Acts 4:1-17

¹Peter ma John rava awari i bababani ma pirisi pulo tauapuina ma tempol taupainii ai bada ma Sadusi ḡelaui i ḡetai.

²Taui amloi i ḡaiḡai kaua Peter ma John awari aubaina taui i viviararamana da God, Iesu iraḡelei i vovaimairini ma wei i viatataiana da God rava anatapui iraḡelei ina vovaimairini.

³Taui Peter ma John i pani ma au i pom aubaina panipani au numana i terei da i mae mara.

⁴Wate rava maḡamaḡaui riwa i nonori ma i vitumaḡana, ma ai maḡa nelara 5,000 waivine eḡa ita iavi.

⁵Ma mara i tom ma Jew babadai, dogadogara ma tarawatu babadai au Jerusalem i vitagogiei.

⁶Ma pirisi ḡeḡetelarana Annas kampa ma Caiaphas, John, Alexander ma pirisi ḡeḡetelarana ana rava maiteni.

⁷Ma taui Peter ma John i neiei da au naoi i vimairini ma i riwei, “Aiwai rewapananei, ma aiai wavanei wei o kauei?”

⁸Arua Vivivireina Peter orana i vioai ma taui i riwei, “Rava ai babada ma dogadogara;

⁹tauai kaua aiaina a kauei gwaḡagwaḡana awarina ma amadodo taumi o vitara-virevirelai, da menanare tauna i lawananei.

¹⁰Ma wei ona aramana-kauei, da taumi ma mai Israel anatapui, da Iesu Keriso Nasaretei o tuparatui, Wate God tauna iraḡelei i vovaimairini ma tauna wavanei wei orotona au naomi lawalawaina e maimairi.

¹¹Taumi tauvoa nai ḡaimana o geduaiei, wate wei gaimana lamna numa ogona, numa ana tapuna e vovojijini.

¹²—Lamna aubaina Iesu ainelana ina vilawanita. Ma God eḡa aiai ḡelauna au dobu rewapana ita verei da ina vilawana.”

¹³Ma taui Peter ma John ai tepatora inanai ma maranai i aramanei da taui eḡa girugirumai, ma i baei. Ma i aramanei da taui Iesu ana tauvotaḡotaḡo.

¹⁴Ma wate i ʼnanai oroto i vivilawania Peter ma John maiteni i maimairi, lamna maranai taui gamoi i pota.

¹⁵Anina ma Peter ma John i riwei da boru gabuna i opu-tawanei, ma taui ava i vitarairavira vivira.

¹⁶Taui i vitaraviravira-viravira i pa, “Aiwai tana kauei wei nelarai awari? Rava anatapui au Jerusalem i aramanei da taui kaua babai i kaukauei, lamna eḡa tana boviei.

¹⁷Wate tana viḡaei da wei kauai eḡa ina tua rava ḡelaui awari, ma riwa bagibaginei tana viḡaei da eḡa aiai awarina Iesu wavanei ina raugugula.”