; इजीकीएल ३३:१०
40तन्‍न मेकोपुकीमी आंम पाप नु आन किकी पिपी आन पाप आ पर्बम ‘मरिम्‍शो पाइतक नु दूली लां गाक्‍स ङा गाक्‍स पाइतक’ देंतेक्‍म हना, ब्‍यवस्‍था ४:३०
41मिनु गो मेको आन कली मरिम्‍शो पस ङा पस बाक्‍शा, आन जोरी सत्रु आन रागीम सोइक्‍ताक्‍ङमी। मिनु मेको आन खकटा थुं ब्रेम्‍शो दुम्‍शा, आन पाप आ पर्बम पाप क्‍याम्‍तीक गेय पाम्‍तेक्‍म हना, ब्‍यवस्‍था १०:१६; येरमीया ९:२५
42गो याकूब, इसहाक नु अब्राहाम नु पशो आं कबल नु मेको रागी कली मिम्‍नुङ। प्रस्‍थान २:२४; २राजा १३:२३
43मारदे हना मेको रागी श्‍येत्‍थ दुम्‍शा, आ नाइक्‍तीक बर्सपुकी मुर मबाक्‍तीके मानेना मानेन बाक्‍ब। मिनु मेकोपुकीमी आन मरिम्‍शो पशो आ पर्बम सजाइ ताइनीम। मारदे हना मेकोपुकीमी आं पावो, दे अरेतीक लोव़ नु आं फुल्‍लुम मुशा ब्रेक्‍शो लोव़ काइ मपाम।
44मिनु मोदेंशो पाम्‍तेक्‍म हना यो, गो मेको आन कली आन जोरी सत्रु आन रागीमी कोव़शा, ग्रांग्रा दिशा खतम मसेल्‍नुङमी। मिनु मेकोपुकी नु पशो आं कबल मप्रोंइनुङ। मारदे हना गो परमप्रभु यावे, मेको आन परमप्रभु नङ। होसे ११:९
45तन्‍न गो मेको आन कली मिम्‍शा, आन किकी पिपी नु पशो आं कबल मिम्‍नुङ। गो नेल्‍ल रागी ङा मुरपुकीम तचा ङा पा मेको आन परमप्रभु दुम्‍तीके, मेको आन कली इजीप्‍त रागी रे ग्रुंइशा चाक्‍ताक्‍मी। गो परमप्रभु यावे नङ” दे परमप्रभु यावेमी देंत। उत्‍पत्ती १२:७
46एको परमप्रभु यावेमी सीनै डांडाम मोसा कली गेशो आं नु इस्राएली आन दातेमी फुल्‍लुम मुशा ब्रेक्‍शो लोव़ नु “पावो” दे अरेशो लोव़ बाक्‍नीम।