Mbouŋ To Yes Israela 143:1-10

¹Mbouŋ to David O Yoova, ulooŋ suŋuuŋ tsiau tane. Ughur taliŋam pa taŋiiz tsiau, ve lolom isaghatin ghau. Yo utataghon saveeŋ mbuaaŋ tsio, ve ughamgham ŋgar duduuŋa mon. Tauvene ulooŋ suŋuuŋ tsiau tane, ve uul ghau.

²Yau besooŋa tsio. Upayooz ghau pa savsaveeŋ sov. Pasaa, tamtamon eta duduuŋa ila matam mako. Yei nisov zeran to sosor.

³Ughita. Koiag igham taghon ghau, le ikis ghau ve itatan matin ghau. I igham ghau naleep ila ndoroom tiina loolo, imin yes tau timaat muuŋ geeg wa.

⁴Tauvene lolog ipataŋan, ve roiŋ igham ghau, le tapirig isov. Pasaa, leg eez eta muul mako.

⁵Tauta matag iŋgal muul pa gabua tau muuŋ tivot na. Yau naghamgham ŋgar pa uraat tintiina naol tau yo ugham zi pa nimam na.

⁶Ve nait nimag izaa ve nasuŋ payo. Yau lolog payo kat, imin ŋeer tau ilaghlaagh ila nugh tau le yaa mako na, ve murun matini.

⁷O Yoova, ulooŋ suŋuuŋ tsiau tane, ve uul ghau rekia. Pasaa, lolog ipataŋan, ve tapirig isov kat. Uŋgooz naghom payau sov. Matam ilam payau lak! Mako pale namaat ve nala naleep ila mateegha nugh toozi.

⁸Yoova, yau nanumeer ghom. Yau naghe mboŋoozo nalooŋ ghom usaav payau ughe: “Yau lolog isaghav ghom.” Ve naghe taum utotoi ghau pa eez tau ughe nataghoni. Pasaa, yau lolog payo, ve naghur matag payo to uul ghau.

⁹Yoova, yau nayooŋ ilat tsio, leso naleep poi. Ugham mulin ghau ila koiagŋa nimazi.

¹⁰Yo mon ta Maaron tsiau. Upaduduuŋ ghau, leso nataghon duduŋai ŋgar tau yo lolom pani. Avuvum poia pale igham pooz payau. Leso laghooŋ tsiau itaghon eez duduuŋa.