SALMOS 88:3-17

³Žedó ḻaža'a ḻo da' bi nak chawe' da' žaken chia', na' ba zoa' gata'.

⁴Ẕḻé'egekle benne' ka' neda' ka to benne' gat, dan' žatḻe'e ni'a na'a.

⁵Nga'na' ka'ze ladjw benne' gat ka'. Naka' ka benne' ka' gótgake' ḻo wdiḻe, na' zej die' ḻo yežw ba ka', benne' ka' biž žezá' ḻažo'o, Dios, chégake', na' biž zej yoe'e ḻo no'o Le'.

⁶Žak chia' ka bzoakzo' neda' to ḻo yežw gže', gan nak choḻ, na' nakḻe'en gže'.

⁷Žekla' ẕžá'aḻi'o neda'. Da' žak chia' naken kan žetja' ẕan nisdo' dan' ẕgo'nḻe'en.

⁸Beno' ga bebíga'gak lježa' ka' gan zoa'. Beno' neda' ka to da' žesgotlen benne' ka'. Naken chia' ka nyejwa' liž ya, na' bi gak yežoja'.

⁹Ẕchoḻ yej ḻawa' ni'a che da' ẕzáka'ḻi'a. Yógo'te ža žḻiža' Le', X̱ana' Dios. Ẕchis na'a ḻawo' Le'.

¹⁰¿Ḻen yeḻa' wak che ya'abá gákḻeno' benne' gat ka'? ¿Že'gak benne' gat ka' Le': “Žóx̱keno'”?

¹¹¿Ẕchaḻjgak benne' ka' zej ngache'e yežw ba che yeḻa' ži'i ḻaže' chio'? ¿Ẕchaḻjgak benne' ka' zej yoe'e latje choḻ chegak benne' gat ka' che da' ḻi ḻaže' chio'?

¹²¿Yeyónbia'gak benne' ka' zej yoe'e latje choḻen' ka nak da' ẕente da' žono'? ¿Yeyónbia'gak benne' zej yoe'e gan bi zoa no benne' žesá' ḻaže'e nakkzo' chawe'?

¹³San neda' žḻiža' Le', X̱ana' Dios. Yógo'te zile da' ẕnnabla' Le' ženlen ḻawo' Le'.

¹⁴¿Biẕ chen' žebéj yichjo' neda', X̱ana' Dios? ¿Biẕ chen' bi ẕwio' neda' nich gákḻeno' neda'?

¹⁵Ẕzáka'ḻi'a, na' ba zoa' gata'. Kate' ne naktia' bi' kwide' ẕzáka'ḻi'a dan' bsako'o Le' neda', na' žedó ḻaža'a.

¹⁶Žekla' ẕžá'aḻi'o neda'. Da' ẕchebo' neda' benen ga bedó ḻaža'a.

¹⁷Zej nyechjle da' ki neda' dot ža. Žsáka'gaken neda' gáte'teze.