Sekaraia 7

1

2

3

4

5

6

7

8

9

10

11

12

13

14

¹Lon aruanün ierin mwün ewe king Tarius, lon arüanün ränin ewe atiuen maram, iei ewe maram Kislef, ewe Samol mi Lapalap a kapas ngeni Sekaraia.

²Lon ewe fansoun ekewe aramasen Petel ra tinala Sareser me Rekem-melek fiti aramaser ren imwenfelin ewe Samol mi Unusen Manaman, pwe repwe tüngor ngeni ewe Samol mi Lapalap pwe epwe ümöümöch ngeniir.

³Repwe pwal aisini ekewe souasor me ekewe soufos, “Ifa usun, äm aipwe sopwela le ngüngüres me echikefel fän iten talan ewe Imwenfel lon ewe alimuen maram, usun äm aia piin föföri lon chomong ier?”

⁴Mürin, ewe Samol mi Unusen Manaman a kapas ngeniei,

⁵“Kopwe üreni aramasen ewe fanü meinisin, pwal ekewe souasor: Lupwen oua echikefel me ngüngüres lon alimuen me afisuen maram lon ekei fik ier, ifa usun, oua wesewesen echikefel fän itei?

⁶Nge lupwen oua mongö o ün, ifa usun, ousap mongö o ün fän püsin itemi chök?”

⁷Ifa usun, sap ikkei alon ewe Samol mi Lapalap ekewe soufosun lom ra asilefeili, lupwen Jerusalem a so o wöümong fiti ekewe telinimw pwelin ünükün, pwal lupwen ewe fanü ör me ewe fanü lotou mi maasies a so?

⁸Iwe, ewe Samol mi Lapalap a kapas ngeni Sekaraia pwe epwe üreni ekewe aramas,

⁹“Me lom üa allük ngeni nei aramas, ‘Oupwe eäni kapwüng fän let, oupwe kirikiröch o ümöümöch ngeni en me pwin.

¹⁰Ousap ariaföüü ekewe fefin mi mä pwülüer, ekewe mi mäsen, ekewe chon ekis ika ekewe chon wöüngau. Esap wor eman epwe ekiekietä lon letipan och mi ngau ngeni pwin.’

¹¹Nge ir resap mochen rongorong, ra kulu sökürür o pinei selinger pwe resap tongeni rongorong.

¹²Ra apöchöküla leluker pwe a pöchökül usun fau, pwe resap rongorong ekewe allük me ekewe kapas, ngang üa tini ngeni Ngüni, nge ekewe soufosun lom ra asile ngeni ekewe aramas. Iei popun ngang ewe Samol mi Unusen Manaman üa fokun lingeringeritiir.

¹³Lupwen üa kapas, ir resap mochen rongorong, iei mine lupwen ir repwe iotek, ngang üsap mochen rongorong.

¹⁴Iwe, üa atoropaserela lein chon ekewe mwün lükün meinisin, usun eu mölümöl a atoropasa mettoch, nge ewe fanü ra likitala a pönüla, pwe esap wor eman a tongeni nonom lon. Iei usun ewe fanü mi mürina a pönüla.”