SALMOS 88:3-17

³pampa nijmati nisiyajtoc ica nochi catli amo cuali hasta nijmati ya nechcatitoc para nimiquis.

⁴Miyac quiijtohuaj para ya tlantinemi nonemilis huan para ayacmo nijpiya chicahualistli.

⁵Masehualme nechtlahuelcajtoque para ma nimiqui. Niitztoc quen se catli ya mijqui ipan tlahuilancayotl huan nochi quielcahuaj sintla itztoya. Huan eltoc quen ta techelcajqui huan ayacmo techmocuitlahuía.

⁶Ta techmajcajtoc ipan nopa ostotl catli más huejcatla campa onca tzintlayohuilotl catli más yayahuic.

⁷Mocualancayo nechtlaijiyohuiltía chicahuac huan tlatoctzitzi nechtlatzintlanhuetziltía más.

⁸Tijchijtoc para noteiximatcahua ma nechtlahuelcahuaca huan ma nechijiyaca. Eltoc quen niitztoc ipan se tlatzactli huan amo hueli niquisa.

⁹Ayacmo hueli nitlachiya pampa tlahuel nimochoquilijtoc. Mojmostla nimitztlajtlanía motlapalehuil, huan nimomatlanana quema nimotlatlajtía ica ta, TOTECO, para techtlasojtla.

¹⁰Pero nijmachilía para, quena, nimiquis nimantzi, huan ¿tlaque ipati elis para na nopa tiochicahual nextili catli tijchihuas quema ya nimictoc? ¡Amo tleno! ¿Atlac nihuelis nimitzpaquilismacas quema ya nimictos?

¹¹Se mijcatzi catli ya quitlalpachojtoque amo huelis tepohuilis para tijpiya hueyi tlaicnelili. Amo huelis tepohuilis para titemachtli.

¹²Nepa campa tzintlayohua amo huelise tepohuilise nopa huejhueyi tiochicahual nextili catli tijchihua. Mijcatzitzi itztoque ipan se tlali campa ayacmo tleno quielnamiquij, huan amo huelis mitzelnamiquise para san ta tixitlahuac.

¹³Pero na nimitztzajtzilijtoc ta TOTECO, huan sesen ijnaloc nochi catli niquijtohua quema nimotlatlajtía ica ta ajsi hasta moixtla.

¹⁴TOTECO, ¿para tlen tijhuejcamajcajtoc nonemilis? ¿Para tlen tiquijcuinía moixayac huan titlachiya ipan seyoc lado?

¹⁵Na niitztoc ipan tlaijiyohuili huan tequipacholi hasta quema noja niitztoya nitelpocatl. Majmajtli huan miquilistli catli ta techtitlanilijtoc nechtoquilijtinemi, huan ama ayacmo nihueli más niquijiyohuía.

¹⁶Miyac huelta hualajtoc nopan na mohueyi cualancayo, huan nopa majmajtli catli techtitlanilijtoc tlahuel nechtlaijiyohuiltía.

¹⁷Quena, nochi nopa tlamantli nechyahualojtoc quen atl.