Waiwia 4:1-17

¹A NI ara padapadaki on aramaj akan, jamero kan, o jaumaj en im en kaudok, o jadujär akai, ap pokon don ira;

²Pwe re makaraki ara kawewe on aramaj akan o ar padapadaki, me Iejuj pan kotin kaiajada me melar akan.

³Irail ap kol ira di o kila ira nan imaten lao manda, pwe a waja ponier.

⁴A me toto, me ian ronadar majan o, pojonlar; ari, toto en ol akan impan limekid.

⁵A mandan ran o jaumaj, o monjap, o jaunkawewe kan pokon pene nan Ierujalem.

⁶A jamero lapalap Anaj, o Kaipaj, o Ioanej, o Alekjander, o karoj, me kijan kainok en jamero lapalap,

⁷Irail pwiliki ira di nan pun arail, ap kainoma re ’ra: Ni kel en ij, de ni mar en ij, me komail wiaki met?

⁸Petruj me dir en Nen jaraui ap majani on irail: Main ko, jaumaj en wei o monjap en Ijrael komail,

⁹Ma je pan pakadeikada, o komail kainoma re at ran wet, pweki dok mau on aramaj jomau men, o da me a kelaile kida,

¹⁰Komail o aramaj en Ijrael karoj en mani, me mar en Iejuj Krijtuj men Najaret, me komail kalopuelar, me Kot kotin kaiajadar jan ren me melar akan, nan i eta, me men et uki o kelail kidar.

¹¹I takai o, me lokidokila ren komail jauje kan, me id wiala takai en pukakaim.

¹²O jota amen, me maur mi re a, pwe pil jota eu mar pan lan, me pakadara don aramaj, me kitail pan maur kida.

¹³A ni ar kilekilaner en Petruj i Ioanej ara pereperen o jo majak, rap puriamui kila, pwe re ajaer, me ira aramaj mal me jota ian jkul, o jota non audaud, rap ajaer, me ira ianer Iejuj.

¹⁴A ni ar kilaner aramaj o, me kelailadar, uda imp ara, rap jajalar lokaia.

¹⁵Irail lao kadar ira jan nan kapun, re ap kapukapun pena indada:

¹⁶Da me kitail en wiai on aramaj pukat, pwe toun Ierujalem ajaer, me ira wiadar kilel janjal eu, a kitail jota kak kalikama.

¹⁷A pwe ede lolok jili nan pun en aramaj akan, kitail en padik inapwi ira di, me ira de padaki on aramaj amen ni mar wet.