Aposotolo Adi Hewau 4:1-17

¹Taudi labui tatao se guguiaidi, kohena tataodi eo numa uura kapenana, eo Sadukea se laoma aridi eai,

²nuadi se baaea paana ede tatao se heatadi, eo tatao se guguiaidi, si ene, Iesu debana eai mate eai abo se torouio.

³Isi nimadi eai se abilau aridi eai, i maimailahio arinai se toredi numa tutugudu eai i lau e mara ie tom.

⁴Tatao gamagaridi riba wa se ataiei, se nuatuwatai; tatao se hasiridi, tausani haligigi.

⁵Arinai i lau e mara‐ie‐tom, isi adi tanuaga headi, eo edi babada headi, tauuriuri tataodi maediyao Ierusalema eai se oigogo,

⁶Ana, kohena lailai hinage, eo Kaiapa eo Ioane, eo Alesana, isi gamagaridi hinage kohena lailai ana bogaoyao.

⁷Taudi labui se hebawadi duaduaridi eai, se oimuridi, si ene, “Gigibori esana, eo eai esana eai, wau laulau wa au laulauei?”

⁸Petero Earua Tabuna arinai i monau, i ribalau aridi eai, i ene, “Omi tatao adi tanuagao, eo Isaraela babadadiyao.

⁹Wau au oimurima taumai labui arimai eai teina abiabi lolo taulaulaudaena wa arinai, edoha ena maumauri;

¹⁰omi gamagarimiu, eo Isaraela tataodi gamagaridi hinage, au nuatui, Iesu Keriso, Nasareta tauna debana eai, ia au hesatauroyao, mate eai hinage Eaubada ia i hetorouioi, tau ta matamiu eai i toro, eo tauna se lolo.

¹¹We’una ede ina omi tauabinuma au otaotaei, abo i hemala numa ewa isuna we’una.

¹²Hinage taba nige mauri se abi tau esau arinai: galewa ubuna eai ta nige esau esana se moselaei tatao aridi eai, arinai abo ta mauriei.”

¹³Petero eo Ioane edi adidiri se ita, eo isi se nuatui taudi labui nige tauheatadi, eo isi tatao supusupudi, se nooedi; se nuatulobaiyao isi Iesu maedi se miamia.

¹⁴Wau tau wa se hemauri wa se ita, maedi se toroesega, arinai nige edi aba ribalau.

¹⁵Isi se duiedi se lau numa murimurina eai, abo isibom se oioiriba,

¹⁶si ene, “Tatao ta edoha eda abiabidi? Mamohoi tatao labui ta heiheinoi gigiborina se hemasarahayao Ierusalema taumiaina gamagaridi matadi eai, taba nige eda aba harereedi.

¹⁷Taudi labui ta ta ribahemahematausidi, ata wasa ta se helai, isi Iesu esana wa tabu se ataataiuioi tau esau arinai.”