1Nabz ne Devet kx yrbzle mz kxrmailz ngr dzbe kxnzngrng. Awi Yawe! Naglqpx-atwrnr-ngrne nim. Ale-zvzq da kcng tzkctipxng, x napipxxng.
2Angrlvzx drtqm. Bilvzx nim kc tqmyalz-esz'ngr.
3Brngzvxitx nzyzlukr enqmi rnge mz nzmc-krde nim. Bz x tao-ngrde nzulrm.
4Clvetio-lzbqx x rpiq kx tubqx. Clveq leplz amrlx mz nzwxbuo-krme mz tron, x ayzlu-ngrbzme da badr.
5Dalr nrlc nzmailzlr kxdrka'-ngrng. Delc napnanati-ngrn nidr x Drtqdr na-amrbrtx-alobzme.
6Doa ngr alwx lcng nzyrkrtrpeng. Enqmi rngeng trpengr nzdcpx-krdr mz drtwr leplz x mztea nyzdr amznrpe-ngrnq.
7Eu, a' Yawe ngini-alom King. Elalvzx nzwxbuo-krme mz tron nyzm murde nzayzlu-krbzme da mz leplz tubq.
8Eu, murde nzaclve-krm nrlc tubq-esz'ngr, Esakrlrngr nzpipx-krm nztubqkr leplz o trtingr.
9Gct, nim lrpalvc nyz kxnzobqszong. Glxx kx nim me nzrlakitrkr mzli kx prtzngr da.
10Gct, krkcng tzkrlzlr nim nzabrtrpzlr drtwrdr bam. Itoto x doa amrlx kcng tzrtangrtilr nim, trmrbrtru mz drtwrm.
11Itoto x nigu amrlx napipxbzku mz kxnzmnc-mrbrng da kcng tqale Yawe. Jerusalem ngi mzteadau nyzde mrkc tqmnc-ngrde. Na-angrlvzku nide.
12Jzsle krkcng tzrnibqting leplz mz nzayzlu-kr-mopwzle badr da kcng tqtrka tzalelr. Kxnzmncng mz drtq kxetq sa na-ayzlu-kzpzle badr natq ngr nzyrni-krbzlr bade.
13Kxetu, nayc mz drtwrm ninge x mcom kxmu nzaetq-krm enqmi rngeng drtqnge. Kxrpalz, bzkq rlrpx-ngrn nzbz-krnge.
14Kxarlapx, naelalz-ngrm drtwrnge nzarlapx-krm ninge. Leplz kxkqlu Jerusalem sa naxlrlr nzglqlz-krnge nim.
15Lalztqmamu! Yawe aelwapx-lzbqngr mz nztubqkr nzayzlu-krbzle da mz leplz. Murde lr mrkzbleng nztao-moung mz gq kx nzekqtilr. Mz br kx nzatu-kapqlr, nzdwatr-moung elr. Mz trtxki kx nzamwilr, nzprtz mou kxdrka'-ngrng elr.
17Mz nzesablqti-krdr Gct, Nabz-ngrdr leplz ngr nrlc.
18Nzmu nakxpung, trtxpnzngr nzmrbrtitrkr drtwr Gct nidr. Nzobqtipxngr kxtrnzrngiscung trtxpnzngr nzbotxpx-krde.
19Natulzme Yawe, mz nzaryplapx-krm lr mrkzbleng amrlx. Na-aelwapx-ngrn kx drtwr kxnzetung amrlx ngi brmrda.
20Namwxlrtilr x na-amrluelr nim. Nakrlzlr kx nidr leplz txneng, x sa nabzng.
