Ŋicwofuŋ I 22:44-52

⁴⁴Josafata e Israe ŋicwofuŋhec wama qaqac epic wâc.

⁴⁵Josafatazi wiac sasawa ebac ewec â tâpiri‐ticnere fuŋne jowatuwec â ʒika qawec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.

⁴⁶Mamac‐ticnere dameŋko boe sau ŋic ʒanʒaŋne jumbiŋ i jaŋe eki hâcne mâreŋ irecnec jâpec‐jopawec.

⁴⁷Edom mâreŋko ŋicwofuŋ moc mi juwec, ŋicwofuŋ mefâro‐ticnezi sawa juwec.

⁴⁸Eme Josafata e Tarasisi haeonec woke jaŋe Ofiri haeo rarâ gol roniŋte sorec‐jopawec. Erâ ine woke jaŋe Ezioŋ‐Gebe haeo qanʒaŋne‐fârembiŋte mi rambiŋ.

⁴⁹Eme Ahaba ŋokâ‐ticne Ahaʒiazi Josafata kecʒiŋuc muhuc âzâcnewec: “Nore kiŋaŋ qaqafâc jaŋe sifu gore kiŋaŋ qaqafâc jaŋehec wokeo ranʒepieŋ.” Iŋuc muhuc âzâcneme Josafata e dâŋ i manarâ mi afeckewec.

⁵⁰Juku Josafata e apa ŋosafâcne jaŋerao ʒuhuckehuc hâmome jaŋe fombiŋkoa apa‐ticne Dawidire hae qizecko duckembiŋ. Ehame ŋokâ‐ticne Joramzi tucticne qarâ ŋicwofuŋ juwec.

⁵¹Josafata Juda ŋicwofuŋ jume jara 17 eha Ahaba ŋokâ‐ticne Ahaʒiazi fuŋkerâ ŋicwofuŋ ehuc Samaria haeo juwec. Ehuc jara jajahec Israe ŋic jaŋere ŋicwofuŋ juwec.

⁵²E neŋgoc mamac jahec‐ticne jahere kike hata bâjâpehuc Wofuŋte ʒâŋe faio wiac mamakâcne ewec. Ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ, hehesic i wâc bâjâpewec.