Psalm 89:8-42

⁸LEUM GOD Kulana, wangin sie su ku oana kom, Tuh kom oaru in ma nukewa, O LEUM GOD.

⁹Kom leum fin ku lun meoa, Kom akmisye noa lulap we.

¹⁰Kom itungya kosro lulap Rahab, ac unilya; Ke ku lulap lom kom kutangla mwet lokoalok lom.

¹¹Kusrao ac faclu ma lom, Kom orala faclu ac ma nukewa loac.

¹²Kom orala epang ac eir, Fineol Tabor ac Fineol Hermon on nu sum ke engan.

¹³Fuka lupan ku lom! Fuka pwengpengiyen ku lulap lom!

¹⁴Tokosrai lom oakwuk fin suwoswos ac nununku pwaye, Lungse ac oaru akkalemyeyuk in ma nukewa kom oru.

¹⁵Fuka lupan insewowo lalos su alu nu sum ke on, Su moul ke kalmen kulang lom!

¹⁶Ke sripom elos engan ke len nufon, Ac elos kaksakin kom ke wolana lom.

¹⁷Kom ase kutangla yohk nu sesr, Ac ke lungse lom kom oru tuh kut in kutangla.

¹⁸Kom, O LEUM GOD, kom sulela mwet in loangekut; Ac kom, God Mutal lun Israel, ase tokosra lasr.

¹⁹Kom kaskas nu sin mwet kulansap oaru lom in sie aruruma in pacl meet ah, ac fahk, “Nga sang kasru nu sin sie mwet mweun pwengpeng, Nga akleumye sie su nga sulela liki inmasrlon mwet uh.

²⁰Nga oru tuh David, mwet kulansap luk, elan tokosra Ke nga mosrwella ke mwe akmusra mutal.

²¹Ku luk fah welul pacl e nukewa, Ac ku luk fah oru elan ku.

²²Mwet lokoalok lal fah tia kutangulla, Ac mwet koluk fah tia ku facl.

²³Nga ac fah itungya mwet lokoalok lal Ac onelosi nukewa su srungal.

²⁴Nga ac fah lungse el ac pwaye nu sel, Nga ac fah oru tuh elan ku fin mwet lokoalok lal pacl e nukewa.

²⁵Nga ac fah tafwela tokosrai lal, Mutawauk Meoa Mediterranean lac nwe Infacl Euphrates.

²⁶David el ac fah fahk nu sik, ‘Kom papa tumuk ac God luk, Kom eot ku luk ac lango luk.’

²⁷Nga fah oayapa oru tuh elan wounse mukul nutik, El pa fulat liki tokosra nukewa.

²⁸Nga fah karingin wuleang luk nu sel, Ac wulela luk fah welul nwe tok.

²⁹Tokosrai lal ac fah oakwuki ku oana kusrao. Sie sin mwet in fwil natul ac fah tokosra in pacl nukewa.

³⁰“Tusruktu, mwet in fwil natul fin tia akos ma sap luk, Ac tia moul fal nu ke oakwuk luk,

³¹Elos fin seakos mwe luti luk Ac tia karingin ma sap luk,

³²Na nga ac fah srunglulos ke sripen ma koluk lalos; Nga ac fah akkeokyalos ke ma sutuu lalos.

³³Tusruktu, lungse luk nu sel David ac fah tia tui, Oayapa nga fah tia mulkunla wulela luk nu sel.

³⁴Nga ac fah tiana kunausla wulela inmasrlok el, Ku sisla siefanna ma nga tuh wuleang nu sel.

³⁵“Wulela sefanna nga fah orala ke Inek: Nga fah tiana kikiap nu sel David.

³⁶Ac fah oasr na fwil natul, Ac nga fah karingin tokosrai lal ke lusenna pacl faht uh kalem.

³⁷Ac fah sie ma oakwuk oana malem uh Su liye ma nukewa inkusrao me.”

³⁸Tuh pa inge kom kasrkusrak sin tokosra su kom sulela; Kom fahsr lukel ac sisella.

³⁹Kom kunausla wulela lom nu sin mwet kulansap lom Ac sisla tefuro lal nu infohk uh.

⁴⁰Kom kunausya kalkal in siti sel Ac filiya pot ku lal in musalsalu.

⁴¹Elos nukewa su fahsr we, elos pisre ma lal, Ac mwet tulan lal nukewa elos isrunul.

⁴²Kom sang kutangla nu sin mwet lokoalok lal; Kom oru tuh elos nukewa in engan.