SALMOS 94:15-23

¹⁵Se tonali Toteco tetajtolsencahuas xitahuac, huan nochi cati itztoque ica ininemilis xitahuac, inijuanti paquise miyac.

¹⁶¿Ajquiya nechmanahuis inimaco nopa mosisinijca masehualme? ¿Ajquiya nechmocuitahuis ten nopa taixpanoca masehualme?

¹⁷Sinta Toteco amo nechpalehuijtosquía, huajca noyolo ya eltosquía campa tatzitzicatoc pampa ya nimictosquía.

¹⁸Na nitzajtzic huan niquijto: “TOTECO, moxitanía noicxihua.” Huan yaya nechtasojtac huan nechmaquixti.

¹⁹NoTeco, quema san nimoyolilhuía ten miyac tequipacholi huan san ya nopa nijmati, ta techyoltalía. Techchihua ma nimotemachi ipan ta huan techmaca paquilisti.

²⁰Se tanahuatijquet cati amo quichihua cati xitahuac, amo tijcahuas para mosentilis ica ta. Yon amo itztoc mohuaya cati quichihua se tanahuatili cati amo xitahuac.

²¹Pero tanahuatiani cati quej nopa tachihuaj, mosentilíaj huan mocamanalhuíaj para quenicatza quimictise se cati amo teno quichijtoc, o se cati cuali monejnemiltía.

²²Pero TOTECO yaya nechmocuitahuía pampa tahuel miyac chicahualisti quipiya. Ipan noTeco Dios nimotatía huan amo teno huelis nechajsis pampa yaya nechmanahuía.

²³Huan Toteco Dios quichijtoc para ma huetzi ininpani nopa mosisinijca masehualme nochi nopa tamanti cati amo cuali quichijtoque. Yaya quintzontamiltis senquisa quej quisencajtoyaj quinchihuilise sequinoc. Quena, TOTECO toDios yaya quintzontamiltis.