Éxodo 4

1

2

3

4

5

6

7

8

9

10

11

12

13

14

15

16

17

18

19

20

¹Erë Moisés tö iiu̱té: —Ie'pa kë̀ tö ye' ttö̀ klö'we̱pa. Kë̀ itö ye' ttö̀ iu̱tepa. Ie'pa tö ye' a̱ icheraë: “Jehová kë̀ dë'bitu̱ be' ska'.”

²Eta̱ Skëköl Jehová tö ie' a̱ ichaké: —¿Ì a'tse̱r be' wa̱ ulà a̱? Moisés tö iiu̱té: —Ye' shko kéli.

³Jehová tö iché ia̱: —¡Iu̱yö́mi i̱ski̱! Eta̱ Moisés tö iu̱yémi i̱ski̱. E' wösha̱ ta̱ ishko kéli yönane tkabë̀ie. Moisés e̱' skéu̱ iyöki̱ bet

⁴erë Jehová tö iché ia̱: —¡Iklö'ú̱wa̱ ikirë bata a̱ ulà wa! Eta̱ Moisés tö iklö'wé̱wa̱ eta̱ imía̱ne shko kéliie.

⁵Eta̱ Jehová tö iché ia̱: —Mik be' dene Egipto, eta̱ be' tö iú̱ es a̱s ie'pa tö iklö'ù̱ moki̱ tö ye' dör a' yë́pa bak ká̱ ia̱ia̱ë kiè Abraham, Isaac ena Jacob e'pa Këköl e' e̱' kkaché be' a̱.

⁶I' ta̱ be' ulà tiú̱wa̱ be' batsi̱' a̱. Eta̱ Moisés ulà tié̱wa̱ ibatsi̱' a̱. Mik ie' ulà yéttsa̱, eta̱ ie' isué̱ tö iwölineka̱ saruruë duè kiè lepra e' wa̱.

⁷Eta̱ Skëköl tö iché ia̱: —Be' ulà skà tiú̱wa̱ne be' batsi̱' a̱. Eta̱ Moisés tö iwé̱ es. Mik ie' ulà yéttsa̱ne, eta̱ ie' ulà buanene buaë.

⁸E' ukuöki̱ ta̱ Skëköl tö iché ia̱: —Ì kkachéyö be' a̱ ke̱we e' kë̀ klönerak iwa̱, ñies ie'pa kë̀ wa̱ be' ttö̀ iu̱tëne, e' ta̱ iët skà ú̱. Isalema e' klö'wè̱mi ie'pa tö.

⁹Erë e' ko̱s wa ie'pa kë̀ wa̱ be' ttö̀ klöne be' ttö̀ iu̱tëne e' ta̱ di' chkö́ka̱ di' kibi a̱ e' tö́ttsa̱ ká̱ sí ki̱. Mik e' tënettsa̱ ká̱ sí ki̱ eta̱ di' mia̱raë pë́ie.

¹⁰Moisés tö iiu̱té: —¡Ayëwë! ¡A ye' Këköl! Ye' sia̱rala, kë̀ tto buaë. E' kë̀ dör i̱'ñe ë̀me be' ttöke ye' ta̱ eta̱. Es ye' wák dër ká̱ ia̱ia̱ë. Ye' ttö̀ e̱naë. Ye' kë̀ a̱ s'iu̱tër buaë.

¹¹Erë Jehová tö iiu̱té: —¿Yi tö a' a̱ kkö̀ méa̱t? Ye' wák tö a' méa̱t kë̀ tto ö kë̀ kukuö̀ wattsër. Ñies a' wöbla kë̀ wawër ö a' wöbla wawër e' ko̱s méa̱t ye' wák tö a' a̱.

¹²E' kue̱ki̱ be' yú. Mik be' ttöke, eta̱ ye' tso' be' ta̱. Ì kiane ye' ki̱ tö be' tö ichè, e' kkacheraë ye' tö be' a̱.

¹³Erë Moisés tö iché ia̱: —¡A këkëpa! Ye' kköchö̀ be' a̱ tö o̱'ka patkö́mi ye' skéie.

¹⁴Eta̱ Jehová uluneka̱ ie' ki̱ ta̱ ichéitö ia̱: —E̱'ma be' ël Aarón dör Leví aleri ¿i̱ma e' bikeitsè be' tö? Ye' wa̱ ijche̱r tö ie' ttö̀ buaë. Ie' tso'tke ñala̱ ki̱ datse̱ be' ska'. Mik ie' tö be' sué̱, eta̱ e' tö ie' ttsë'wè̱mi buaë.

¹⁵Ì ko̱s chak be' é̱na e' ko̱s chö́ Aarón a̱ a̱s ie' tö ichö̀ne. Ye' wák tö a' böl ki̱meraë a̱s a' ttö̀ buaë. Ì kiane ye' ki̱ tö a' tö iwè̱ e' kkacheraë ye' tö a' a̱.

