Sinale 4:1-17

¹Yuu gên nêl xolac vô xomxo tigee, lêc xomxo wê mi si daa vô Anutu gee hɨxôn xêhɨpu levac ti wê mi viac Anutu xumac ngɨbua ge dɨ xomxo Sadyusi mangwe val vô yuu,

²dɨ he xêyaa vô myavɨnê vô yuu ên wê yuu tɨxuu xomxo ya kɨyang bêga nêbê Yesu kɨdi lec vac yibên om xomxo yibên vɨhati obêc kɨdi lec mavɨha nang ge.

³Om he kô yuu mɨ la tung vac xumac kalabuhu, nêb yuu i dô dɨ i vɨdii lê, ên ge vɨgwe huc.

⁴Lêc xomxo wê ngô Pita kɨyang gee he tɨbeac vông i vin, om he vux wê vông i vin ge tɨyi xocbê 5,000.

⁵Dɨ vɨgwe vɨdiiên he Yuda levac hɨxôn gyovɨxa dɨ he wê xovô Moses xolac kehe gee, he xôn kɨtucma gê Jelusalem.

⁶He kɨtucma hɨxôn xomxo levac wê mi si daa vô Anutu ge, Anas yuu Kaiapas dɨ Jon yuu Aleksanda hɨxôn lie ya. Anas ge wê tu he vɨhati bazub.

⁷Om he kô Pita yuu Jon mɨ lam lax yuu le vô he manôn dɨ kɨnêg vô yuu ên nêbê, “Muu kô xêkɨzêc vô letya dɨ muu nêl letya lê, lêc muu vông xomxo tige vô nivɨha lecê?”

⁸Mêd Myakɨlôhô Ngɨbua hɨvun Pita xôn om Pita nêl vô he ên nêbê, “Xam xomxo levac hɨxôn xam gyovɨxa,

⁹gwêbaga xam kɨnêg xii ên wê xii ngɨdu xomxo ti wê vɨxa vô nipaên ge xôn, ên xam nêb xam ob xovô bê xii vông i vô nivɨha lec tibêna?

¹⁰Om xam vɨhati hɨxôn lime Islel vɨhati, xam xovô bêga bê xêkɨzêc wê Yesu Kɨlisi Nasalet vông ge wê vông xomxo tiga vô nivɨha lec mɨ i le vô xam mamnôn. Yesu ge, xam hi i yib lec xax pola, lêc Anutu tɨpi vô i kɨdi lec vac yibên.

¹¹Yesu ge ngɨdax ti wê xam xumac loxên wê ên xam nêbê nipaên ge, lêc i tu ngɨdax xêkɨzêc ti wê xumac ob le xêkɨzêc ya ge.

¹²Ên xomxo ngwe o tɨyi wê ob hôm il lec ge lêm, ên Anutu o nêl xomxo kɨbun ga ti vô il ên nêb i kɨtya il nêd nipaên vêl lêm. Nge, Yesu tibed.”

¹³Xomxo levac tigee, he yetac ên kɨyang wê Pita yuu Jon nêl ge, ên yuu ge xomxo vɨyangtôv yuu dɨ yuu o xulac xumac ti lêm, lêc yuu nêl kɨyang hɨxôn xêkɨzêc dɨ yuu o xona lêm. Om he xovô nêbê yuu ge wê mi dô hɨxôn Yesu ilage.

¹⁴Dɨ he yê xomxo ti wê yuu vông i vô nivɨha lec ge le hɨxôn yuu, om he nên kɨyang ti o yêp wê ob nêl lax vô yuu ge lêm.

¹⁵Om he nêl vô yuu nêb yuu i sea xumac kaunsil dɨ loc vɨxun. Yuu la vɨxun dɨ he nêl vôma ên nêbê,

¹⁶“Il ob vô vatya vô xomxo yuu ganê? Ên xomxo Jelusalem vɨhati xovô do levac wê yuu vông ge om o tɨyi wê il ob yax vun ge lêm.

¹⁷Lêc il ob le vac kɨyang tige xôn, ên i o lêc vô levac mɨ loc vac xomxo vɨhati nɨnya lêm. Om il ob vông vɨbuên xêkɨzêc vô yuu bê yuu i o nêl kɨyang vô xomxo lec Yesu lê i tii vac lêm.”