Soũↄ 49:1-18

¹Kole buiↄ lɛ.

²Bui píi, à yã́ɛ bee ma, dṹnia gbɛ̃́pii, à swã́kpa,

³kíaↄ ń táaaↄ, ↄdeↄ ń taasideↄ píi.

⁴Ɔ̃nↄyã kú ma lɛ́u, dↄ̃a ku ma sↄ̃u.

⁵Má swãdↄ yáasi yã́i, mí polo mↄↄnlɛa guu.

⁶Má vĩakɛ yãpãsĩgↄↄo, baa tó ma wɛ̀lɛↄ liaamazi.

⁷Aa ń àizɛɛ náai vĩ, aaì ń ↄda ĩ́anadã.

⁸Gbɛ̃e a fↄ̃ gí ń a dee wɛ̃nioo, a e pↄe kpa Luawa à aà wɛ̃ni boòo.

⁹Asa gbɛ̃́ wɛ̃ni boa zĩ'ũ, àizɛɛ a fↄ̃ bo bauo.

¹⁰A fↄ̃ to aàↄ ku gↄↄpiio, a fↄ̃ giɛ̀ aà wɛsi bɛdalɛo.

¹¹Asa wa dↄ̃ baa ↄ̃nↄnaↄ ì ga, mìsaideↄ ń sↄũↄ ì midɛ màa píi, aaì ń àizɛɛ tó gbɛ̃pãleↄnɛ.

¹²Baa kɛ́ wà ńzĩa tↄ́ kpà bùsuↄnɛ yãa, an mia aↄ dɛ ń bɛ ũɛ gↄↄpii, an kúkĩi ũ e ń buiwa.

¹³Gbɛ̃nazĩna ń a bɛɛɛkɛo ìliↄ ku gↄↄpiio, a ta lán nↄ̀bↄↄwaɛ.

¹⁴Mìsaideↄ láaan we, màaɛ lↄ ń gbɛ̃́ pↄ́ tɛ́ ń iaiↄ.

¹⁵Aa si bɛdau lán sãↄwa, ga mɛ́ aↄ dɛ ń dã̀dãna ũ, mɛ́ gbɛ̃maaↄ kiblemá zia. An mɛↄ yaikɛ miau, aaↄ kpɛ́ vĩ lↄo.

¹⁶Ãma Lua a ma wɛ̃ni si bɛdawa, i gbãakpamazi.

¹⁷Tó gbɛ̃́ lɛ́ gↄ̃ ↄde ũ, mɛ́ aà bɛ tↄ́ lɛ́ nakṹ, ńsu to à kɛnɛ yãe ũo,

¹⁸asa a a kee e sɛ taò a gagↄↄo, aà àizɛɛↄ e pɛ́lɛaàzio.