ZABURA 143:1-10

¹Dauda lɛ̀ɛ. Dikiri, ǹ ma aduakɛna sí, ǹ sã kpá ma wɛ̃nda wikii, ǹ wema n náani kũ n manao yãi.

²Ǹsun yãkpatɛ kɛ kũ makũ n zↄ̀bleriioro, zaakũ gbɛ̃ke taari sari n kĩnaaro.

³Ma ibɛrɛ pɛ̀tɛmai à ma nɛ, à tò má kú gusiran lán gbɛ̃ kũ à gà zaa gìkɛnaa bà.

⁴Akũ ma nɛ̀sɛɛ yàka manamana, ma sↄ̃pɛ̀tɛ vãni.

⁵Yã zĩzĩnↄ dↄ̀magu, madì laasun lɛ́ n zĩkɛnanↄa, madì n yãkɛnanↄ da.

⁶Ma a ↄ dↄnyĩ, madì n ni dɛ lán gukori dì í ni dɛ nà.

⁷Ǹ wema likalika Dikiri, ma gbãna làka. Ǹsun mìkpɛrɛ zumɛnɛro, de màsun gↄ̃ lán gbɛ̃ kũ ò sì gyãwãnnↄ bàro.

⁸Ǹ n gbɛ̃kɛ mↄmɛnɛ kↄnkↄ, zaakũ mↄkↄ̃mmɛ má n náani vĩ. Ǹ ma da zɛ́ kũ à de mà sɛ́a, zaakũ mↄkↄ̃mmɛ ma a swɛ̃̀ɛ kpàmma.

⁹Ǹ ma sí ma ibɛrɛnↄa, Dikiri, mↄkↄ̃mmɛ ma nanyĩ.

¹⁰Mↄkↄ̃mmɛ ma Luda ũ, ǹ n pↄyenyĩna yã damɛnɛ. Ǹ tó n Nini mana domɛnɛ arɛ gusaran.