Éxodo 15

1

2

3

4

5

6

7

8

9

10

11

12

13

14

15

16

17

18

19

20

¹Moisés ena Israel aleripa ttsé Jehová ki̱koka̱ ttsè i' wa: “Ye' ttsöke Jehová dalöioie. Kabaio tai̱ë ena iwákpa ko̱s e' e̱wé̱waitö dayë a̱. Es ie' e̱' alé tai̱ë shu̱te̱ ie'pa ki̱.

²Ye' tso' ttsök Jehová ë̀ a̱. Ie' tö ye' a̱ idiché mé. Ie' tö ye' tsa̱tkée. Ie' dör ye' Këköl. Ye' ka̱wöta̱ ie' ki̱kökka̱ buaë. Ie' dör ye' yë́ Këköl. Ye' tö ie' dalöieraë e̱r moki̱ wa.

³Ie' dör ñippökwak darërëë bua'ie. Jehová e' dör ie' kiè.

⁴Egipto blú karreta tso' ñippoie ena ie' ñippökwakpa e'pa ko̱s émi dayë a̱ Jehová tö. Egipto blú ñippökwakpa bua'bua e'pa ko̱s duolur se̱ Dayë Mat a̱.

⁵Ie'pa katsi̱rulune dayë shu̱a̱ we̱s ák es. Dayë i̱ski̱ë e' ë̀ me'r ie'pa ki̱.

⁶A Jehová, be' ulà bua'kka diché tai̱ë, e' wa be' tö be' bolökpa batsélor.

⁷Ie'pa demi ñippök be' ta̱, erë ie'pa ko̱s e̱wé̱wa be' tö be' diché tai̱ë, e' wa. Be' uluneka̱ ie'pa ki̱, ta̱ ie'pa ñanewa̱ we̱s ka̱kö sí es.

⁸Dayë wöikébö darërëë ta̱ iwöklönewa̱ie wi̱'kë io̱'kë mía̱ we̱s ká̱ ukuö es. Dayë wöklönewa̱, kë̀ shköku̱'ia̱.

⁹Be' bolök e̱' ttséka̱ tai̱ë ta̱ iché: ‘Ye' mi' ie'pa itöki̱ wé̱yö ikué̱rö ta̱ ee̱ ì mirwa̱rak iwa̱ e' yerattsa̱yö iulà a̱, e' wà tierayö ko̱s ye' ki̱ ikiane ekkë. Ye' tabè yerattsa̱ iñalé̱ka, e' wa yö ie'pa tterawa̱.’

¹⁰Erë be' tö dayë wöiké ta̱ e' tö ie'pa ttélur. Ikatsi̱newa̱ dayë a̱ we̱s tabechka es.

¹¹A Jehová, ¡Wé̱pa skà kiekerakitö “skëköl”, esepa ko̱s tsa̱ta̱ be' dör! ¡Kë̀ yi dör batse'r tai̱ë we̱s be' es! ¡Kë̀ yi diché ta̱' tai̱ë we̱s be' es! ¡Ì kë̀ o̱r yi a̱ ese wè̱ be' tö buaë, e' tö sulitane tkiwè̱wa̱! ¡Sulitane ka̱wöta̱ be' ki̱kökka̱!

¹²Be' ulà bua'kka kéka̱ ta̱ íyök tö ie'pa malé̱wa̱.

¹³Be' tö sa' tsa̱tkée. Be' é̱na sa' dalër tai̱ë, e' kue̱ki̱ be' tso' sa' wëttsu̱k. Be' wa̱ sa' mi'ke be' diché wa dö̀ wé̱ be' wák se̱rke ee̱.

¹⁴Mik ká̱ ulitane wakpa wa̱ e' jche̱newa̱, eta̱ ie'pa painuraë suane ë̀ wa̱. Filisteowak krardawa̱ suane ë̀ wa̱,

¹⁵Edomwak wökirpa chkerdawa̱ suane ë̀ wa̱, Moabwak wökirpa painuraë tai̱ë. Canaánwak ulitane kësik ko̱s e' chörawa yës.

¹⁶A Jehová, ¡a̱s ie'pa tkirwa̱! ¡a̱s ie'pa suar tai̱ë! Be' diché wa a̱s ie'pa a̱t kë̀ ti̱ria̱ suane kue̱ki̱ dö̀ mik sa' ulitane dör be' icha e'pa tka eta̱.

¹⁷A Jehová, Sa' tse̱ramibö döka̱ be' ka̱bata buaë e' a̱. Ee̱ sa' se̱rdaë buaë ke̱kraë. Ka̱bata e' shu̱kitbö be' a̱ se̱noie. Ee̱ be' wák e̱' wé yué e'dör yöbië.

¹⁸Jehová tso' se' wëttsu̱k s'blúie ke̱kraë.”

¹⁹Mik Egipto blú ñippökwakpa tkawa̱ dayë a̱ kabaio ki̱, karreta ki̱, eta̱ Jehová tö dayë wöiéwa̱ne ie'pa ki̱ erë Israel aleripa tka buaë ká̱ poppo a̱.

²⁰E' ukuöki̱ ta̱ Jehová tteköl kiè María, e' dör Aarón kutà, e' tö ma'ma klö'wé̱wa̱ ttsoie, ta̱ alakölpa ko̱s mí ie' itöki̱ klötökerak es ima'ma blardami.

²¹E' dalewa María ttsöke i' es: ¡A' ulitane ttsö́ Jehová ki̱koka̱! Kabaio ena iwákpa u̱yéwa̱itö dayë a̱. Es ie' e̱' aléka̱ ie'pa ki̱.

²²Moisés tö Israel aleripa ké e̱' yöktsa̱ Dayë Mat e' kkömik. Ie'pa míyal ká̱ sir poë kiè Sur e' a̱. Ee̱ ie'pa shkére ká̱ mañat eta̱ kë̀ ie'pa wa̱ di' ku̱ne yè yës.

²³Mik ie'pa demi ká̱ kiè Mará, eta̱ ee̱ di' tso' bacha'bachaë, kë̀ yar ie'pa a̱. E' kue̱ki̱ ká̱ e' kiè méka̱rakitö Mará

²⁴Eta̱ Israel aleripa tö Moisés chémi suluë. Moisés chakérakitö: “¿Ì yèmisö?”

²⁵Eta̱ Moisés tö Jehová a̱ ikié tö sa' ki̱mú. Eta̱ Jehová tö ie' a̱ kal tsitsir kkaché elka e' iéwa̱itö di' a̱ eta̱ di' baché chowa de buaë yè. Ee̱ Jehová tö ittè dalöiëno mé ie'pa a̱, ñies ie'pa ma'wé̱itö isuo̱ie tö ie'pa tö idalöièmi.

²⁶Ie' tö iché ie'pa a̱: “Ye' dör Jehová. Ye' dör a' Këköl. Ye' dör a' bua'u̱kwak. Ì cheke ye' tö a' a̱ e' ttsé a' tö, e' iu̱té a' tö ñies a' se̱né buaë we̱s ye' ki̱ ikiane es, e' ta̱ ye' kë̀ tö a' we'ikepa ì sulu patkë'yö egiptowak ki̱ ese wa.”

²⁷E' ukuöki̱ ta̱ ie'pa demi ká̱ kiè Elim. Ee̱ di' tum tso' döka̱ dabom eyök ki̱ böt (12). Ñies ì klö̀ tso' dikó klö̀ sù̱ ese tso' dabom kuryök (70). Ee̱ ie'pa e̱' tsé̱a̱t di' kkömik tsi̱net.