¹⁶Aarón ttöraë be' skéie. Ie' döraë be' ttekölie we̱s be' dör ye' tteköl es. Ì cheke ye' tö be' a̱ e' cherane be' tö ie' a̱ ta̱ e' cherane ie' tö a' yamipa a̱.

¹⁷Shko kéli se̱ tsú̱mi. E' wa ì kë̀ o̱r yi a̱ ese we̱raëbö. Ie'pa wökrardawa̱ iweblök.

¹⁸E' ukuöki̱ ta̱ Moisés mía̱ne inua̱ki, Jetró ska' ta̱ ichéitö ia̱: —Ka̱wö mú ña. Ye' ka̱wöta̱ shkökmine Egipto ye' yamipa sa̱u̱k tö itso'ia̱rak ttsë'ka. Eta̱ Jetró tö iiu̱té: —Ëkëkë. Be' shkö́ wöbla wa.

¹⁹Moisés tso'ia̱ Madián, eta̱ Jehová tö iché ia̱: —Yi ki̱ be' kiarke ttèwa̱ Egipto, e'pa blërulune. Kë̀ ì dalö̀ ta̱'ia̱ be' ki̱ ee̱. E' kue̱ki̱ be' yúne Egipto.

²⁰Eta̱ Moisés tö ilaköl ena ila'r tkéka̱ burro ki̱ ta̱ imíyal Egipto. Ie' wa̱ Skëköl shko kéli dami ulà a̱.

²¹Jehová tö ie' a̱ iché: —Mik be' demi Egipto, eta̱ ye' tö diché me'bak be' a̱ ì kë̀ o̱r yi a̱ ese wo̱ie, e' wakaneú̱ kröröë Egipto blú wörki̱. Erë ye' tö ie' a̱ e̱r suluë meraë a̱s kë̀ ie' tö Israel aleripa ö̀mine.

²²Eta̱ ttè i' chö́ ie' a̱: ‘Jehová tö iché be' a̱: Israel aleripa dör we̱s ye' alà wëm tsá̱ es.

²³Ye' tö be' a̱ ichétke tö ie'pa ö́mine a̱s imi'yalne ye' ki̱kökka̱. Erë be' kë̀ wa̱ ie'pa a̱ ka̱wö mène a̱s imi'yal. E' kue̱ki̱ be' alà wëm tsá̱ e' tterawa̱yö.’ Ttè e' chö́ ie' a̱.

²⁴Moisés ena iyamipa minia̱ ñala̱ ki̱ eta̱ wé̱ ie'pa kapökerö ñala̱ ki̱, ee̱ Jehová debitu̱ Moisés ska' ittökwa̱.

²⁵Erë Moisés alaköl Séfora e' tö ák di'dië klö'wé̱wa̱ e' wa ilà tottola kkuölit tée tsir. E' kkuölit takla pë́ wa ie' tö Moisés klö̀ patié̱ ta̱ ichéitö Moisés a̱: “Moki̱ be' tso'ia̱ ye' wëmie pë́ i' wa.”

²⁶Eta̱ Jehová tö Moisés émi. (Séfora tö ilà tottola kkuölit tée tsir e' kue̱ki̱ ie' tö iché Moisés a̱ tö “be' tso'ia̱ ye' wëmie pë́ i' wa.”)

²⁷Eta̱ Jehová tö Aarón a̱ iché: “Be' yú Moisés ñalé̱ yulök wé̱ kë̀ yi se̱rku̱' ee̱.” Aarón mía̱ Moisés ñalé̱ yulök ta̱ ie' ikué̱ Skëköl ké̱bata a̱. Ee̱ ishke̱'wé̱itö wöalattsè wa.

²⁸Eta̱ ì ko̱s chök Jehová tö Moisés patkë', e' pakéne Moisés tö Aarón a̱. Ñies ì kë̀ o̱r yi a̱ ese kkayë' Jehová tö Moisés a̱ wawè̱ e' ko̱s pakéneitö Aarón a̱.

²⁹E' ukuöki̱ ta̱ ie'pa böl míyal Israel aleripa kue̱blupa dapa'u̱kka̱ ka̱pakök ie'pa ta̱.

³⁰Ì ko̱s yë' Jehová tö Moisés a̱ e' pakéne Aarón tö Israel aleripa kue̱blupa a̱. Ñies ì kë̀ o̱r yi a̱ ese kkayë' Jehová tö Moisés a̱ e' ko̱s wé̱ Moisés tö Israel aleripa ulitane wörki̱.

³¹Israel aleripa tö Aarón ttè klö'wé̱. Mik ie'pa é̱na ia̱ne tö Jehová é̱na ie'pa dalërke, ñies tö ie'pa weirke sia̱rë e' sué̱itö, eta̱ ie'pa e̱' wöéwa i̱ski̱ ie' dalöiök.