SALMOS 89:8-42

⁸TOTECO, ta tiDios Cati Tijpiya Nochi Chicahualisti, ¿ajquiya seyoc tahuel quipiya chicahualisti quej ta? ¡Amo aqui seyoc! San ta TOTECO tahuel tijpiya chicahualisti. San ta nelía titemachti.

⁹San ta tihueli tijtacahualtía nopa hueyi at quema mosisinía huan mocoxonía chicahuac. Tijtacahualtía huan quichihua cati tiquilhuía.

¹⁰Ta tijtzontamilti nopa cati temajmatiyaya ipan hueyi at. Ica mohueyi chicahualis tiquinsemanqui mocualancaitacahua.

¹¹Ta moaxca ilhuicacti, taltipacti huan nochi cati onca, pampa nochi tijchijchijqui ta.

¹²Tijchijchijqui nopa norte huan sur. Nopa tepeme Tabor huan Hermón paquij pampa ta tiquinchijchijqui.

¹³Moajcol tahuel quipiya chicahualisti. Huan monejmat quipiya tetili huan miyac yajatili para tatanis.

¹⁴Motanahuatilis motatzquilijtoc ipan ome tamanti: Titetajtolsencahua xitahuac huan tijchihua cati cuali. Titeicnelía huan tiquijtohua cati melahuac.

¹⁵Nelía paquij nopa masehualme cati quicaquij nopa tapitzali cati quinnotza ma mitzhueyichihuaca, TOTECO. Inijuanti nemise nelía monechca huan ta tiquintaahuilis.

¹⁶Semilhuit mopaquilismacase ipan ta pampa tahuel tihueyi huan tixitahuac.

¹⁷Pampa san ta tijpiya mohueyitilis huan tiquinfuerzajmaca. Timasehualme tijpiyaj chicahualisti pampa ta techpalehuía.

¹⁸Quena, Toteco Dios, ta cati titatzejtzeloltic techmocuitahuía tojuanti ipan tali Israel. Ta titotanahuatijca.

¹⁹Ipan se tanextili tijcamanalhui motatzejtzeloltijca profeta huan tiquilhui: “Ten nochi masehualme nijtapejpenijtoc se cuajcualtzi telpocat cati tahuel motemaca, huan nijtequitali ma eli tanahuatijquet para na.

²⁰Quena, nijpantijtoc notequipanojca David huan nicaltijtoc ica nopa aceite cati ica niteiyocatalía para ma nechtequipanoca.

²¹Nijchihuas ma eli temachti huan nijmacas chicahualisti.

²²Amo quiechcapantalise icualancaitacahua, yon amo quitanise taixpanoca masehualme.

²³Iixpa niquintzontamiltis icualancaitacahua huan nochi cati quicualancaitaj.

²⁴Na cati nitemachti nijmocuitahuis huan nijtiochihuas talojtzitzi, huan tahuel miyac niquicnelis. Ica na notapalehuil yaya elis tahuel hueyi.

²⁵Na nijchihuas para itanahuatilis pehuas campa hueyat Eufrates, huan tamis hasta campa hueyi at cati itoca Mediterráneo.

²⁶Huan yaya nechtzajtzilis huan nechilhuis: ‘¡Ta tinoTata, ta tinoTeco Dios! Ta cati techmaquixtía huan techtatía para amo teno nechajsis.’

²⁷Na niquitas nopa tanahuatijquet quej noachtohui cone. Nijchihuas para yaya ma eli nopa tanahuatijquet cati más hueyi ipan nochi taltipacti.

²⁸Niquicnelis para nochipa huan para nochipa nijchihuilis cati cuali. Huan nopa camanal sencahuali cati nijchijtoc ihuaya, amo quema tamis.

²⁹Na nijtequimacas se iixhui para ma tanahuatis campa yaya tanahuatiyaya. Itanahuatilis huejcahuas para nochipa quej huejcahuas ilhuicacti.

³⁰Pero sinta iconehua quitahuelcahuase noley huan amo monejnemiltise quej quiijtohua notamachtil,

³¹o sinta quiixpanose cati niquinnahuatijtoc ma quichihuaca ipan ininemilis huan amo quintepanitase notanahuatilhua,

³²huajca niquintatzacuiltis pampa ya nopa quinextis para amo nechneltocatoque huan tajtacolchihuaj.

³³Pero amo nijcahuas niquinicnelis, yon amo nijtamiltis nopa camanali cati nijchijtoc inihuaya.

³⁴Amo niquelcahuas cati ica nimocajtoc David huan amo nijpatas nocamanal.

³⁵Pampa na nitatestigojquetzqui para nijchihuilis David nochi cati nijtajtolcahuilijtoc. Huan na niDios cati nitatzejtzeloltic amo hueli niistacatis.

³⁶Iixhui mosehuis huan tanahuatis para nochipa campa ya mosehui. Itanahuatilis huejcahuas san quej imiyaca tonali taahuijtos tonati.

³⁷Quena, itanahuatilis tahuel huejcahuas quej huejcahuas metzti, o quej huejcahuas nochi cati eltoc ipan ilhuicac cati eltoque quej notestigos.” Quena, quej nopa tiquijto, Toteco.

³⁸¿Huajca para ten techtahuelcahua huan techhuejcamajcahua? ¿Para ten tahuel ticualani ica yaya cati tijtapejpenijtoc para elis tanahuatijquet?

³⁹¿Tijsosolojtoc nopa camanali cati tijchijqui ihuaya? Pampa eltoc quej tijtahuiso icorona hasta talchi.

⁴⁰Tiquincahuili tocualancaitacahua ma quihuelonica nopa tepamit cati yahualtic quitzacuayaya toaltepe. Huan quitamisosolojque nopa calme cati huejcapantique campa timomanahuiyayaj.

⁴¹Nochi cati panoj nopona quiichtequij cati inijuanti quinequij. Huan nopa masehualme cati itztoque tonechca san techhuetzquilíaj.

⁴²Tiquinfuerzajmacatoc tocualancaitacahua, huan tiquinchijtoc ma paquica pampa techtantoque.