SAM 49:1-18

¹Ginu aminu kuupbam, natapnong. Ginu aminu kuupbam kepna kepna yuaingga maak gwaang pake natane wamde natapnong.

²Ginu umanza kaya aminkat umanza wena aminkat gatu sangabamna kayaat sangana wenaat ginu wamu aaknga katak natapnong.

³Natane genanetanu wamu musip kwikwikganekan yanggat. Unzingge nata wamu take akngakan daniwawa natdetdet damikgen.

⁴Na tuwang wamu kundu gambok daniwit. Gatu gwameming daka tanguyuuk tuwang wamdane yapii daniwit.

⁵Aminu kunduta na takumbasike tasiwa maiwitde tasikaing. Siwan ngana nata waaminde dua gwaumbit.

⁶Sike waaminda ninu moninginbam bande apme kekekanimik ngang nataaing. Natake ninu sanganin bamban ngang wamu kaapmapa yakaing.

⁷Ninu atnataamang. Aminu tapatuta notna dua kupikge natake inane moningata usinanga dua. Aho. Ita Anutue kayuk asinggan asinggan yutnanga akngana moningga usinanga dua. Wena siknga.

⁸Dasingge? Amin usinanga aknga buyana enane siknga. Sanga wa usinanga dua.

⁹Aminda Anutu dua usiwan kayuk yutnanga aknga iman kayuu asinggan yuke dua kupik.

¹⁰Ninu kuupbamda akaamang. Ngan, natdetdet aminu akungwakaing. Sike yamandotdong aminkat gatu katum aminkau akungwakaing. Waaminu kungwake moninga ba sangana ngang pewa aminu kunduta paning.

¹¹Tupa aminu waakwau kepna kake aminu kuupbamda keu waamindane ngang natapbing. Siwan ngana apmanu aminda kupan kwaiya gapma yotna binga dakngawan une asinggan asinggan yutning.

¹²Aminu umana kaya akwau kungwak kakngata yapbitnanga dua. Siwan waaminu kaap zongga kungwakaing binga kumning.

¹³Sanga unzing kaknga aminu baniu ineakan sike sanga panggaganukaing gekan apik. Siwan aminu kunduta waamindane wamna take natake tawaning. Sike aminu waakwakge sanga unzing kaknga asapik.

¹⁴Anututa waakwau sipsipda binga kungwake paku gwakumbingga yuaing komune yutningge yawan yuaing. Siwan kungwak kakngata kuyana ita kayuwik. Tembana aminu noman nomana aminda aminu waakwau kayutning. Sike ngana yotna take siknga apekaing gwegwen peke epanu gupna gatukande bukana sikaing. Siwanu wa gwa kupsa aminda yuaing komune yuaing.

¹⁵Siwan ngana Anututa na atapik. Atapan gwa kupsa aminda yuaing komune nana kekeknga akngata na tanggaganutnanga dua. Aho. Ita na tapan naat iat gatake asinggan asinggan yutzim.

¹⁶Sike aminu tapatu moninga kwaapzang ba siwik. Siwan yotna buyambam gwendu mitapik. Mitake sangabamu paku undang pewik. Undanga. Ga ie nangaakan ma natapim.

¹⁷Ga atnataayak. Masande waapa akupik. Siwan sanga tapatu dua take inaat kusan. Sangana kuupbam dua pake akupsa aminda yuaing komune kuwik.

¹⁸Sike tapduu kayuk yukut komunenu sangana waakwakge apbakngakut. Ita puya kekeknga pasike sangabam pakut. Siwan aminda yake aapa take siknga, ngang yaking.