Pesalem 88:3-17

³Gebe katuc gêôc gêŋwapac e têkwa gêbac ma kasa paŋ lamboam ŋalêndaŋ.

⁴Êsêac sêsam aê gawiŋ lau, taŋ sê su sêsêp sêlêlôm sêja naŋ. Aê katôm ŋac, taŋ nê ôliwalô gêjaŋa su naŋ.

⁵Aêŋoc mê gêc ŋacmatê ŋalêlôm katôm êsêac, taŋ sêjac êsêac êndu sêc sêlêlôm naŋ. Lau tonaŋ ŋai aôm taêm gêjam êsêac kêtiam atom gebe lêmam gêjam êsêac sapu sugac.

⁶Aôm kôtiŋ aê su kasêp lamboam ŋalabuanô gaja, kasêp gêsuŋbôm ŋakêlêndiŋ sec.

⁷Aômnêm têmtac ŋandaŋ kêsac aê êndu. Ma nêm têmtac ŋandaŋ ŋadembom samob kêkôniŋ aê tôŋ.

⁸Aôm kôkêŋ ŋoc lau mêŋbaŋ samob sêjac jaê aê gebe sêlic aê amboac gêŋ ŋanô masi teŋ. Kôlai aê auc, tec gabe jasa e jatuc-jatuc.

⁹Gaŋgôŋ jageo e matocanô kêtu wao. O Apômtau, aê aoc gêjac aôm kêtôm bêcgeŋ ma galam lemoc gêdêŋ aôm.

¹⁰Aôm oc ôŋgôm gêŋtalô êpi ŋacmatê me masi. Êsêac oc dêndi mêŋsêlanem aôm me masi.

¹¹Êsêac oc sênac miŋ biŋ êpi aômnêm têmtac gêwiŋ teŋgeŋŋa aŋga sêlêlôm me masi. Oc sêsôm biŋ êpi aômnêm biŋ ŋaŋêŋ aŋga gêŋ gêmôb ŋamala me masi.

¹²Êsêac oc sêsôm aômnêm gêŋtalô ŋawae aŋga gêsuŋbôm me masi. Oc sêsôm nêm biŋgêdêŋ lasê aŋga gamêŋ sêliŋ tauŋ siŋŋa me masi.

¹³O Apômtau, amboac tonaŋ aoc gêjac aôm. Ŋoc mec gêdêŋ aôm gêwac kêtôm bêbêcgeŋ samob.

¹⁴O Apômtau, amboac ondoc kôtiŋ aê su ma gôsaŋ laŋômanô auc gêdêŋ aê.

¹⁵Aê tekoc saki masi gêdêŋ ŋapalêgeŋ ma tec gamoa jageo ŋapaŋ. Aê tekoc gêbac kêtu nêm ŋagêjô ŋawapacŋa.

¹⁶Aôm têmtac ŋandaŋ ŋawaô kêku aê tulu. Aômnêm gêŋwapac kêtakê aê e katuc uŋ tageŋ.

¹⁷Kêtôm bêc samob kêkôm aê auc amboac bu ŋasamac ma gêjam aê auc samucgeŋ.